ಎರಡು ಐಷಾರಾಮಿ ಬಸ್​ಗಳಿಗೆ ನಿನ್ನೆ ಒಂದೇ ನಂಬರ್​ ಪ್ಲೇಟ್... ಇವತ್ತು ಅದರಲ್ಲಿ ಒಂದ್​ ಮಿಸ್​!

ಎರಡು ಐಷಾರಾಮಿ ಬಸ್​ಗಳಿಗೆ ಒಂದೇ ನಂಬರ್​ ಪ್ಲೇಟ್​ ಪ್ರಕರಣ ಹೊಸ ತಿರುವು ಪಡೆದಿದ್ದು, ಬಸ್​ವೊಂದರ ನಂಬರ್​ ಪ್ಲೇಟ್​ ಈಗ ಮಾಯವಾಗಿದೆ.

ಮೈಸೂರು:ಒಂದೇ ನೋಂದಣಿ ಸಂಖ್ಯೆಯ ಎರಡು ಐಷಾರಾಮಿ ಬಸ್​ಗಳ ಪ್ರಕರಣಕ್ಕೆ ಈಗ ಮತ್ತೊಂದು ತಿರುವು ಸಿಕ್ಕಿದೆ. ಪೊಲೀಸ್​​ ಠಾಣಾ ಆವರಣದಲ್ಲಿ ನಿಂತಿದ್ದ ಒಂದು ಬಸ್​ನ ನಂಬರ್ ಪ್ಲೇಟ್ ರಾತ್ರೋರಾತ್ರಿ ಕಾಣೆಯಾಗಿದೆ.

ಮೈಸೂರು ಮತ್ತು ನಂಜನಗೂಡಿನಲ್ಲಿ ಕೆಎ 11 ಬಿ 2969 ನೋಂದಣಿ ಸಂಖ್ಯೆ ಹೊಂದಿದ್ದ ಕಾಮಧೇನು ಎಂಬ ಎರಡು ಬಸ್​ಗಳು ಒಂದೇ ನೋಂದಣಿ ಸಂಖ್ಯೆ ಹಾಕಿಕೊಂಡು ಸಂಚರಿಸುತ್ತಿದ್ದವು.

ಈ ಬಗ್ಗೆ ಅನುಮಾನಗೊಂಡ ಪೊಲೀಸರು ದಾಖಲಾತಿಗಳನ್ನು ಪರಿಶೀಲಿಸಿದಾಗ ಒಂದು ಬಸ್ ನಂಜನಗೂಡಿನಲ್ಲಿ ಮತ್ತೊಂದು ಬಸ್ ಮೈಸೂರಿನಲ್ಲಿ ವಶಕ್ಕೆ ಪಡೆದು ಠಾಣೆಯ ಆವರಣದಲ್ಲಿ ನಿಲ್ಲಿಸಿದ್ದರು. ಆದರೆ, ಠಾಣೆಯ ಆವರಣದಲ್ಲಿದ್ದ ಈ ಎರಡು ಬಸ್​ಗಳಲ್ಲಿ ಒಂದು ಬಸ್​ ನಂಬರ್ ಪ್ಲೇಟ್ ಬೆಳಗಾಗುವುದರೊಳಗಾಗಿ ಕಾಣೆಯಾಗಿದೆ. ಈಗ ಈ ಪ್ರಕರಣ ಪೊಲೀಸರಿಗೆ ತಲೆನೋವಾಗಿದ್ದು, ವಿಚಾರಣೆ ಕೈಗೊಂಡಿದ್ದಾರೆ.

ಆರ್​ಟಿಒ ಅಧಿಕಾರಿಗಳಿಂದಲೂ ತನಿಖೆ

ನಂಜನಗೂಡಿನ ಪೊಲೀಸರು ಒಂದೇ ನೋಂದಣಿ ಸಂಖ್ಯೆಯ ಎರಡು ಬಸ್​ಗಳನ್ನು ವಶಕ್ಕೆ ಪಡೆದಿರುವುದು ಮೈಸೂರು ಸಾರಿಗೆ ಇಲಾಖೆಯ ಗಮನಕ್ಕೆ ಬಂದಿದೆ. ಈ ಬಗ್ಗೆ ಪೊಲೀಸರು ಒಂದು ಕಡೆ ತನಿಖೆ ನಡೆಸಿದರೆ, ಮತ್ತೊಂದು ಕಡೆ ಆರ್​ಟಿಒ ಕಚೇರಿ ಅಧಿಕಾರಿಗಳು ತನಿಖೆ ನಡೆಸುತ್ತಿದ್ದಾರೆ.

ನಂಜನಗೂಡಿನ ಪೊಲೀಸರು ವರದಿ ನೀಡಿದ ನಂತರ ಸೂಕ್ತ ಕ್ರಮ ಜರುಗಿಸಲಾಗುವುದು ಎಂದು ಮೈಸೂರು ಪ್ರಾದೇಶಿಕ ಆಯುಕ್ತರಾದ ಮೂರ್ತಿ ಈಟಿವಿ ಭಾರತಗೆ ದೂರವಾಣಿ ಮೂಲಕ ತಿಳಿಸಿದ್ದಾರೆ. ನಂಬರ್ ನಾಪತ್ತೆ ಪ್ರಕರಣವನ್ನು ಪೊಲೀಸರೇ ತನಿಖೆ ನಡೆಸಲಿದ್ದಾರೆ ಎಂದರು.