ನೂರಕ್ಕೆ ನೂರರಷ್ಟು ನಾನು ರಾಜೀನಾಮೆ ಕೊಡುವುದಿಲ್ಲ; ಸಚಿವ ಈಶ್ವರಪ್ಪ

ಡೆತ್ ನೋಟ್ ಇಲ್ಲದೆ ಆಧಾರ ರಹಿತವಾಗಿ ಈ ರೀತಿ ಆರೋಪ ಮಾಡುತ್ತಿದ್ದಾರೆ. ರಾಜಕಾರಣದಲ್ಲಿ ಮಾತನಾಡುವವರಿಗೆ ತಕ್ಕ ಉತ್ತರ ನೀಡಲಾಗಿದೆ. ಸಂತೋಷ್ ಮೃತಪಟ್ಟಿರುವುದಕ್ಕೆ ರಾಜೀನಾಮೆ ನೀಡುವ ಪ್ರಶ್ನೆಯೇ ಇಲ್ಲ. ಇದೊಂದು ಷಡ್ಯಂತ್ರ. ಇದರ ಹಿಂದೆ ಯಾರಿದ್ದಾರೆ ಅನ್ನೋದು ತನಿಖೆ ಆಗಬೇಕು. ವಾಟ್ಸಪ್​​ನಲ್ಲಿ ಟೈಪಿಂಗ್ ಯಾರು ಮಾಡಿದ್ರು ಅಂತಲೂ ಬಹಿರಂಗ ಆಗಬೇಕಿದೆ ಎಂದು ಸಚಿವ ಈಶ್ವರಪ್ಪ ಹೇಳಿದರು.

ಶಿವಮೊಗ್ಗ:ನಾನು ಯಾವುದೆ ತಪ್ಪು ಮಾಡಿಲ್ಲ. ನಾನು ನೂರಕ್ಕೆ ನೂರು ರಾಜಿನಾಮೆ ನೀಡುವುದಿಲ್ಲ ಎಂದು ಸಚಿವ ಕೆ.ಎಸ್.ಈಶ್ವರಪ್ಪ ಸ್ಪಷ್ಟಪಡಿಸಿದ್ದಾರೆ.‌ ಶಿವಮೊಗ್ಗದಲ್ಲಿ ಸುದ್ದಿಗೋಷ್ಟಿ ನಡೆಸಿ ಮಾತನಾಡಿದ ಅವರು, ಕಾನೂನು ಬಾಹಿರವಾಗಿ ನಮ್ಮ ಇಲಾಖೆಯಲ್ಲಿ ನಡೆದ ವಿಚಾರಕ್ಕೆ ಕಾಂಗ್ರೆಸ್ ನಾಯಕರು ನನ್ನ ರಾಜೀನಾಮೆ ಕೇಳುತ್ತಿದ್ದಾರೆ. ಸಂತೋಷ್ ಪಾಟೀಲ್ ಡೆತ್ ನೋಟ್ ಬರೆದಿಲ್ಲ. ವಿನಾ ಕಾರಣ ಅವರು ನನ್ನ ರಾಜೀನಾಮೆ ಕೇಳುತ್ತಿದ್ದಾರೆ. ಆದರೆ, ರಾಜ್ಯದ ಎಲ್ಲಾ ಕಡೆಯಿಂದ ನನಗೆ ಪೋನ್ ಮಾಡಿ ರಾಜೀನಾಮೆ ನೀಡಬೇಡಿ ಎಂದು ಹೇಳುತ್ತಿದ್ದಾರೆ ಎಂದರು.

