ಶಿಕಾರಿಪುರ ಕ್ಷೇತ್ರ ಪರ್ಯಟನೆ: ಯಡಿಯೂರಪ್ಪ ಬಳಿಕ "ಶಿಕಾರಿ" ಮಾಡ್ತಾರಾ ಪುತ್ರ ವಿಜಯೇಂದ್ರ?

ಮಾಜಿ ಸಿಎಂ ಬಿ.ಎಸ್.ಯಡಿಯೂರಪ್ಪ ಅವರು ಚುನಾವಣಾ ರಾಜಕೀಯದಿಂದ ನಿವೃತ್ತಿ ಹೊಂದಿದ್ದು ಅವರು ಪ್ರತಿನಿಧಿಸುವ ಶಿಕಾರಿಪುರ ಕ್ಷೇತ್ರಕ್ಕೆ ಪುತ್ರ ವಿಜಯೇಂದ್ರ ಅವರನ್ನು ಕಣಕ್ಕಿಳಿಸುವ ಸಾಧ್ಯತೆ ಇದೆ. ಬಿಜೆಪಿ ಕಾರ್ಯಕರ್ತರು ಕೂಡ ಈಗಾಗಲೇ ಪ್ರಚಾರ ಆರಂಭಿಸಿದ್ದಾರೆ.

ಶಿವಮೊಗ್ಗ:ಮಾಜಿ ಮುಖ್ಯಮಂತ್ರಿ, ಬಿಜೆಪಿ ಹಿರಿಯ ನಾಯಕ, ಲಿಂಗಾಯತ ಸಮುದಾಯದ ಪ್ರಚಂಡ ನಾಯಕ, ರಾಜಕೀಯ ಕ್ಷೇತ್ರದ ಅವಿರತ ಹೋರಾಟಗಾರ.. ಇಷ್ಟೆಲ್ಲಾ ಬಣ್ಣನೆಗೆ ಒಳಗಾಗಿರುವ ಬಿ.ಎಸ್. ಯಡಿಯೂರಪ್ಪ ಅವರ ಕ್ಷೇತ್ರ ಶಿಕಾರಿಪುರ ಈ ಚುನಾವಣೆಯ ಪ್ರಮುಖ ಆಕರ್ಷಣೆ. ಕಾರಣ ಅವರು ಚುನಾವಣಾ ರಾಜಕೀಯದಿಂದ ನಿವೃತ್ತರಾಗಿದ್ದು, ಪುತ್ರ ಬಿ.ವೈ​. ವಿಜಯೇಂದ್ರ ಅವರು ಕಣಕ್ಕಿಳಿಯುವ ಸಾಧ್ಯತೆ ಇದೆ. ಬಿಜೆಪಿ ಈ ಬಗ್ಗೆ ಯಾವುದೇ ಅಧಿಕೃತ ಪ್ರಕಟಣೆ ಮಾಡದೇ ಇರುವುದು ಇನ್ನಷ್ಟು ಬಿಸಿ ಹೆಚ್ಚಿಸಿದೆ.

ಶಿಕಾರಿಪುರ ಕ್ಷೇತ್ರ ಬಿಜೆಪಿ ಮತ್ತು ಕಾಂಗ್ರೆಸ್​ಗೆ ಮಹತ್ವದ್ದಾಗಿವೆ. ಶಿಕಾರಿಪುರ ಉಳಿಸಿಕೊಳ್ಳಬೇಕು ಎಂದು ಬಿಜೆಪಿ ಪ್ರಯತ್ನಪಟ್ಟರೆ, ತಮ್ಮ ತೆಕ್ಕೆಗೆ ತೆಗೆದು ಕೊಳ್ಳಬೇಕು ಎಂದು ಕಾಂಗ್ರೆಸ್ ಪಣ ತೊಟ್ಟಿದೆ. ಈ ಬಾರಿ ಬಿಜೆಪಿ ಹಿರಿಯ ನಾಯಕ ಬಿ.ಎಸ್.ಯಡಿಯೂರಪ್ಪ ಅವರು ಸ್ಪರ್ಧಿಸಲು, ಈ ಸ್ಥಾನಕ್ಕೆ ರಾಜ್ಯ ಬಿಜೆಪಿ ಉಪಾಧ್ಯಕ್ಷ, ಪುತ್ರ ಬಿ.ವೈ. ವಿಜಯೇಂದ್ರ ಸ್ಪರ್ಧೆ ಮಾಡುತ್ತಾರೆ ಎಂದು ಹೇಳಿ, ನಂತರ ಪಕ್ಷದ ತೀರ್ಮಾನದ ಅಂತಿಮ ಎಂದಿದ್ದರು.

