ರಾಯಚೂರು: ಲಾಕ್ಡೌನ್ ಬೆಂಬಲಿಸಿ ಬಂದ್ ಮಾಡಿರುವ ಮಳಿಗೆಗಳ ತಿಂಗಳ ಬಾಡಿಗೆ ತೆಗೆದುಕೊಳ್ಳದಿರೋ ನಿರ್ಧಾರವನ್ನ ಜಿಲ್ಲೆಯ ವಾಣಿಜ್ಯ ಮಳಿಗೆ ಮಾಲೀಕರೊಬ್ಬರು ತೆಗೆದುಕೊಂಡು ಮಾನವೀಯತೆ ಮೆರೆದಿದ್ದಾರೆ.
ಲಾಕ್ಡೌನ್ಗೆ ಬೆಂಬಲ: ಅಂಗಡಿ ಬಾಡಿಗೆ ಪಡೆಯಲ್ಲ ಎಂದ ಮಾಲೀಕ!
ರಾಜ್ಯ ಕೊರೊನಾ ಲಾಕ್ಡೌನ್ ಏಟಿಗೆ ತತ್ತರಿಸಿದೆ. ದಿನಗೂಲಿ ಕಾರ್ಮಿಕರು, ವ್ಯಾಪಾರಸ್ಥರು ಆರ್ಥಿಕವಾಗಿ ನಲುಗಿ ಹೋಗುತ್ತಿದ್ದಾರೆ. ಈ ನಿಟ್ಟಿನಲ್ಲಿ ರಾಯಚೂರಿನ ವಾಣಿಜ್ಯ ಮಳಿಗೆ ಮಾಲೀಕರೊಬ್ಬರು ತಾವು ಬಾಡಿಗೆ ನೀಡಿರುವ ಮಳಿಗೆಗಳ ತಿಂಗಳ ಬಾಡಿಗೆ ತೆಗೆದುಕೊಳ್ಳದೆ ವ್ಯಾಪಾರಸ್ಥರ ಕಷ್ಟಕ್ಕೆ ನೆರವಾಗಿದ್ದಾರೆ.
ಅರಕೇರಾ ಶಿವಶರಣ ಸಾಹುಕಾರ
ಲಾಕ್ಡೌನ್ ಹಿನ್ನೆಲೆ 21 ದಿನಗಳ ಕಾಲ ಎಲ್ಲಾ ಅಂಗಡಿ ಮುಂಗಟ್ಟುಗಳು ಬಂದ್ ಆದ ಹಿನ್ನೆಲೆ ಸಿರವಾರ ಪಟ್ಟಣದ ವಾಣಿಜ್ಯ ಮಳಿಗೆಗಳ ಮಾಲೀಕ ಅರಕೇರಾ ಶಿವಶರಣ ಸಾಹುಕಾರ ಎಂಬುವವರು ಬಾಡಿಗೆ ನೀಡಿರುವ ತಮ್ಮ ಮಳಿಗೆಗಳಿಂದ ತಿಂಗಳ ಬಾಡಿಗೆ ತೆಗೆದುಕೊಳ್ಳುವುದನ್ನು ನಿಲ್ಲಿಸಿ ವ್ಯಾಪಾರಿಗಳ ಕಷ್ಟಕ್ಕೆ ಸ್ಪಂದಿಸಿದ್ದಾರೆ.
ಅಂಗಡಿ ಬಾಡಿಗೆ ಬೇಡವೆಂದ ಮಾಲೀಕ
ಬಾಡಿಗೆದಾರರು ತಮ್ಮ ವ್ಯಾಪಾರ-ವಹಿವಾಟಿನಿಂದ ಬಂದ ಆದಾಯದಲ್ಲಿ ಮಳಿಗೆ ಹಾಗೂ ಅಂಗಡಿ ಬಾಡಿಗೆ ಕಟ್ಟಿ ಜೀವನ ಸಾಗಿಸುತ್ತಿದ್ರು. ಆದ್ರೆ ಅಂಗಡಿ ಮುಚ್ಚಿದ ಪರಿಣಾಮ ವ್ಯಾಪಾರವಿಲ್ಲದೆ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಈ ನಿಟ್ಟಿನಲ್ಲಿ ನಾವು ಸಹ ಲಾಕ್ಡೌನ್ ಬೆಂಬಲಿಸಿದವರ ನೆರವಿಗೆ ಧಾವಿಸಬೇಕು ಎನ್ನುವ ಉದ್ದೇಶದಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಶಿವಶರಣ ಸಾಹುಕಾರ ತಿಳಿಸಿದ್ದಾರೆ.