ಈ ರೀತಿ ಹಣ ಬಿಡುಗಡೆ ಮಾಡಿದ್ದಾರಾ?: ನಮ್ಮ ಇಲಾಖೆಯಲ್ಲಿ ಕೆಲಸ ಮಾಡಬೇಕಾದರೆ ವರ್ಕ್ ಆರ್ಡರ್, ಆಡಳಿತಾತ್ಮಕ ಅನುಮೋದನೆ ನಿಯಮದ ಪ್ರಕಾರವೇ ನಡೆಯಬೇಕು. ಡಿಕೆ ಶಿವಕುಮಾರ್​ ಮತ್ತು ಸಿದ್ದರಾಮಯ್ಯ ಸೇರಿದಂತೆ ಕಾಂಗ್ರೆಸ್​​ನ ಕೆಲವು​ ನಾಯಕರು ಸಂತೋಷ್​​ ಡೆತ್​ ನೋಟ್​ ಬರೆದಿದ್ದಾರೆ ಎಂದು ಸುಳ್ಳು ಸುದ್ದಿ ಹಬ್ಬಿಸುತ್ತಿದ್ದಾರೆ. ಆ ಬಗ್ಗೆ ತನಿಖೆಯಾಗಲಿ. ಆದರೆ, ಸರ್ಕಾರದ ನಿಯಮಾವಳಿ ಮುಗಿದ ಬಳಿಕವೇ ಹಣ ಬಿಡುಗಡೆ ಮಾಡುವುದು ಪದ್ಧತಿ. ಈ ಪದ್ಧತಿ ಇಲ್ಲದೇ ಕಾನೂನನ್ನು ಗಾಳಿಗೆ ತೂರಿ ಹಣ ಬಿಡುಗಡೆ ಮಾಡಲು ಬರುವುದಿಲ್ಲ. ಇವತ್ತು ಆರೋಪ ಮಾಡುತ್ತಿರುವ ವಿರೋಧ ಪಕ್ಷದವರು ಈ ಹಿಂದೆ ಯಾರಾದರೂ ಈ ರೀತಿ ಹಣ ಬಿಡುಗಡೆ ಮಾಡಿದ್ದಾರಾ? ಎಂದು ಪ್ರಶ್ನಿಸಿದರು.

ವಾಟ್ಸಪ್​​ನಲ್ಲಿ ಟೈಪ್:ಗಣಪತಿ ಭಟ್ ವಿಚಾರದಲ್ಲಿ ನಾವು ರಾಜೀನಾಮೆ ಕೇಳಿದ್ದಕ್ಕೆ ಬಲವಾದ ಕಾರಣವಿದೆ. ಅದನ್ನು ಮುಂದಿಟ್ಟುಕೊಂಡು ಇಂದು ನೀವು ರಾಜೀನಾಮೆ ನೀಡಬೇಕೆಂದು ನನ್ನನ್ನು ಕೇಳುತ್ತಿದ್ದಾರೆ. ಅಂದು ಗಣಪತಿ ಭಟ್ ಡೆತ್ ಬರೆದಿಟ್ಟು ಸಾವನ್ನಪ್ಪಿದ್ದರು. ಆದರೆ, ಇಲ್ಲಿ ವಾಟ್ಸಪ್​​ನಲ್ಲಿ ಟೈಪ್ ಮಾಡಲಾಗಿದೆ. ನಾನು ಸಹ ವಾಟ್ಸಪ್​ನಲ್ಲಿ ಬರೆದರೆ ಅದನ್ನು ನೀವು ಒಪ್ಪುತ್ತಿರಾ? ಸಂತೋಷ್ 80 ಸಲ ನಮ್ಮ ಮನೆಗೆ ಬಂದಿದ್ದಾರೆ ಎಂದು ಹೇಳಿದ್ದಾರೆ. ಆದರೆ, ಅವರು ಒಂದೂ ಸರಿಯೂ ನಮ್ಮ ಮನೆಗೆ ಬಂದಿಲ್ಲ. ಅವರ ಮುಖವನ್ನು ಸಹ ನಾನು ನೋಡಿಲ್ಲ ಎಂದರು.

