ತೋಟ ಕಾಯಲು ಹೋದಾಗ ದುರಂತ: ತನ್ನದೇ ಬಂದೂಕಿನ ಗುಂಡೇಟಿಗೆ ವ್ಯಕ್ತಿ ಬಲಿ

ತೋಟ ಕಾಯಲು ಹೋದಾಗ ಗುಂಡು ತಗುಲಿ ವ್ಯಕ್ತಿ ಮೃತಪಟ್ಟ ಘಟನೆ ಶಿವಮೊಗ್ಗದಲ್ಲಿ ನಡೆದಿದೆ.

ಶಿವಮೊಗ್ಗ:ಕಾಡು ಪ್ರಾಣಿಗಳ ಹಾವಳಿ ಹಿನ್ನೆಲೆಯಲ್ಲಿ ತೋಟ ಕಾಯಲು ಹೋದ ವ್ಯಕ್ತಿ ಆಕಸ್ಮಿಕವಾಗಿ ಜಾರಿ ಬಿದ್ದು, ತನ್ನ ಬಂದೂಕಿನಿಂದಲೇ ಸಿಡಿದ ಗುಂಡಿನಿಂದ ಪ್ರಾಣ ಕಳೆದುಕೊಂಡ ದಾರುಣ ಘಟನೆ ಜಿಲ್ಲೆಯ ಹೊಸನಗರ ತಾಲೂಕಿನ ರಾವೆಯ ನೇಗಿಲೋಣಿ ಗ್ರಾಮದಲ್ಲಿ ಶನಿವಾರ ರಾತ್ರಿ ನಡೆದಿದೆ.

ರಾವೆಯ ನೇಗಿಲೋಣಿಯ ನಿವಾಸಿ ಅಂಬರೀಷ (30) ಮೃತ ವ್ಯಕ್ತಿ. ಇವರು ಕಳೆದ ರಾತ್ರಿ ತಮ್ಮ ತೋಟಕ್ಕೆ ಕಾಡು ಪ್ರಾಣಿಗಳು ನುಗ್ಗುತ್ತವೆಂದು ನಾಡ ಬಂದೂಕು ತೆಗೆದುಕೊಂಡು ತನ್ನ ಸ್ನೇಹಿತ ಕೀರ್ತಿ ಹಾಗೂ ಅಭಿಷೇಕರೊಂದಿಗೆ ತೆರಳಿದ್ದರು. ತೋಟದಲ್ಲಿದ್ದ ಕಾಡುಕೋಣಗಳನ್ನು ಓಡಿಸಿ ಮೂವರೂ ವಾಪಸ್ ಹೊರಟಿದ್ದರು.

ಈ ವೇಳೆ ಬಂಡೆ ಮೇಲಿಂದ ಇಳಿಯುವಾಗ ಅಂಬರೀಷ ಕಾಲು ಜಾರಿ ಬಿದ್ದಿದ್ದಾರೆ. ಆಗ ಬಂದೂಕಿನಿಂದ ಗುಂಡು ಸಿಡಿದು ಅವರ ಎದೆ ಕೆಳಭಾಗಕ್ಕೆ ತಗುಲಿದೆ. ತೀವ್ರ ರಕ್ತಸ್ರಾವದಿಂದ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ. ಬಂದೂಕನ್ನು ನಿರ್ಲಕ್ಷ್ಯತನದಿಂದ ಹಿಡಿದುಕೊಂಡಿರುವುದೇ ಘಟನೆಗೆ ಕಾರಣ ಎನ್ನಲಾಗುತ್ತಿದೆ. ಈ ಬಗ್ಗೆ ಮೃತನ ಸಹೋದರಿ ಶಿವಮೊಗ್ಗ ನಗರ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾರೆ.

ಇದನ್ನೂ ಓದಿ:ಪೊಲೀಸ್ ಮೇಲೆ ಹಲ್ಲೆಗೆ ಯತ್ನ: ಮಂಗಳೂರಲ್ಲಿ ಆರೋಪಿಗೆ ಖಾಕಿ ಗುಂಡೇಟು