ಕ್ಷುಲ್ಲಕ‌ ಕಾರಣಕ್ಕೆ ಹಾಡ ಹಗಲೇ ಯುವಕನ ಕೊಲೆ: ಬೆಚ್ಚಿಬಿದ್ದ ಶಿವಮೊಗ್ಗ ಜನತೆ

ಶಿವಮೊಗ್ಗ ನಗರದಲ್ಲಿ ಕ್ಷುಲ್ಲಕ ಕಾರಣಕ್ಕೆ ಯುವಕನ ಕೊಲೆಯಾಗಿದೆ. ಈ ಸಂಬಂಧ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಶಿವಮೊಗ್ಗ:ಕ್ಷುಲ್ಲಕ ಕಾರಣಕ್ಕೆ ಹಾಡು ಹಗಲೇ ಯುವಕನ ಕೊಲೆ ನಡೆದಿದ್ದು, ಶಿವಮೊಗ್ಗ ಜನತೆ ಬೆಚ್ಚಿ ಬಿದ್ದಿದೆ. ರಾಹೀಲ್ (30)​ ಕೊಲೆಯಾದ ಯುವಕ, ಅಸ್ಗರ್(19) ಎಂಬಾತ ಕೊಲೆಗೈದ ಆರೋಪಿ ಎಂದು ಗುರುತಿಸಲಾಗಿದೆ. ‌

ನಿನ್ನೆ ಅಸ್ಗರ್​ನ ತಂದೆಯ ಬೈಕ್ ರಾಹೀಲ್​ ಸೈಕಲ್‌ಗೆ ಡಿಕ್ಕಿ ಹೊಡೆದಿತ್ತು. ಈ ವೇಳೆ, ಜಗಳ ಉಂಟಾಗಿ ಕೊಲೆಯಾದ ರಾಹೀಲ್, ಅಸ್ಗರ್ ತಂದೆಯ ಕೆನ್ನೆಗೆ ಹೊಡೆದಿದ್ದನಂತೆ. ಕೊನೆಗೆ ಸೈಕಲ್​ ರಿಪೇರಿ ಮಾಡಿಕೊಡುವ ತೀರ್ಮಾನದಲ್ಲಿ ಗಲಾಟೆ ಅಂತ್ಯವಾಗಿತ್ತು.

‘ಆದರೆ, ತನ್ನ ತಂದೆಗೆ ಹೊಡೆದಿದ್ದ ಕೋಪದಲ್ಲಿದ್ದ ಅಸ್ಗರ್, ಇಂದು ನಗರದ ಟ್ಯಾಂಕ್‌ ಮೊಹಲ್ಲದ 3 ನೇ ತಿರುವಿನಲ್ಲಿ ರಾಹೀಲ್​​ನನ್ನು ತಡೆದು ಏಕಾಏಕಿ ತಾನು ತಂದಿದ್ದ ಚಾಕುವಿನಿಂದ ಹೊಟ್ಟೆಗೆ ನಾಲ್ಕೈದು ಬಾರಿ ಇರಿದಿದ್ದಾನೆ. ರಕ್ತದ ಮಡುವಿನಲ್ಲಿ ಬಿದ್ದು ಒದ್ದಾಡುತ್ತಿದ್ದ ಯುವಕನನ್ನು ಸ್ಥಳೀಯರು ಆಸ್ಪತ್ರೆಗೆ ಕರೆದುಕೊಂಡು ಹೋಗುತ್ತಿದ್ದ ವೇಳೆ ರಾಹೀಲ್ ದಾರಿ ಮಧ್ಯೆ ಸಾವನ್ನಪ್ಪಿದ್ದಾನೆ.

ಘಟನೆ ನಡೆದ ಸ್ಥಳಕ್ಕೆ ಹೆಚ್ಚುವರಿ ಜಿಲ್ಲಾ ರಕ್ಷಣಾಧಿಕಾರಿ ಡಾ.ಶೇಖರ್, ಕೋಟೆ ಪೊಲೀಸ್ ಠಾಣೆ ಪಿಐ ಚಂದ್ರಶೇಖರ್ ಭೇಟಿ ನೀಡಿದ್ದರು. ಬಳಿಕ ಆರೋಪಿ‌ ಅಸ್ಗರ್​​​ನನ್ನು ಬಂಧಿಸಿದ್ದು, ಪ್ರಕರಣ ದಾಖಲಿಸಿಕೊಂಡಿದ್ದಾರೆ.