ಯಾರು ಟಿಕೆಟ್ ಮಾಡಿ ಕೊಟ್ಟಿದ್ದು?ಈಶ್ವರಪ್ಪನವರು ಅಲ್ಲ, ಅವರ ಕಡೆಯವರು ಹಣ ಕೇಳಿದ್ದಾರೆ ಎಂದು ಇವರು ದೆಹಲಿ ತನಕ ಹೋಗಿದ್ದರು. ಇವರಿಗೆ ಯಾರು ಟಿಕೆಟ್ ಮಾಡಿ ಕೊಟ್ಟಿದ್ರು? ಸಂತೋಷ್ ನಡೆಸಿದ ಆರೋಪಕ್ಕೆ ನಮ್ಮ ಕೇಂದ್ರದ ಗ್ರಾಮೀಣಾಭಿವೃದ್ಧಿ ಇಲಾಖೆಯಿಂದ ರಾಜ್ಯದ ಕಚೇರಿಗೆ ಪತ್ರ ಬರೆದಿದ್ದರು. ಇದಕ್ಕೆ ರಾಜ್ಯದಿಂದ ಪತ್ರ ಬರೆದಿದ್ದಾರೆ. ನಮ್ಮ ಇಲಾಖೆಯವರು ಅದಕ್ಕೆ ತಕ್ಕ ಉತ್ತರ ನೀಡಿದ್ದಾರೆ. ಆಡಳಿತ್ಮಾಕವಾಗಿ ಹಣ ಮಂಜೂರು ಮಾಡಿಲ್ಲ ಎಂದು ಹೇಳಿದ್ದಾರೆ ಎಂದು ಈಶ್ವರಪ್ಪ ತಮ್ಮ ಇಲಾಖೆಯ ಕಾರ್ಯ ಪ್ರಕ್ರಿಯೆ ಬಗ್ಗೆ ಮಾಹಿತಿ ನೀಡಿದರು.

ಮಾನನಷ್ಟ ಮೊಕ್ಕದ್ದಮೆ: ನಾನು ಸಂತೋಷ್ ಪಾಟೀಲ್ ಹಾಗೂ ಒಂದು ಖಾಸಗಿ ಚಾನಲ್ ಮೇಲೂ ಸಹ ಮಾನನಷ್ಟ ಮೊಕದ್ದನೆ ಹಾಕಿದ್ದೆ‌. ಕೋರ್ಟ್ ಇಬ್ಬರಿಗೂ ನೋಟಿಸ್ ನೀಡಿದೆ. ಸಂತೋಷ್ ನೋಟಿಸ್​ಗೆ ಹೆದರಿ ಆತ್ಮಹತ್ಯೆ ಮಾಡಿಕೊಂಡಿರಬಹುದು ಎಂಬುದು ನನ್ನ ಅನಿಸಿಕೆ. ಇದರಲ್ಲಿ ನೀತಿ, ನಿಯಮ ಇಲ್ಲದೆ ಹಣ ನೀಡುವ ಪ್ರಶ್ನೆಯೇ ಇಲ್ಲ. ಡೆತ್ ನೋಟ್ ಇಲ್ಲದೆ ಆಧಾರ ರಹಿತವಾಗಿ ಈ ರೀತಿ ಆರೋಪ ಮಾಡುತ್ತಿದ್ದಾರೆ. ರಾಜಕಾರಣದಲ್ಲಿ ಮಾತನಾಡುವವರಿಗೆ ತಕ್ಕ ಉತ್ತರ ನೀಡಲಾಗಿದೆ. ಸಂತೋಷ್ ಮೃತಪಟ್ಟಿರುವುದಕ್ಕೆ ರಾಜೀನಾಮೆ ನೀಡುವ ಪ್ರಶ್ನೆಯೇ ಇಲ್ಲ. ಇದೊಂದು ಷಡ್ಯಂತ್ರ. ಇದರ ಹಿಂದೆ ಯಾರಿದ್ದಾರೆ ಅನ್ನೋದು ತನಿಖೆ ಆಗಬೇಕು. ವಾಟ್ಸಪ್​​ನಲ್ಲಿ ಟೈಪಿಂಗ್ ಯಾರು ಮಾಡಿದ್ರು ಅಂತಲೂ ಬಹಿರಂಗ ಆಗಬೇಕಿದೆ ಎಂದರು.

