ರಾಮನಗರ:ಸಮುದ್ರದ ನಂಟು ಆದರೆ, ಉಪ್ಪಿಗೆ ಬರ ಅಂತಾರೆ ಹಾಗೇ ರಾಮನಗರದಲ್ಲಿ ನದಿ ಹರಿದರೂ ನೀರಿನ ಸಮಸ್ಯೆ ಎದುರಾಗಿದೆ. ಒಂದು ಕಾಲದಲ್ಲಿ ಜೀವನದಿ ಎಂದು ಖ್ಯಾತಿ ಪಡೆದು ನಗರಕ್ಕೆ ಕುಡಿಯುವ ನೀರನ್ನು ವದಗಿಸುತ್ತಿದ್ದ ಅರ್ಕಾವತಿ ನದಿ ಇಂದು ಬಳಸಲು ಬಾರದಂತಾಗಿದೆ. ತ್ಯಾಜ್ಯ ವಸ್ತುಗಳು ಸೇರಿಕೊಂಡಿದ್ದರ ಜತೆಗೆ ಸಮರ್ಪಕ ನಿರ್ವಹಣೆ ಇಲ್ಲದೇ ಕೊಚ್ಚೆಗುಂಡಿಯಾಗಿ ಹರಿಯುತ್ತಿದೆ.
ಅರ್ಕಾವತಿ ನದಿಯ ಸರಬರಾಜು ಹಾಗೂ ಶುದ್ಧೀಕರಣದ ಪಂಪ್ ಹೌಸ್ ಘಟಕ ದುರಸ್ತಿಗೊಳಿಸಲು ಸಾರ್ವಜನಿಕರ ಒತ್ತಾಯ
ನಗರಕ್ಕೆ ಕಾವೇರಿ ನೀರು ಬಳಸಿಕೊಂಡು ಕುಡಿವ ನೀರು ಸರಬರಾಜು ಮಾಡುವ ಕಾವೇರಿ ನೀರಾವರಿ ನಿಗಮ ಕೇವಲ ಗೃಹ ಬಳಕೆಗಾಗಿ ಅರ್ಕಾವತಿ ನದಿ ನೀರನ್ನು ಬಳಸುವಂತೆ ನಗರ ಸಭೆಯ ಮೂಲಕ ಘೋಷಣೆ ಹೊರಡಿಸಿದೆ. ಆದರೆ, ನಗರಕ್ಕೆ ಬಿಡಲಾಗುತ್ತಿರುವ ಕಾವೇರಿ ನೀರು ಸಮರ್ಪಕವಾಗಿಲ್ಲದ ಕಾರಣ ಹಲವು ವಾರ್ಡ್ಗಳಲ್ಲಿ ಅರ್ಕಾವತಿ ನದಿ ನೀರನ್ನೆ ಕುಡಿಯುತ್ತಿದ್ದಾರೆ. ಯಾವುದೇ ಫಿಲ್ಟರ್ ಇಲ್ಲದೇ ಇರುವುದರಿಂದ ಅನೇಕ ಸಾಂಕ್ರಾಮಿಕ ರೋಗಗಳು ಹರಡುತ್ತಿವೆ.