ಭದ್ರಾವತಿ: ರೌಡಿ ಶೀಟರ್ ಶಾರೂಕ್ ಕೊಲೆ ಶಂಕೆ

ರೌಡಿ ಶೀಟರ್ ಶಾರೂಕ್ ನಿನ್ನೆ ತನ್ನದೇ ಏರಿಯಾದ ಹುಡುಗರ ಜೊತೆ‌ ಜಗಳ ಮಾಡಿಕೊಂಡಿದ್ದ. ಸದ್ಯ ಆತನ ಮನೆ ಬಳಿಯ ಖಾಲಿ ನಿವೇಶನದಲ್ಲಿ ಶವ ಪತ್ತೆಯಾಗಿದ್ದು, ಸ್ಥಳೀಯ ಹುಡುಗರು ಶಾರೂಕ್​​ನನ್ನು ಕೊಲೆ ಮಾಡಿರುವ ಶಂಕೆ ವ್ಯಕ್ತವಾಗಿದೆ.

ಶಿವಮೊಗ್ಗ: ಭದ್ರಾವತಿಯ ಹೊಸಮನೆ ಬಡಾವಣೆಯ ಹನುಮಂತನಗರದ ನಿವಾಸಿಯಾಗಿದ್ದ ರೌಡಿ ಶೀಟರ್ ಶಾರೂಕ್​​ನ ಮೃತದೇಹ ಆತನ ಮನೆ ಬಳಿ ಪತ್ತೆಯಾಗಿದ್ದು, ಕೊಲೆ ಶಂಕೆ ವ್ಯಕ್ತವಾಗಿದೆ.

ರೌಡಿ ಶೀಟರ್ ಶಾರೂಕ್​​ನ ತಲೆ ಭಾಗಕ್ಕೆ ಹೊಡೆದಿದ್ದು, ಆತನ ಮನೆ ಬಳಿಯ ಖಾಲಿ ನಿವೇಶನದಲ್ಲಿ ಶವವಾಗಿ ಬಿದ್ದಿದ್ದಾನೆ. ಶಾರೂಕ್ ಭದ್ರಾವತಿಯಲ್ಲಿ ಕಳ್ಳತನ, ಗಾಂಜಾ‌ ಮಾರಾಟ, ಬೆದರಿಸಿ ಹಣ ಕೀಳುವುದು ಸೇರಿದಂತೆ ಹಲವು ಪ್ರಕರಣಗಳಲ್ಲಿ ಭಾಗಿಯಾಗಿ ಪೊಲೀಸ್​ ಲಿಸ್ಟ್​ನಲ್ಲಿ ರೌಡಿ‌ ಶೀಟರ್ ಆಗಿದ್ದ.

ಈತ ನಿನ್ನೆ ತನ್ನದೇ ಏರಿಯಾದ ಹುಡುಗರ ಜೊತೆ‌ ಜಗಳ ಮಾಡಿಕೊಂಡಿದ್ದ. ಪ್ರತಿಯಾಗಿ ಸ್ಥಳೀಯ ಹುಡುಗರು ಶಾರೂಕ್​​ನನ್ನು ಕೊಲೆ ಮಾಡಿರುವ ಶಂಕೆ ವ್ಯಕ್ತವಾಗಿದೆ. ಶಾರೂಕ್​​ ಈ ಹಿಂದೆ ಮದುವೆಯಾಗಿ ಹೆಂಡತಿಯನ್ನು ಬಿಟ್ಟಿದ್ದು, ಸದ್ಯ ಮಗನನ್ನು ಕಳೆದುಕೊಂಡ ತಾಯಿಯ ಆಕ್ರಂದನ ಮುಗಿಲು ಮುಟ್ಟಿತ್ತು.

ಹೊಸಮನೆ ಪೊಲೀಸ್‌ ಠಾಣಾ ವ್ಯಾಪ್ತಿಯಲ್ಲಿ ಈ ಪ್ರಕರಣ ನಡೆದಿದೆ.