ಸಿಎಂ ಜೊತೆ ಮಾತನಾಡಿದ್ದೆನೆ:ನಾನು ಈ ವಿಚಾರದಲ್ಲಿ ಸಿಎಂ ಜೊತೆ ಮಾತನಾ‌ಡಿದ್ದೆನೆ. ನಾಡಿದ್ದು ಭೇಟಿ ಮಾಡಿ ದಾಖಲೆ ನೀಡುವೆ. ರಾಜ್ಯಾಧ್ಯಕ್ಷರಿಗೆ ದಾಖಲೆ ನೀಡಿ ಮಾತನಾಡಿದ್ದೆನೆ. ಸಂತೋಷ್ ನಡೆಸಿದ ಕಾಮಗಾರಿಯ ಬಗ್ಗೆ ನಮ್ಮ ಇಲಾಖೆಯ ಪ್ರಧಾನ ಕಾರ್ಯದರ್ಶಿಗೆ ತಿಳಿಸಿರುವೆ. ಅವರು ಬೆಳಗಾವಿಯ ಜಿಪಂ ಸಿಇಓ ಬಳಿ ಮಾಹಿತಿ ಕೇಳಿದ್ದಾರೆ ಎಂದರು.

ನೂರು ಕೇಸ್ ನೋಡಿದ್ದೆನೆ:ಸಂತೋಷ್ ಪಾಟೀಲ್ ಹೇಗೆ ಸತ್ತ ಹಾಗೂ ಇದರ ಹಿಂದೆ ಇರುವ ಷಡ್ಯಂತ್ರದ ಬಗ್ಗೆ ತನಿಖೆ ಆಗಬೇಕು. ಇಂತಹ ನೂರು ಕೇಸ್ ನೋಡಿದ್ದೆನೆ. ಆರೋಪಕ್ಕೆ ಓಡಿ ಹೋಗುವ ವ್ಯಕ್ತಿ ನಾನಲ್ಲ. ನಾನು ಯಾರಿಗೂ ಟಾರ್ಗೆಟ್ ಅಲ್ಲ. ಡೆಡ್ ಬಾಡಿ ಹತ್ತಿರ ಡೆತ್ ನೋಟ್ ಇಲ್ಲ, ಸಹಿ ಇಲ್ಲ, ಟೈಪಿಂಗ್ ಆಗಿರೂದನ್ನು ಯಾರು ನಂಬುತ್ತಾರೆ‌? ಸಿಎಂ ಫೋನ್ ಮಾಡಿ ಈ ಬಗ್ಗೆ ಕೇಳಿದ್ದಾರೆ.‌ ತಲೆ ಕಡೆಸಿಕೊಳ್ಳಬೇಡಿ ಅಂತಲೂ ಹೇಳಿದ್ದಾರೆ. ನನ್ನ ಮೇಲೆ ಆರೋಪ ಮಾಡಿದ್ದಕ್ಕೆ ತಕ್ಕ ಉತ್ತರ ನೀಡಲಾಗುವುದು ಎಂದರು.

