ಹುತಾತ್ಮರಾದ ಮೂವರು ರೈತರು... 37 ವರ್ಷಗಳ ನಂತರ ಸ್ಮಾರಕ ನಿರ್ಮಿಸಿದ ರೈತ ಸಂಘ

ರೈತರ ಸಮಸ್ಯೆಗಳನ್ನು ಪರಿಹರಿಸಬೇಕೆಂದು ನೂರಾರು ರೈತರು ಭದ್ರಾವತಿ ತಾಲೂಕಿನ ನಾಗಸಮುದ್ರ ಗ್ರಾಮದಲ್ಲಿ ಹೋರಾಟ ಆರಂಭಿಸಿದ್ದರು. ಆದರೆ ಹೋರಾಟ ಹಿಂಸಾಚಾರಕ್ಕೆ ತಿರುಗಿದ್ದರಿಂದ ಪೊಲೀಸರು ನಡೆಸಿದ ಗೋಲಿಬಾರ್​​ನಲ್ಲಿ ಮೂವರು ರೈತರು ಮೃತಪಟ್ಟರು. ಆ ರೈತರ ನೆನಪಿಗಾಗಿ ಇದೀಗ ನಾಗಸಮುದ್ರದ ಜನತೆ ಹಾಗೂ ರೈತ ಸಂಘದವರು 37 ವರ್ಷದ ಬಳಿಕ ರೈತರ ಸ್ಮಾರಕ ನಿರ್ಮಿಸಿದ್ದಾರೆ.

ಶಿವಮೊಗ್ಗ: ಸರಿ ಸುಮಾರು 37 ವರ್ಷಗಳ ಹಿಂದೆ ನಡೆದ ಘಟನೆ ಇದು.ರೈತರ ಸಮಸ್ಯೆಗಳನ್ನು ಈಡೇರಿಸಬೇಕು ಎಂದು ರೈತರು ರೈತ ಸಂಘದ ನೇತೃತ್ವದಲ್ಲಿ ನಾಗಸಮುದ್ರ ಗ್ರಾಮದಲ್ಲಿ ಪ್ರತಿಭಟನೆ ನಡೆಸುತ್ತಿದ್ದರು. ಆದರೆ ಅದೇ ವೇಳೆಗೆ ಸಚಿವರಾಗಿದ್ದ ಕಾಗೋಡು ತಿಮ್ಮಪ್ಪ ಅವರ ಕಾರ್ಯಕ್ರಮ ನಾಗಸಮುದ್ರಕ್ಕೆ ಸಮೀಪದ ಮಂಗೋಟೆ ಗ್ರಾಮದಲ್ಲಿ ಆಯೋಜನೆಯಾಗಿತ್ತು. ಈ ಕಾರ್ಯಕ್ರಮಕ್ಕೆ ಮುತ್ತಿಗೆ ಹಾಕಲು ರೈತರು ನಿರ್ಧರಿಸಿದ್ದರು.

ಇದು ತಿಳಿಯುತ್ತಿದ್ದಂತೆ ಕಾಗೋಡು ತಿಮ್ಮಪ್ಪ ಅವರ ಮಂಗೋಟೆ ಕಾರ್ಯಕ್ರಮವನ್ನು ರದ್ಧುಗೊಳಿಸಲಾಗಿತ್ತು. ಇದರಿಂದ ರೊಚ್ಚಿಗೆದ್ದ ರೈತರು ಪೊಲೀಸ್ ವಾಹನಗಳನ್ನು ಅಡ್ಡಗಟ್ಟಿ ಪ್ರತಿಭಟನೆ ನಡೆಸಲಾರಂಭಿಸಿದ್ದರು. ಆಗ ಉದ್ರಿಕ್ತಗೊಂಡಿದ್ದ ಕೆಲ ರೈತರು ಒಂದು ಪೊಲೀಸ್ ಜೀಪ್ ಹಾಗೂ ಇನ್ನೊಂದು ಪೊಲೀಸ್ ವ್ಯಾನ್​​​ಗೆ ಬೆಂಕಿ ಹಚ್ಚಿದ್ದರು. ಇದರಿಂದ ಸಿಟ್ಟಿಗೆದ್ದ ಪೊಲೀಸ್ ಇಲಾಖೆ ರೈತರ ಮೇಲೆ ಗೋಲಿಬಾರ್ ನಡೆಸಿದ್ದರಿಂದಾಗಿ ಮೂವರು ರೈತರು ಜೀವ ತೆತ್ತಿದ್ದರು.

ಹಿರಿಯ ಅಧಿಕಾರಿಗಳ ಅನುಮತಿ ಸಿಗುತ್ತಿದ್ದಂತೆಯೇ ರೈತರ ಮೇಲೆ ಪೊಲೀಸರು ಗುಂಡಿನ ಮಳೆಯನ್ನೇ ಸುರಿಸಿದ್ದರು. ಈ ಗುಂಡಿನ ದಾಳಿಯಲ್ಲಿ ಬಸವನಗೌಡ, ಮಲ್ಲಪ್ಪ ಎಂಬ ರೈತರು ಹಾಗೂ ನಟರಾಜ್ ಎಂಬ ವಿದ್ಯಾರ್ಥಿ ಮೃತಪಟ್ಟಿದ್ದರು. ಆದರೆ ಪೊಲೀಸರು ತಮ್ಮ ವಾಹನಗಳಿಗೆ ತಾವೇ ಬೆಂಕಿ ಹಚ್ಚಿಕೊಂಡಿದ್ದರು. ಇದನ್ನು ವಿದ್ಯಾರ್ಥಿ ನಟರಾಜ್ ನೋಡಿದ್ದರಿಂದ ಆತನಿಗೆ ಶೂಟ್ ಮಾಡಲಾಯಿತು ಎಂದು ಹೇಳುತ್ತಾರೆ ನಾಗಸಮುದ್ರದ ಗ್ರಾಮಸ್ಥರು.

ಒಟ್ಟಾರೆ ಅಂದು ಶಾಂತಿಯುತವಾಗಿ ನಡೆಯುತ್ತಿದ್ದ ರೈತರ ಹೋರಾಟ ಹಿಂಸಾರೂಪಕ್ಕೆ ತೆರಳಿತ್ತು. ಆದರೆ ಅದೇ ಸಮಯಕ್ಕೆ ತಾಳ್ಮೆ ಕಳೆದುಕೊಂಡ ಪೊಲೀಸರ ಕ್ರಮದಿಂದಾಗಿ ಮೂವರು ಅಮಾಯಕ ರೈತರ ಪ್ರಾಣಪಕ್ಷಿಯೇ ಹಾರಿ ಹೋಗಿತ್ತು. ಇದೀಗ ಈ ರೈತರ ಸ್ಮಾರಕ ನಿರ್ಮಿಸುವ ಮೂಲಕ ಹುತಾತ್ಮರಾದ ರೈತರನ್ನು ಪ್ರತಿದಿನವೂ ನೆನಪಿಸಿಕೊಳ್ಳುತ್ತಿದ್ದಾರೆ ನಾಗಸಮುದ್ರ ಗ್ರಾಮದ ರೈತರು.