ಶಿವಮೊಗ್ಗ: ಗಾಂಧಿ ಪಾರ್ಕ್​ನಲ್ಲಿ ಅಧ್ಯಯನ ಕೇಂದ್ರ, ಸೈನ್ಸ್ ಪಾರ್ಕ್ ನಿರ್ಮಾಣಕ್ಕೆ ನಿರ್ಧಾರ

ಶಿವಮೊಗ್ಗ ನಗರದ ಹೃದಯಭಾಗದಲ್ಲಿರುವ ಗಾಂಧಿ ಪಾರ್ಕ್ ಎಲ್ಲರಿಗೂ ಅಚ್ಚುಮೆಚ್ಚು. ಬೆಳಗ್ಗೆ ಹಾಗೂ ಸಂಜೆ ವಾಕಿಂಗ್ ಮಾಡುವವರಿಗಂತೂ ಶಿವಮೊಗ್ಗದ ಗಾಂಧಿ ಪಾರ್ಕ್ ಎಂದರೆ ತುಂಬಾ ಪ್ರೀತಿ. ಇನ್ನೂ ಮಕ್ಕಳಂತೂ ಶಾಲೆಗೆ ರಜೆ ಎಂದರೆ ಸಾಕು ಪಾರ್ಕ್​ನಲ್ಲಿ ಆಡಿ ಕುಣಿದು ಟೈಂ ಪಾಸ್ ಮಾಡುತ್ತಾರೆ. ಈ ಗಾಂಧಿ ಪಾರ್ಕ್​ಗೆ ಇದೀಗ ಮಾಡರ್ನ್‌ ಟಚ್ ನೀಡಲು ಮಹಾನಗರ ಪಾಲಿಕೆ ಮುಂದಾಗಿದೆ. ಸ್ಮಾರ್ಟ್ ಸಿಟಿ ಯೋಜನೆಯಡಿ 8.58 ಕೋಟಿ ರೂಪಾಯಿ ವೆಚ್ಚದಲ್ಲಿ ಪಾರ್ಕ್​ನನ್ನು ವೈಜ್ಞಾನಿಕವಾಗಿ ಅಭಿವೃದ್ಧಿಪಡಿಸಲು ನಿರ್ಧರಿಸಲಾಗಿದೆ.

ಶಿವಮೊಗ್ಗ: ಗಾಂಧಿ ಪಾರ್ಕ್ ಅನ್ನು ವೈಜ್ಞಾನಿಕವಾಗಿ ಸಮರ್ಪಕವಾಗಿ ಅಭಿವೃದ್ಧಿಗೊಳಿಸಲು ಸಿಡಬ್ಲುಇ ಇನ್ಸ್ಟಿಟ್ಯೂಟ್​ಗೆ ಟೆಂಡರ್ ನೀಡಲಾಗಿದೆ. ಗಾಂಧಿಪಾರ್ಕ್​ನಲ್ಲಿ ಶಿವಮೊಗ್ಗದ ಇತಿಹಾಸ ತಿಳಿಸಿಕೊಡುವ ಮಾಹಿತಿ ಕೇಂದ್ರ ಹಾಗೂ ಸೈನ್ಸ್ ಪಾರ್ಕ್ ನಿರ್ಮಿಸಲು ಉದ್ದೇಶಿಸಲಾಗಿದೆ.

ಶಿವಮೊಗ್ಗದ ಇತಿಹಾಸವನ್ನು ಸಾರುವ ತುಂಗಾನದಿ, ಪಶ್ಚಿಮಘಟ್ಟಗಳು, ಜೋಗ, ಶಿಸ್ತಿನ ಸಿಪಾಯಿ ಎಂದೇ ಹೆಸರುವಾಸಿಯಾಗಿರುವ ಕೆಳದಿ ಅರಸ ಶಿವಪ್ಪನಾಯಕನ ಅರಮನೆ ಹಾಗೂ ಆತನ ಆಡಳಿತದ ಬಗ್ಗೆ ತಿಳಿಸಿಕೊಡುವುದು ಸೇರಿದಂತೆ ಜಿಲ್ಲೆಯ ಸಮಗ್ರ ವಿವರ ನೀಡುವ ಮಾಹಿತಿ ಕೇಂದ್ರ ನಿರ್ಮಾಣ ಮಾಡಲಾಗುತ್ತಿದೆ.

ಇದನ್ನೂ ಓದಿ: ಶಿವಮೊಗ್ಗ : ಗಲಾಟೆ, ಗದ್ದಲದ ನಡುವೆ ಮಹಾನಗರ ಪಾಲಿಕೆ ಬಜೆಟ್ ಮಂಡನೆ

ಶಿವಮೊಗ್ಗದ ಗಾಂಧಿಪಾರ್ಕ್​ನ 2 ಎಕರೆ ಜಾಗದಲ್ಲಿ ಮಾಹಿತಿ ಕೇಂದ್ರ ಹಾಗೂ ಸೈನ್ಸ್ ಪಾರ್ಕ್ ನಿರ್ಮಿಸಲು ಪ್ಲಾನ್ ರೂಪಿಸಲಾಗಿದೆ. ಮಕ್ಕಳಲ್ಲಿ ವಿಜ್ಞಾನದ ಬಗ್ಗೆ ಅರಿವು ಮೂಡಿಸುವ ಉದ್ದೇಶದಿಂದ ಇಲ್ಲಿ ಸೈನ್ಸ್ ಪಾರ್ಕ್ ನಿರ್ಮಿಸಲು ಉದ್ದೇಶಿಸಲಾಗಿದೆ. ಇಂದಿನ ವಾತಾವರಣ ಬದಲಾವಣೆ ಜೊತೆಗೆ ಗ್ಯಾಲಕ್ಸಿ, ನಕ್ಷತ್ರ ಮಂಡಲ, ಸೋಲಾರ್ ಸಿಸ್ಟಮ್ ವ್ಯವಸ್ಥೆ ಸೇರಿದಂತೆ ವೈಜ್ಞಾನಿಕ ಜಗತ್ತಿನ ಸಮಗ್ರ ಮಾಹಿತಿಯನ್ನು ನೀಡುವ ಉದ್ದೇಶ ಹೊಂದಲಾಗಿದೆ.