ಶಿಕ್ಷಕರ ನೇಮಕಾತಿಗೆ ತಡೆ: ನ್ಯಾಯಾಲಯದಲ್ಲೇ ಹೋರಾಟ- ಸಚಿವ ಮಧು ಬಂಗಾರಪ್ಪ

ಶಿಕ್ಷಕರ ನೇಮಕಾತಿಗೆ ಸುಪ್ರೀಂ ಕೋರ್ಟ್ ತಡೆ ನೀಡಿದ್ದು, ಮುಂದಿನ ನಿರ್ಧಾರಗಳೇನು ಎಂಬ ಕುರಿತು ಶಿಕ್ಷಣ ಸಚಿವ ಮಧು ಬಂಗಾರಪ್ಪ ಮಾತನಾಡಿದರು.

ಶಿವಮೊಗ್ಗ:''ರಾಜ್ಯದಲ್ಲಿ ನಡೆದಿದ್ದ‌ 13 ಸಾವಿರ ಶಿಕ್ಷಕರ ನೇಮಕಾತಿಗೆ ಸುಪ್ರೀಂ ಕೋರ್ಟ್ ತಡೆ ನೀಡಿದ್ದು, ಈ ಬಗ್ಗೆ ನ್ಯಾಯಾಲಯದಲ್ಲಿಯೇ ಹೋರಾಟ ಮಾಡಲಾಗುವುದು'' ಎಂದು ಶಿಕ್ಷಣ ಸಚಿವ ಮಧು ಬಂಗಾರಪ್ಪ ತಿಳಿಸಿದರು.

ಶಿವಮೊಗ್ಗದಲ್ಲಿ ಶುಕ್ರವಾರ ಮಾಧ್ಯಮದವರ ಜೊತೆಗೆ ಮಾತನಾಡಿದ ಅವರು, ''ಸುಪ್ರೀಂ ಕೋರ್ಟ್​ನಿಂದ ನಿನ್ನೆಯೇ ಒಂದು ಆದೇಶ ಬಂದಿದೆ. ಈ ಬಗ್ಗೆ ನಿನ್ನೆಯೇ ನಮ್ಮ ಇಲಾಖೆ ಅಧಿಕಾರಿಗಳ ಜೊತೆ ಸಭೆ ನಡೆಸಿದ್ದೇನೆ. ಆದೇಶದ ಕುರಿತು ಸಮಗ್ರವಾಗಿ ಚರ್ಚೆ ನಡೆಸಿ, ನಾವು ಮುಂದುವರೆಯಬೇಕಾದರೆ, ಅಡ್ವೊಕೇಟ್ ಜನರಲ್ ಅವರ ಸಲಹೆ ಬೇಕಾಗುತ್ತದೆ. ನಮ್ಮ ಇಲಾಖೆಯಿಂದ ಅಡ್ವೋಕೇಟ್ ಜನರಲ್ ಅವರಿಗೆ ಪತ್ರ ಬರೆಯಲಾಗಿದೆ. ಈ ಪತ್ರಕ್ಕೆ ಅವರು ಉತ್ತರ ಕೊಡುತ್ತಾರೆ. ಈಗಾಗಲೇ ನಮ್ಮ ಇಲಾಖೆಯಿಂದ ಕೋರ್ಟ್​ಗೆ ಹಿರಿಯ ವಕೀಲರನ್ನು ನೇಮಿಸಿ ಕೇಸ್ ಮುಂದುವರೆಸುವ ಕೆಲಸವನ್ನು ಮಾಡುತ್ತೇವೆ'' ಎಂದರು.

''ಕೋರ್ಟ್ ಬಗ್ಗೆ ನಾವು ಮಾತನಾಡುವಂತಿಲ್ಲ. ಅದು ನ್ಯಾಯಾಲಯದ ನಿಂದನೆ ಮಾಡಿದಂತೆ ಆಗುತ್ತದೆ. ಇದರಿಂದ ನಾವು ಕೋರ್ಟ್​ನಲ್ಲಿ ಹೋರಾಟ ನಡೆಸಬೇಕು. ನಾವು ನ್ಯಾಯಕ್ಕಾಗಿ ಕೋರ್ಟ್​ನಲ್ಲಿಯೇ ಹೋರಾಟ ನಡೆಸಬೇಕು'' ಎಂದು ಹೇಳಿದರು.

ಇದನ್ನೂ ಓದಿ:ನೈಸ್ ಯೋಜನೆಯನ್ನು ಸರ್ಕಾರ ವಶಕ್ಕೆ ಪಡೆಯಬೇಕು: ಹೆಚ್.ಡಿ.ದೇವೇಗೌಡ