ಶಿಕಾರಿಪುರ ಕ್ಷೇತ್ರವನ್ನು ಯಡಿಯೂರಪ್ಪ ಕಳೆದ 40 ವರ್ಷಗಳಿಂದ ಪ್ರತಿನಿಧಿಸುತ್ತಾ ಬಂದಿದ್ದಾರೆ. ಯಡಿಯೂರಪ್ಪ ಅವರ ರಾಜಕೀಯ ಜೀವನ ಶುರುವಾಗಿದ್ದೇ ಇಲ್ಲಿಂದ. ಪುರಸಭೆಯ ಸದಸ್ಯ, ಅಧ್ಯಕ್ಷ, ಶಾಸಕ, ಉಪ ಮುಖ್ಯಮಂತ್ರಿ ಹಾಗೂ ಮುಖ್ಯಮಂತ್ರಿಯಾಗಿ ಅಧಿಕಾರ ನಡೆಸಿದ ಯಡಿಯೂರಪ್ಪ ಅವರು ಈ ಬಾರಿ ಶಿಕಾರಿಪುರ ಕ್ಷೇತ್ರವನ್ನು ಮಗನಿಗೆ ಬಿಟ್ಟು‌ಕೊಡುವ ಮಾತನ್ನು ಆಡಿದ್ದಾರೆ.

ಶಿಕಾರಿಪುರ ಕ್ಷೇತ್ರ ಮಾಹಿತಿ

ಶಿಕಾರಿಪುರದಲ್ಲಿ 5 ಬಾರಿ ಕಾಂಗ್ರೆಸ್, ಒಮ್ಮೆ ಸೋಷಿಯಲಿಸ್ಟ್ ಪಾರ್ಟಿ ಹಾಗೂ 9 ಬಾರಿ ಬಿಜೆಪಿ ಜಯ ಗಳಿಸಿದೆ. ಕೆಜೆಪಿ ಒಂದು ಬಾರಿ ಜಯಿಸಿದೆ. ಪಕ್ಷದಲ್ಲಿನ ಸಂಘರ್ಷದಿಂದಾಗಿ ಬಿಜೆಪಿ ಕರ್ನಾಟಕ ಜನತಾ ಪಕ್ಷ(ಕೆಜೆಪಿ)ದ ಚಿಹ್ನೆಯಡಿ ಯಡಿಯೂರಪ್ಪ ಅವರೇ ಸ್ಪರ್ಧಿಸಿ ಇಲ್ಲಿ ಜಯ ಗಳಿಸಿದ್ದರು.

ಹಿಂದುಳಿದ ಅಣೆಪಟ್ಟಿ ಅಳಿಸಿದ ಬಿಎಸ್​ವೈ:ಶಿಕಾರಿಪುರ ತಾಲೂಕು ನಂಜುಂಡಪ್ಪ ವರದಿಯ ಪ್ರಕಾರ, ಅತ್ಯಂತ ಹಿಂದುಳಿದ ತಾಲೂಕು ಎಂಬ ಹಣೆಪಟ್ಟಿ ಕಟ್ಟಿಕೊಂಡಿತ್ತು. ಯಡಿಯೂರಪ್ಪನವರು ಮುಖ್ಯಮಂತ್ರಿಯಾದ ಮೇಲೆ ಶಿಕಾರಿಪುರವನ್ನು ಜಿಲ್ಲಾ ಕೇಂದ್ರಕ್ಕೆ ಕಡಿಮೆ ಇಲ್ಲದಂತೆ ಅಭಿವೃದ್ದಿ ಮಾಡಿದ್ದಾರೆ. ಜಿಲ್ಲಾ ಕೇಂದ್ರದ ಎಲ್ಲಾ ಸೌಕರ್ಯವನ್ನು ಶಿಕಾರಿಪುರಕ್ಕೆ ನೀಡಿದ್ದಾರೆ. ತಾಲೂಕು ಆಡಳಿತ ಭವನ, ತಾಲೂಕು ಆಸ್ಪತ್ರೆಯನ್ನು ಮೇಲ್ದರ್ಜೆಗೇರಿಸಿದರು.

