ಉದ್ಯಾನವನದಲ್ಲೇ ಕುಡಿಯುವ ನೀರು ಶುದ್ಧೀಕರಣ ಘಟಕ ಸ್ಥಾಪನೆ!

ಹೈದರಾಬಾದ್​ ಮೂಲದ ಕಂಪನಿಯೊಂದು ಸುಪ್ರೀಂಕೋರ್ಟ್​ ನಿಯಮವನ್ನ ಗಾಳಿಗೆ ತೂರಿ ಕುಡಿಯುವ ನೀರು ಶುದ್ಧೀಕರಣ ಘಟಕ ಸ್ಥಾಪನೆ ಮಾಡಿದೆ.

ರಾಯಚೂರು: 2015ರಲ್ಲಿ ಹೈದರಾಬಾದ್​ ಮೂಲದ ಡಾ. ಪ್ಯೂರಿಫೈ ಕಂಪನಿ ರಾಯಚೂರಿನಲ್ಲಿ 5 ಕಡೆಗಳಲ್ಲಿ ನೀರು ಶುದ್ಧೀಕರಣ ಘಟಕಗಳನ್ನ ಪ್ರಾರಂಭಿಸಿದ್ದು, ಎಲ್ಲಾ ಘಟಕಗಳು ಸಾರ್ವಜನಿಕ ಉದ್ಯಾನವನದಲ್ಲಿ ಕಾರ್ಯನಿರ್ವಹಿಸುತ್ತಿವೆ. ಸುಪ್ರೀಂಕೋರ್ಟ್ ಅದೇಶದ ಅನ್ವಯ ಸರ್ಕಾರದ ಉದ್ಯಾನವನ ಹಾಗೂ ಆಟದ ಮೈದಾನದ ಸುತ್ತಮುತ್ತಲಿನ ಜಾಗವನ್ನ ವ್ಯಾಪಾರೀಕರಣ ಹಾಗೂ ವಸತಿಗೆ ಬಳಸಿಕೊಳ್ಳಬಾರದು ಎಂಬ ನಿಯಮವಿದೆ.

ಸುಪ್ರೀಂಕೋರ್ಟ್​ ನಿಯಮವನ್ನ ಉಲ್ಲಂಘನೆ ಮಾಡಿ ಹೈದರಾಬಾದ್​ನ ವಾಟರ್ ಹೆಲ್ತ್ ಪ್ರೈವೇಟ್ ಲಿಮಿಟೆಡ್ ಕಂಪನಿ ಎಲ್​ಬಿಎಸ್ ನಗರ, ನಿಜಲಿಂಗಪ್ಪ ಕಾಲೋನಿ, ಜವಾಹರ್ ನಗರ, ಜ್ಯೋತಿ ಕಾಲೋನಿ ಸೇರಿದಂತೆ ನಗರದ 5 ಕಡೆ ಸಾರ್ವಜನಿಕ ಉದ್ಯಾನವನ ಸ್ಥಳದಲ್ಲಿ ಹಾಗೂ ಗಾರ್ಡನ್​ಗೆ ಮೀಸಲಾದ ಸ್ಥಳದಲ್ಲಿಯೇ ಈ ನೀರಿನ ಘಟಕ ಸ್ಥಾಪನೆ ಮಾಡಿದ್ದು, ನಗರಸಭೆಯೇ ಪರವಾನಗಿ ನೀಡುವ ಮೂಲಕ ಕಾನೂನು ಉಲ್ಲಂಘನೆ ಮಾಡಿದೆ ಎನ್ನುವ ಆರೋಪ ಕೇಳಿ ಬಂದಿದೆ.

ಇನ್ನೊಂದು ಮುಖ್ಯವಾದ ವಿಚಾರ ಎಂದರೆ ಈ ಕಂಪನಿಯ ಪ್ರಾರಂಭಕ್ಕೆ ಪರವಾನಗಿ ಪಡೆಯಲು ಯಾವುದೇ ಅರ್ಜಿ ಹಾಕದೇ, ನಗರಸಭೆಯ ಜೊತೆ, ಆಹಾರ ಸುರಕ್ಷತೆ ಹಾಗೂ ಗುಣಮಟ್ಟ ಇಲಾಖೆಯ ಅಂಕಿತ ಅಧಿಕಾರಿಗಳ ಕಾರ್ಯಾಲಯದ ಜೊತೆ ಕೇವಲ ದೂರವಾಣಿ ಸಂಭಾಷಣೆಯಲ್ಲಿ ಪರವಾನಗಿ ಪಡೆಯಲಾಗಿದೆ ಎನ್ನಲಾಗಿದೆ.

ಈ ವಿಚಾರ ಮಹೆಬೂಬ್ ಎಂಬುವವರು ಮಾಹಿತಿ ಹಕ್ಕು ಕಾಯ್ದೆಯಡಿ ಕೇಳಿದ ಮಾಹಿತಿಯಲ್ಲಿ ಬಯಲಾಗಿದೆ. ಈ ನೀರು ಶುದ್ಧೀಕರಣ ಘಟಕ ಸ್ಥಳೀಯ ಬೋರವೆಲ್ ನೀರನ್ನೇ ಶುದ್ಧೀಕರಣಗೊಳಿಸಿ ಪ್ರತಿ ಬಿಂದಿಗೆಗೆ 8 ರೂಪಾಯಿ ಹಾಗೂ ಕ್ಯಾನ್​ಗೆ 10 ರೂಪಾಯಿ ದರ ನಿಗದಿಪಡಿಸಿದೆ. ಬರದ ಹಿನ್ನೆಲೆಯಲ್ಲಿ ನೀರು ಸರಬರಾಜಿನಲ್ಲಿ ವ್ಯತ್ಯಯವಾಗಿದ್ದು, ಪ್ರತಿ ದಿನ ಲಕ್ಷಾಂತರ ರೂಪಾಯಿ ವ್ಯವಹಾರ ನಡೆಸುವ ಈ ಕಂಪನಿಗೆ ವರವಾಗಿದೆ.