ಕಬ್ಬಿಣದ ದರ ಏರಿಕೆ ಖಂಡಿಸಿ ಶಿವಮೊಗ್ಗದಲ್ಲಿ ಪ್ರತಿಭಟನೆ

ಕಬ್ಬಿಣದ ದರವನ್ನು ಏಕಾಏಕಿ ಏರಿಕೆ ಮಾಡಿರುವುದನ್ನು ಖಂಡಿಸಿ ಇಂದು ನಗರದಲ್ಲಿ ಕರ್ನಾಟಕ ವೆಲ್ಡಿಂಗ್ ಅಸೋಸಿಯೇಶನ್ ಕಾರ್ಯಕರ್ತರು ಪ್ರತಿಭಟನೆ ನಡೆಸಿದರು.

ಶಿವಮೊಗ್ಗ:ಕಬ್ಬಿಣದ ದರ ಏಕಾಏಕಿ 20 ಸಾವಿರ ರೂ. ತನಕ‌ ಏರಿಕೆ ಮಾಡಿರುವುದನ್ನು‌ ಖಂಡಿಸಿ ಕರ್ನಾಟಕ ವೆಲ್ಡಿಂಗ್ ಅಸೋಸಿಯೇಶನ್ ಪ್ರತಿಭಟನೆ ನಡೆಸಿದೆ.

ಜಿಲ್ಲಾಧಿಕಾರಿ ಕಚೇರಿ ಎದುರು ಪ್ರತಿಭಟನೆ ನಡೆಸಿದ ಕಾರ್ಯಕರ್ತರು, ಕೊರೊನಾ ಲಾಕ್​​ಡೌನ್ ನಂತರ ಕಬ್ಬಿಣ ಆಧರಿತ ಉದ್ಯಮಗಳು ಚೇತರಿಸಿಕೊಳ್ಳುತ್ತಿವೆ. ಈ ವೇಳೆ ಏಕಾಏಕಿ ಕಬ್ಬಿಣದ ಕಾರ್ಖಾನೆಗಳು ಪ್ರತಿ ಟನ್ ಕಬ್ಬಿಣಕ್ಕೆ 15 ರಿಂದ 22 ಸಾವಿರ ರೂ. ತನಕ‌ ಏರಿಕೆ ಮಾಡಿ ಗ್ರಾಹಕರಿಗೆ ದ್ರೋಹ ಬಗೆಯುತ್ತಿದ್ದಾರೆ ಎಂದರು.

ಈ ಹಿಂದೆ ಕಬ್ಬಿಣ ಪ್ರತಿ ಟನ್​​​ಗೆ 30 ರಿಂದ 40 ಸಾವಿರ ರೂ.ಗೆ ಲಭ್ಯವಾಗುತ್ತಿತ್ತು. ಆದರೆ ಈಗ ಪ್ರತಿಟನ್​​​ಗೆ 75 ಸಾವಿರ ರೂ. ತನಕ ಏರಿಕೆಯಾಗಿದೆ. ಇದರಿಂದ ಕೊರೊನಾ ಹರಡುವುದಕ್ಕಿಂತ ಮೊದಲು ಆರ್ಡರ್‌ ತೆಗೆದುಕೊಂಡಿದ್ದ ನಮಗೆ ತೀವ್ರ ಸಂಕಷ್ಟ ಎದುರಾಗಿದೆ. ಈ ಸಂಬಂಧ ಕೂಡಲೇ ಸರ್ಕಾರ ಕ್ರಮಕ್ಕೆ ಮುಂದಾಗಬೇಕು ಎಂದು ಆಗ್ರಹಿಸಿದರು.

ಈ ವೇಳೆ ರಿಯಾಕ್ ಅಹಮ್ಮದ್, ರವಿಕುಮಾರ್, ಮೊಮ್ಮದ್ ರಫೀಕ್ ಸೇರಿ‌ ಇತರರು‌ ಹಾಜರಿದ್ದರು.