ರಾಮನಗರ ಜಿಲ್ಲೆ ಬಗ್ಗೆ ಸರ್ಕಾರದಿಂದ ಮಲತಾಯಿ ಧೋರಣೆ: ಡಿ.ಕೆ.ಸುರೇಶ್​​​

ಜಿಲ್ಲೆಯಲ್ಲಿ ಅಭಿವೃದ್ಧಿಯ ವಿಚಾರವೇ ಇಲ್ಲ. ಹೆಚ್.ಡಿ.ಕುಮಾರಸ್ವಾಮಿ ಸರ್ಕಾರದಲ್ಲಿ ಆಗಿದ್ದ ಎಲ್ಲಾ ಯೋಜನೆಗಳನ್ನ ಈಗ ತಡೆಹಿಡಿಯಲಾಗಿದೆ ಎಂದು ಎಂದು ಡಿ.ಕೆ.ಸುರೇಶ್​ ಹೇಳಿದರು.

ರಾಮನಗರ:ಸಮ್ಮಿಶ್ರ ಸರ್ಕಾರವಿದ್ದಾಗ ಜಿಲ್ಲೆಯ ಬಾನಂದೂರು ಮತ್ತು ವೀರಾಪುರ ಗ್ರಾಮಗಳ ಅಭಿವೃದ್ಧಿಗೆ ತಲಾ 25 ಕೋಟಿ ಹಣವನ್ನ ಬಜೆಟ್​​ನಲ್ಲಿ ಘೋಷಣೆ ಮಾಡಲಾಗಿತ್ತು. ಆದರೆ ಇದೀಗ ಸರ್ಕಾರ ಅದನ್ನ ಮರೆತಂತೆ ಜಾಣ ಮರೆವು ಪ್ರದರ್ಶಿಸುತ್ತಿದೆ ಎಂದು ಸಂಸದ ಡಿ.ಕೆ.ಸುರೇಶ್​ ಕಿಡಿಕಾರಿದ್ದಾರೆ.

ಬಿಡದಿಯಲ್ಲಿ ಬಾಲಗಂಗಾಧರನಾಥ ಸ್ವಾಮೀಜಿ‌ ಜಯಂತ್ಯುತ್ಸವ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ಬಾನಂದೂರು ಮತ್ತು ವೀರಾಪುರ ಗ್ರಾಮದ ಅಭಿವೃದ್ಧಿಗೆ ತಲಾ 25 ಕೋಟಿ ಹಣವನ್ನ ಬಜೆಟ್​ನಲ್ಲಿ ಘೋಷಣೆ ಮಾಡಿದ್ದರು. ಹೊಸ ಸರ್ಕಾರದಲ್ಲಿ ಈ ಬಗ್ಗೆ ಯಾವುದೇ ಚರ್ಚೆಯಾಗಿಲ್ಲ. ಈ ಬಗ್ಗೆ ಸಭೆ ಕರೆಯುತ್ತಾರೆ ಅಂತಾ ನಾವು ಕಾಯ್ತಾ ಇದ್ದೇವೆ. ಆದರೆ ಇನ್ನೂ ನಮ್ಮನ್ನ ಕರೆದಿಲ್ಲ. ಸರ್ಕಾರ ತಾರತಮ್ಯ ನೀತಿಯನ್ನ ಬಿಡಬೇಕೆಂದು ಸಂಸದ ಡಿ.ಕೆ.ಸುರೇಶ್ ಬಿಜೆಪಿ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದರು.

ಜಿಲ್ಲೆಯಲ್ಲಿ ಅಭಿವೃದ್ಧಿಯ ವಿಚಾರವೇ ಇಲ್ಲ. ಹೆಚ್.ಡಿ.ಕುಮಾರಸ್ವಾಮಿ ಸರ್ಕಾರದಲ್ಲಿ ಆಗಿದ್ದ ಎಲ್ಲಾ ಯೋಜನೆಗಳನ್ನ ತಡೆಹಿಡಿಯಲಾಗಿದೆ. ರಾಮನಗರ ಜಿಲ್ಲೆಗೆ ಮಲತಾಯಿ ಧೋರಣೆ ಅನುಸರಿಸುತ್ತಿದ್ದಾರೆ. ರಾಜಕೀಯ ಕಾರಣಗಳಿಗಾಗಿ ಈ ರೀತಿ ಮಾಡ್ತಿದ್ದಾರೆ. ಅಧಿವೇಶನ ಬರಲಿ, ಇದೆಲ್ಲದರ ಬಗ್ಗೆ ನಮ್ಮ ಶಾಸಕರು ಮಾತನಾಡ್ತಾರೆ ಎಂದರು.

ಅಲ್ಲದೇ ಜಿಲ್ಲೆಯ ಹಲವು ಯೋಜನೆಗಳು ನನೆಗುದಿಗೆ ಬಿದ್ದಿವೆ. ಪ್ರಮುಖವಾಗಿ ನೀರಾವರಿ ಯೋಜನೆಗಳು ಮತ್ತು ಕುಡಿಯುವ ನೀರು‌ ಸರಬರಾಜು ಯೋಜನೆಗೆ ಸರ್ಕಾರ‌ ತಡೆಯೊಡ್ಡಿರೋದು ಸರಿಯಲ್ಲ. ಕೂಡಲೇ‌ ಕಾಮಗಾರಿಗಳು ಚಾಲನೆಯಾಗಲಿ ಎಂದ ಅವರು, ಈವರೆಗೆ ಅಭಿವೃದ್ಧಿಗೆ ಗಮನಹರಿಸಿಲ್ಲ. ಇನ್ನೂ ಬಹಳ‌ ವರ್ಷ ಇರುತ್ತಲ್ಲಾ ನೋಡೋಣ. ಆಗಲಾದರೂ ಮಾಡ್ತಾರ ಎಂದು ಲೇವಡಿ ಮಾಡಿದರು.