ರಸ್ತೆಗಳ ಅಗಲಿಕರಣ, ಮನೆ ಮನೆಗೆ ಕುಡಿಯುವ ನೀರು. ರೈಲು ಮಾರ್ಗ ತರುವ ಯತ್ನ ಕೂಡ ಮಾಡಿದರು. ಇದರಿಂದ ಶಿಕಾರಿಪುರ ಸಾಕಷ್ಟು ಅಭಿವೃದ್ದಿಯಾಗಿದೆ. ಕಳೆದ ವರ್ಷ ತಾಲೂಕಿನಲ್ಲಿ ಏತನೀರಾವರಿ ಯೋಜನೆ ಜಾರಿಗೊಳಿಸಿದ್ದಾರೆ. ಇದರಿಂದ ನೂರಾರು ಕೆರೆ ತುಂಬಿದೆ. ಬಿಜೆಪಿ ಕಾರ್ಯಕರ್ತರು ಯಡಿಯೂರಪ್ಪ ಅವರ ಪುತ್ರ ವಿಜಯೇಂದ್ರ ಅವರನ್ನು ಗೆಲ್ಲಿಸುವ ಪಣ ತೊಟ್ಟಿದ್ದಾರೆ.

ಕಳೆದ ಚುನಾವಣೆಯಲ್ಲಿ ಕಾಂಗ್ರೆಸ್ ಬಿಜೆಪಿಯನ್ನು ಸೋಲಿಸಲು ಸಾಕಷ್ಟು ಪ್ರಯತ್ನ ನಡೆಸಿತ್ತು. ಸಿದ್ದರಾಮಯ್ಯನವರು ತಮ್ಮ ಅಭಿವೃದ್ದಿ ಕಾರ್ಯಕ್ರಮಗಳ ಮೂಲಕ ಕ್ಷೇತ್ರದ ಜನರ ಮನಗೆದ್ದು ಚುನಾವಣೆ ನಡೆಸಿದ್ದರು. ಬಿಜೆಪಿಯನ್ನು ಸೋಲಿಸಲು ಸಿದ್ದರಾಮಯ್ಯ ಆದಿಯಾಗಿ ಎಲ್ಲಾ ಮಂತ್ರಿಗಳು ಶಿಕಾರಿಪುರ ಕ್ಷೇತ್ರದಲ್ಲಿ ಠಿಕಾಣಿ ಹಾಕಿ ಮತದಾರರ ಮನಗೆಲ್ಲುವ ಪ್ರಯತ್ನ ನಡೆಸಿದ್ದರು. ಶಿಕಾರಿಪುರದಲ್ಲಿ ಕಾಂಗ್ರೆಸ್​ನ ಸಂಪ್ರದಾಯಿಕ ಮತಗಳನ್ನು ಮತ್ತೆ ಕ್ರೋಢೀಕರಿಸುವ ಯತ್ನವನ್ನು ಚುನಾವಣೆಯಲ್ಲಿ ಮಾಡಲಾಗಿತ್ತು. ಕ್ಷೇತ್ರದಲ್ಲಿ ಕಾಂಗ್ರೆಸ್​ಗೆ ಸಾಂಪ್ರದಾಯಿಕವಾಗಿ ಕನಿಷ್ಠ 50 ಸಾವಿರ ಮತಗಳಿವೆ.