ಮುಸ್ಲಿಮರ ಓಟ್​​ನಿಂದ ಕಾಂಗ್ರೆಸ್ ಜೀವ: ಕಾಂಗ್ರೆಸ್​ ನಾಯಕಿ ಆರೋಪಕ್ಕೆ ಪ್ರತಿಕ್ರಿಯೆ ನೀಡಿದ ಅವರು, ಲಕ್ಷ್ಮಿ ಹೆಬ್ಬಾಳಕ್ಕರ್​ಗೆ ತಲೆ ಕಟ್ಟಿದ್ರೆ ನಾನೇನೂ ಮಾಡಲಿ? ಅವರು ವಿನಾ ಕಾರಣ ಆರೋಪ ಮಾಡಿದ್ರೆ ಯಾರು ನಂಬುತ್ತಾರೆ? ಸ್ವತಃ ಹೆಚ್.ಡಿ.ಕುಮಾರಸ್ವಾಮಿ ಅವರು ಸಹ ನನಗೆ ಪೋನ್ ಮಾಡಿ ನಮ್ಮ (ಬಿಜೆಪಿ) ಪಕ್ಷದವರೂ ಅಥವಾ ಬೇರೆಯವರ ಷಡ್ಯಂತ್ರ ಅಂತ ಹೇಳಿದ್ದಾರೆ. ಈ ಬಗ್ಗೆ ಅವರಿಗೆ ಅಭಿನಂದನೆ ಸಲ್ಲಿಸುತ್ತೆನೆ. ಈ ರೀತಿ ಷಡ್ಯಂತ್ರ ಮಾಡಿದ್ರೆ ಯಾರಾದ್ರೂ ಒಪ್ಪುತ್ತಾರಾ? ಎಂದರು.

ಮುಸ್ಲಿಮರನ್ನು ಕಾಂಗ್ರೆಸ್​ನವರು ಯಾವಾಗ ನಡು ನೀರಿನಲ್ಲಿ ಕೈಬಿಡುತ್ತಾರೋ ಗೂತ್ತಿಲ್ಲ. ಆ ಸಮೂದಾಯದ ಹಿರಿಯರಿಗೆ ನಾನು ಕೇಳುತ್ತೆನೆ. ನಾವು ನಿಮಗೆ ಏನ್ ತೂಂದ್ರೆ ಕೊಟ್ಟಿದ್ದೆವೆ? ಹಿಂದೂಗಳ ಮೇಲೆ ಹಲ್ಲೆ ನಡೆಸಿದ್ರು ಸಹ ನಾವು ಸಹಿಷ್ಣುತೆಯಿಂದ ಇದ್ದೆವೆ. ಮುಸ್ಲಿಮರ ಓಟ್​​ನಿಂದ ಕಾಂಗ್ರೆಸ್ ಜೀವ ಉಳಿದುಕೊಂಡಿದೆ ಎಂದು ಕಾಂಗ್ರೆಸ್​ ಪಕ್ಷದ ಅವನತಿ ಬಗ್ಗೆ ಕುಟುಕಿದರು.

ನೂರಕ್ಕೆ ನೂರು ರಾಜೀನಾಮೆ ನೀಡಲ್ಲ: ಆರೋಪ ಮಾಡುತ್ತಿರುವ ಗುತ್ತಿಗೆದಾರರು ಎಷ್ಟು ಪರ್ಸೆಂಟ್ ಅಂತ ದಾಖಲೆ ಸಮೇತ ಹೇಳಬೇಕು. ಅದನ್ನು ಬಿಟ್ಟು ವಿನಾ ಕಾರಣ ಆರೋಪ ಮಾಡುವುದು ಸರಿಯಲ್ಲ. ಇನ್ನು ಸಂತೋಷ್ ಪಾಟೀಲ್​​ಗೂ ಬಿಜೆಪಿಗೂ ಸಂಬಂಧವಿಲ್ಲ. ಇದನ್ನು ಬೆಳಗಾವಿಯ ಗ್ರಾಮಾಂತರ ಅಧ್ಯಕ್ಷರು ಸ್ಪಷ್ಟಪಡಿಸಿದ್ದಾರೆ. ತನಿಖೆಯ ಬಗ್ಗೆ ಸಿಎಂ ಎಕ್ಸಪರ್ಟ್ ಇದ್ದಾರೆ. ಈ ತನಿಖೆಯನ್ನು ಹೇಗೆ ಬೇಕಾದರೂ ಮಾಡಲಿ. ನಾನು ಮಾತ್ರ ನೂರಕ್ಕೆ ನೂರು ರಾಜೀನಾಮೆ ನೀಡಲ್ಲ ಎಂದು ಸ್ಪಷ್ಟಪಡಿಸಿದರು.