ಸೋಂಕಿತರಿಗಾಗಿ ಜಿಲ್ಲೆಯಲ್ಲಿ ಹೋಟೆಲ್ ಬಳಸಿಕೊಂಡಿಲ್ಲ: ಶಿವಮೊಗ್ಗ ಡಿಸಿ

ಶಿವಮೊಗ್ಗ ಜಿಲ್ಲೆಯಲ್ಲಿ ಖಾಸಗಿ ಹೋಟೆಲ್​​ಗಳನ್ನು ಈವರೆಗೂ ಬಾಡಿಗೆ ಪಡೆದುಕೊಂಡಿಲ್ಲ. ಆ ಪ್ರಮೇಯವೂ ಒದಗಿ ಬಂದಿಲ್ಲ ಎಂದು ಜಿಲ್ಲಾಧಿಕಾರಿ ಕೆ.ಬಿ.ಶಿವಕುಮಾರ್ ಹೇಳಿದ್ದಾರೆ.

ಶಿವಮೊಗ್ಗ: ಜಿಲ್ಲೆಯಲ್ಲಿ ಮೆಗ್ಗಾನ್ ಆಸ್ಪತ್ರೆ ಆಸ್ಪತ್ರೆ ಸೇರಿ ನಾಲ್ಕು ಕೋವಿಡ್ ಕೇರ್ ಸೆಂಟರ್​​ಗಳು ಇರುವುದರಿಂದ ಹೋಟೆಲ್ ಬಳಕೆ ಮಾಡುತ್ತಿಲ್ಲ. ಈ ಕುರಿತು ಹೋಟೆಲ್ ಸಂಘ ಹಾಗೂ ಮಾಲೀಕರ ಜೊತೆ ಮಾತುಕತೆಯೇ ನಡೆಸಿಲ್ಲ. ಸದ್ಯಕ್ಕೆ ಜಿಲ್ಲೆಯಲ್ಲಿ ಹೋಟೆಲ್ ಬಳಕೆಯ ಕುರಿತು ಯಾವುದೇ ಚಿಂತನೆ ಇಲ್ಲ ಎಂದು ಜಿಲ್ಲಾಧಿಕಾರಿ ಕೆ.ಬಿ.ಶಿವಕುಮಾರ್ ಸ್ಪಷ್ಟನೆ ನೀಡಿದ್ದಾರೆ‌.

ಒಂದು ವೇಳೆ ಪೊಲೀಸರು, ವೈದ್ಯರಿಗೆ ಸೋಂಕು ಕಂಡು ಬಂದರೆ ಅವರನ್ನು ಹೋಟೆಲ್​​​ನ ಒಂದು ಅಥವಾ ಎರಡು ರೂಮ್​ಗಳನ್ನು ಪಡೆದು ದಾಖಲು ಮಾಡಲಾಗುತ್ತದೆ. ಅದರಲ್ಲೂ ರೋಗ ಲಕ್ಷ್ಮಣಗಳಿದ್ದರೆ ಅವರನ್ನು ಮೆಗ್ಗಾನ್ ಆಸ್ಪತ್ರೆಗೆ ದಾಖಲಿಸಲಾಗುತ್ತದೆ ಎಂದರು.

ಕೋವಿಡ್ ಸೊಂಕಿತರನ್ನು ಕ್ವಾರಂಟೈನ್ ಮಾಡಲು ಜಿಲ್ಲೆಯಲ್ಲಿ ಇನ್ನೂ‌ ಯಾವುದೇ ‌ಹೋಟೆಲ್​​ಗಳನ್ನು ಬಳಸಿಕೊಂಡಿಲ್ಲ. ಕೋವಿಡ್ ಕೇರ್ ಸೆಂಟರ್ ಆಗಿ ಮೆಗ್ಗಾನ್ ಕೋವಿಡ್ ಸೆಂಟರ್​​ನಲ್ಲಿ ಉತ್ತಮ ಚಿಕಿತ್ಸೆ ದೊರೆಯುತ್ತಿದೆ ಎಂಬ ಮಾಹಿತಿ ಲಭ್ಯವಾಗುತ್ತಿದೆ.

ಸೋಂಕಿತರಿಗೆ ಚಿಕಿತ್ಸೆ ನೀಡುವ ಉದ್ದೇಶದಿಂದ ಇನ್ನೂ ಕಾಮಗಾರಿ ನಡೆಯುತ್ತಿದ್ದ ಕಟ್ಟಡದಲ್ಲೇ ಎಲ್ಲಾ ಮೂಲ ಸೌಲಭ್ಯಗಳನ್ನು ಒದಗಿಸಿ ಕೋವಿಡ್​ ಸೆಂಟರ್​ ಆಗಿ ಪರಿವರ್ತನೆ ಮಾಡಲಾಯಿತು. ಉತ್ತಮ ಚಿಕಿತ್ಸೆ ದೊರೆಯುತ್ತಿರುವ ಕಾರಣ, ಖಾಸಗಿ ಹೋಟೆಲ್​ಗಳನ್ನು ಬಾಡಿಗೆ ಪಡೆದಿಲ್ಲ ಎನ್ನಲಾಗಿದೆ.