ಕಾಂಗ್ರೆಸ್​ನ ಆಕಾಂಕ್ಷಿಗಳು:ನಗರ ಮಹಾದೇವಪ್ಪ, ಶಿಕಾರಿಪುರ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಗೋಣಿ ಮಾಲತೇಶ್, ಬ್ಲಾಕ್ ಕಾಂಗ್ರೆಸ್ ಕಾರ್ಯದರ್ಶಿ ಭಂಡಾರಿ ಮಾಲತೇಶ್ ಹಾಗೂ ಶಿಕಾರಿಪುರ ಯುವ ಕಾಂಗ್ರೆಸ್​ನ ದರ್ಶನ್ ಉಳ್ಳಿ, ನಾಗರಾಜ ಗೌಡ ಚುನಾವಣಾ ಆಕಾಂಕ್ಷಿಗಳಾಗಿದ್ದಾರೆ.

ಮನು ಬಳಿಗಾರ್ ಜೆಡಿಎಸ್ ಅಭ್ಯರ್ಥಿ?:ಕಳೆದ ಎರಡು ಚುನಾವಣೆಯಲ್ಲಿ ಜೆಡಿಎಸ್​ನಿಂದ ಸ್ಪರ್ಧೆ ಮಾಡಿದ್ದ ಮಾಜಿ ಅಧಿಕಾರಿ ಹೆಚ್.ಟಿ.ಬಳಿಗಾರ್ ಅವರು ಈಗ ಬಿಜೆಪಿ ಸೇರ್ಪಡೆಯಾಗಿದ್ದಾರೆ. ಕಳೆದ ಎರಡು ಚುನಾವಣೆಯಲ್ಲಿ 13 ಸಾವಿರ ಮತಗಳನ್ನು ಪಡೆದುಕೊಂಡಿದ್ದರು. ಇದರಿಂದ ಯಡಿಯೂರಪ್ಪನವರು ಚುನಾವಣೆಗೂ ಮುನ್ನವೇ ಹೆಚ್.ಟಿ. ಬಳಿಗಾರ್​ರನ್ನು ಬಿಜೆಪಿ ಸೇರಿಸಿಕೊಂಡಿದ್ದಾರೆ. ಇದರಿಂದ ಬಿಜೆಪಿಗೆ ಹೆಚ್.ಟಿ. ಬಳಿಗಾರ್ ಮತಗಳು ಬರಲಿವೆ ಎಂಬ ಲೆಕ್ಕಾಚಾರ. ಹೆಚ್.ಟಿ.ಬಳಿಗಾರ್ ಬಿಜೆಪಿಗೆ ಸೇರ್ಪಡೆಯಾದ ನಂತರ ಜೆಡಿಎಸ್​ನಿಂದ ಮನು ಬಳಿಗಾರ್ ಸ್ಪರ್ಧೆ ಮಾಡುವ ಸಾಧ್ಯತೆಗಳಿವೆ.

ಬಿಜೆಪಿ- ಕಾಂಗ್ರೆಸ್ ನೇರ ಹಣಾಹಣಿ:ಶಿಕಾರಿಪುರ ಕ್ಷೇತ್ರದಲ್ಲಿ ಬಿಜೆಪಿ ಹಾಗೂ ಕಾಂಗ್ರೆಸ್ ನಡುವೆ ನೇರ ಹಣಾಹಣಿ ನಡೆಸಲಿವೆ. 1983 ರಲ್ಲಿ ಯಡಿಯೂರಪ್ಪ ಪ್ರಥಮ‌ ಬಾರಿ ಶಾಸಕರಾಗಿ ಆಯ್ಕೆಯಾದರು. ಅಲ್ಲಿಂದ ಅವರು ತಿರುಗಿ ನೋಡಿಯೇ ಇಲ್ಲ. 1999 ರಲ್ಲಿ ಶಿರಾಳಕೊಪ್ಪದ ಮಹಾಲಿಂಗಪ್ಪ ಅವರ ವಿರುದ್ದ ಒಮ್ಮೆ ಸೋಲನುಭವಿಸಿದ್ದರು.

