ಶಿವಮೊಗ್ಗ: ಶಿವಮೊಗ್ಗದಲ್ಲಿ ದಸರಾವನ್ನು ಅತ್ಯಂತ ವಿಜೃಂಭಣೆಯಿಂದ ಆಚರಿಸಲಾಗುತ್ತಿದೆ. ವಿಜಯ ದಶಮಿಯ ನಿಮಿತ್ತ ಇಂದು ಕೋಟಿ ಆಂಜನೇಯ ದೇವಾಲಯದಿಂದ ಮೆರವಣಿಗೆ ಪ್ರಾರಂಭವಾಗಿ ನಗರದ ಪ್ರಮುಖ ರಸ್ತೆಗಳಲ್ಲಿ ಸಾಗಿ ಬನ್ನಿ ಮುಡಿಯುವ ಫ್ರಿಡಂ ಪಾರ್ಕ್ಗೆ ಸಾಗಲಾಗುತ್ತದೆ.
ಶಿವಮೊಗ್ಗದಲ್ಲಿ ಮೈಸೂರು ದಸರಾದಂತೆ ತಾಯಿ ಚಾಮುಂಡಿ ದೇವಿ ಅಂಬಾರಿಯಲ್ಲಿ ತೆಗೆದುಕೊಂಡು ಹೋಗಲಾಗುತ್ತದೆ. ಮಹಾನಗರ ಪಾಲಿಕೆಯಲ್ಲಿನ ತಾಯಿ ಚಾಮುಂಡಿ ದೇವಿಯ ಬೆಳ್ಳಿ ಮಂಟಪವನ್ನು ದಸರಾ ಪ್ರಾರಂಭವಾಗುತ್ತಿದ್ದಂತೆಯೇ ಕೋಟೆ ರಸ್ತೆಯ ಚಂಡಿಕಾ ಪರಮೇಶ್ವರಿ ದೇವಾಲಯದಲ್ಲಿ ಬಳಿ ಇಟ್ಟು ಒಂಬತ್ತು ದಿನ ಪೂಜಿಸಲಾಗುತ್ತದೆ. ವಿಜಯ ದಶಮಿಯ ದಿನವಾದ ಇಂದು ತಾಯಿ ಚಾಮುಂಡಿ ತಂದು ಆನೆಯ ಮೇಲೆ ಕೂರಿಸಲಾಗುತ್ತದೆ.
ಕೋಟೆ ಆಂಜನೇಯ ದೇವಾಲಯದ ಬಳಿ ವಿಜಯ ದಶಮಿಯ ಮೆರವಣಿಗೆಗೆ ಜಿಲ್ಲಾಧಿಕಾರಿ ಡಾ ಸೆಲ್ವಮಣಿ ಅವರು ನಂದಿ ಧ್ವಜಕ್ಕೆ ಪೂಜೆ ಸಲ್ಲಿಸುವ ಮೂಲಕ ಚಾಲನೆ ನೀಡಿದರು. ಈ ವೇಳೆ, ನೂತನ ಎಸ್ಪಿ ಮಿಥುನ್ ಕುಮಾರ್, ಮೇಯರ್ ಸುನೀತ ಅಣ್ಣಪ್ಪ, ಉಪಮೇಯರ್ ಶಂಕರ್ ಗನ್ನಿ, ಆಯುಕ್ತರಾದ ಮಾಯಾಣ್ಣ ಗೌಡ ಸೇರಿದಂತೆ ಪಾಲಿಕೆ ಸದಸ್ಯರು ಹಾಜರಿದ್ದರು.
ಸತತ ಆರನೇ ವರ್ಷ ಅಂಬಾರಿ ಹೊತ್ತ ಸಾಗರ: ಮೈಸೂರಿನಂತೆ ಶಿವಮೊಗ್ಗದಲ್ಲಿ ಅಂಬಾರಿ ಮೆರವಣಿಗೆ ಇರುತ್ತದೆ. ಸಕ್ರೆಬೈಲು ಆನೆ ಬಿಡಾರದ ಜಂಟಲ್ ಮ್ಯಾನ್ ಆನೆಯಾದ ಸಾಗರ ಸತತ ಆರನೇ ವರ್ಷ ಅಂಬಾರಿಯನ್ನು ಹೊತ್ತು ಸಾಗಿದ್ದಾನೆ. ಸಾಗರ ಆನೆಗೆ ನೇತ್ರಾವತಿ ಹಾಗೂ ಭಾನುಮತಿ ಆನೆಗಳು ಸಾತ್ ನೀಡಿವೆ. ಮೂರು ಆನೆಗಳಿಗೆ ಬಣ್ಣದಿಂದ ಸಿಂಗರಿಸಿ, ಅವುಗಳಿಗೆ ಬಟ್ಟೆ ಹಾಕಿ ಅದರ ಮೇಲೆ ತಾಯಿ ಚಾಮುಂಡಿ ಮಂಟಪ ಇಟ್ಟು ಮೆರವಣಿಗೆ ನಡೆಸಲಾಗುತ್ತದೆ.