ನಮ್ಮ ಸಿಬ್ಬಂದಿ ರಕ್ಷಣೆಗಾಗಿ ಅಸ್ಲಾಂ ಕಾಲಿಗೆ ಶೂಟ್ ಮಾಡಲಾಗಿದೆ: ಎಸ್​ಪಿ ಮಿಥುನ್ ಕುಮಾರ್ ಸ್ಪಷ್ಟನೆ

ಆರೋಪಿಯೊಬ್ಬನನ್ನು ಬಂಧಿಸಲು ಹೋದಾಗ ಪೊಲೀಸರ ಮೇಲೆ ಹಲ್ಲೆ ನಡೆಸಿದ ಕಾರಣ ಅಸ್ಲಾಂ ಎಂಬಾತ ಕಾಲಿಗೆ ಗುಂಡು ಹಾರಿಸಲಾಗಿದೆ ಅಂತಾ ಎಸ್​ಪಿ ಮಿಥುನ್ ಕುಮಾರ್ ಮಾಹಿತಿ ನೀಡಿದ್ದಾರೆ.

ಶಿವಮೊಗ್ಗ: ಅಸ್ಲಾಂ ಎಂಬಾತನನ್ನು ಹಿಡಿಯಲು ಹೋದಾಗ ಆತ ನಮ್ಮ ಸಿಬ್ಬಂದಿ ಮೇಲೆ ಚಾಕುವಿನಿಂದ ಹಲ್ಲೆಗೆ ಮುಂದಾದ. ನಮ್ಮ ಸಿಬ್ಬಂದಿ ರಕ್ಷಣೆಗಾಗಿ ಗುಂಡು ಹಾರಿಸಲಾಯಿತು ಎಂದು ಎಸ್​ಪಿ ಮಿಥುನ್ ಕುಮಾರ್ ತಿಳಿಸಿದರು.

ಅಕ್ಟೋಬರ್ 30 ರಂದು ಶಿವಮೊಗ್ಗದ ಬಿ.ಹೆಚ್.ರಸ್ತೆಯ ರಾಯಲ್ ಆರ್ಕಿಡ್ ಮುಂಭಾಗ ಅಶೋಕ್ ಪ್ರಭು ಎಂಬಾತನ ಮೇಲೆ ಅಸ್ಲಾಂ ಹಲ್ಲೆ ನಡೆಸಿದ್ದ. ಇದರಿಂದ ಅಶೋಕ ಪ್ರಭು ಗಾಯಗೊಂಡಿದ್ದರು. ಪ್ರಕರಣದಲ್ಲಿ ಇಬ್ಬರು ಯುವಕರು, ಇಬ್ಬರು ಅಪ್ರಾಪ್ತರು ಭಾಗಿಯಾಗಿದ್ದರು. ಈಗಾಗಲೇ, ಸಾಗರದ ಆಸೀಫ್ ಎಂಬಾತನನ್ನು ಬಂಧಿಸಲಾಗಿದೆ.

ಇನ್ನೋರ್ವ ಆರೋಪಿ ಅಸ್ಲಾಂ ಶಿವಮೊಗ್ಗ ಹೊರ ವಲಯ ಪುರಲೆ ಬಳಿಯ ನೂತನ ಲೇಔಟ್​ನಲ್ಲಿ ಇರುವ ಬಗ್ಗೆ ಖಚಿತ ಮಾಹಿತಿ‌ ದೊರೆತ ಹಿನ್ನೆಲೆ ದೊಡ್ಡಪೇಟೆಯ ಪಿಎಸ್ಐ ವಸಂತ ಕುಮಾರ್ ತಮ್ಮ ಸಿಬ್ಬಂದಿ ಜೊತೆ ಬಂಧಿಸಲು ಹೋದಾಗ, ಆರೋಪಿಯು ರಮೇಶ್ ಎಂಬ ಕಾನ್ಸ್​ಟೇಬಲ್​ ಮೇಲೆ ಚಾಕುವಿನಿಂದ ಹಲ್ಲೆ ನಡೆಸಿ, ಪರಾರಿಯಾಗಲು ಯತ್ನಿಸಿದ್ದಾನೆ.‌

ಬಳಿಕ ಪಿಎಸ್ಐ ವಸಂತ ಕುಮಾರ್ ಅಸ್ಲಾಂನನ್ನು ಸೆರೆಂಡರ್ ಆಗುವಂತೆ ಎಚ್ಚರಿಕೆ ನೀಡಿದ್ರು ಸಹ ಆತ ಓಡಲು ಯತ್ನಿಸಿದಾಗ ಆತನ ಕಾಲಿಗೆ ಗುಂಡು ಹೊಡೆದಿದ್ದಾರೆ ಎಂದರು.

ಇದನ್ನೂ ಓದಿ:ಶಿವಮೊಗ್ಗದಲ್ಲಿ ಮತ್ತೊಮ್ಮೆ ಗುಂಡಿನ ಸದ್ದು: ಆರೋಪಿ ಕಾಲಿಗೆ ಗುಂಡೇಟು

ಬಂಧಿತ ಅಸ್ಲಾಂ ಹಾಗೂ ಆಸೀಫ್ ಇಬ್ಬರು ಅನೇಕ ಅಪರಾಧ ಪ್ರಕರಣಗಳಲ್ಲಿ ಭಾಗಿಯಾಗಿದ್ದಾರೆ. ಉಳಿದ ಇಬ್ಬರ ಪತ್ತೆಗಾಗಿ ತಂಡ ರಚನೆ ಮಾಡಲಾಗಿದೆ. ಅವರ ಮಾಹಿತಿಯನ್ನು ಶೀಘ್ರವೇ ನೀಡಲಾಗುವುದು ಎಂದರು.‌ ಈ ವೇಳೆ ಎಎಸ್​ಪಿ ವಿಕ್ರಂ ಅಮಟೆ, ಡಿವೈಎಸ್​ಪಿ ಬಾಲರಾಜ್ ಹಾಜರಿದ್ದರು.