ಶಿಕಾರಿಪುರ ಕ್ಷೇತ್ರದ ಹಿನ್ನೆಲೆ:ಶಿಕಾರಿಪುರ ಕ್ಷೇತ್ರ 1952 ರಲ್ಲಿ ಸೊರಬವನ್ನು ಒಳಗೊಂಡ ಕ್ಷೇತ್ರವಾಗಿತ್ತು. ಆಗ ಕಾಂಗ್ರೆಸ್​ನ ಹೆಚ್.ಸಿದ್ದಯ್ಯನವರು ಜಯಗಳಿಸಿದ್ದರು. ನಂತರ 1962 ರಲ್ಲಿ ಕ್ಷೇತ್ರ ಎಸ್​ಸಿ ಮೀಸಲು ಕ್ಷೇತ್ರವಾಗಿತ್ತು. ಆಗ ಕಾಂಗ್ರೆಸ್​ನ ವೀರಪ್ಪ ಗೆದ್ದಿದ್ದರು. 1967 ರಲ್ಲಿ ಸೋಷಿಯಲಿಸ್ಟ್ ಪಾರ್ಟಿಯಿಂದ ಜಿ.ಬಸವಣ್ಯಪ್ಪ ಜಯಿಸಿದ್ದರು.

1972 ರಲ್ಲಿ ಕಾಂಗ್ರೆಸ್​ನಿಂದ ಯಂಕಟಪ್ಪ ಜಯಗಳಿಸಿದ್ದರು. 1978 ರಲ್ಲಿ ಸಾಮಾನ್ಯ ಕ್ಷೇತ್ರವಾಗಿ ಮಾರ್ಪಟ್ಟಿತು. ಆಗ ಪುನಃ ಯಂಕಟಪ್ಪ ಜಯಗಳಿಸಿದರು. 1983 ರಲ್ಲಿ ಯಡಿಯೂರಪ್ಪನವರು ಮಂತ್ರಿಯಾಗಿದ್ದ ಯಂಕಟಪ್ಪರನ್ನು 22,183 ಮತಗಳಿಂದ ಸೋಲಿಸಿದರು. 1999 ರಲ್ಲಿ ಯಡಿಯೂರಪ್ಪನವರು ಕಾಂಗ್ರೆಸ್​ನ ಮಹಾಲಿಂಗಪ್ಪನವರ ವಿರುದ್ದ ಸೋಲು ಅನುಭವಿಸಿದರು. 2013 ರಲ್ಲಿ ಯಡಿಯೂರಪ್ಪನವರು ತಾವೇ ಕಟ್ಟಿದ ಕೆಜೆಪಿ ಪಕ್ಷದಿಂದ ಸ್ಪರ್ಧಿಸಿ ಗೆದ್ದರು. 2014ರಲ್ಲಿ ಬಿಎಸ್​ವೈ ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಿ, ಸಂಸದ ಸ್ಥಾನಕ್ಕೆ ಸ್ಪರ್ಧಿಸಿದ ಕಾರಣ ನಡೆದ ಉಪ ಚುನಾವಣೆಯಲ್ಲಿ ಬಿ.ವೈ.ರಾಘವೇಂದ್ರ ಅವರು ಗೆದ್ದರು. 2018 ರ ಚುನಾವಣೆಯಲ್ಲಿ ಪುನಃ ಯಡಿಯೂರಪ್ಪ ಅವರು ಗೆಲುವು ಕಂಡರು.

ಮತದಾರರ ವಿವರ: ಶಿಕಾರಿಪುರ ಕ್ಷೇತ್ರದಲ್ಲಿ ಒಟ್ಟು 1,96,729 ಮತದಾರರಿದ್ದಾರೆ. ಇದರಲ್ಲಿ 99,145 ಪುರುಷರಿದ್ದರೆ, 97,584 ಮಹಿಳಾ ಮತದಾರರಿದ್ದಾರೆ. ಇಲ್ಲಿ ಲಿಂಗಾಯತ ಮತಗಳೇ ಹೆಚ್ಚಾಗಿವೆ.

ಇದನ್ನೂ ಓದಿ:ರಣದೀಪ್ ಸಿಂಗ್ ಸುರ್ಜೇವಾಲಾ ಇತಿಹಾಸ ಓದಬೇಕು: ಸಿಎಂ ಬೊಮ್ಮಾಯಿ