ಶವ ಕೊಂಡೊಯ್ಯಲು ಕುಟುಂಬದ ಬಳಿ ಹಣವಿಲ್ಲ: ಪೊಲೀಸರ ನೇತೃತ್ವದಲ್ಲಿ ಅಂತ್ಯಸಂಸ್ಕಾರ

ಬಿಹಾರ ಲಾರಿ ಚಾಲಕನ ಮೃತದೇಹದ ಅಂತ್ಯಸಂಸ್ಕಾರವನ್ನು ಮೈಸೂರಿನಲ್ಲಿ ಪೊಲೀಸರು ಭಾರತ್‌ ರೋಡ್‌ವೇಸ್‌ ಸಂಸ್ಥೆಯ ಸಿಬ್ಬಂದಿಯೊಂದಿಗೆ ನೆರವೇರಿಸಿದರು.

ಮೈಸೂರು: ಬಿಹಾರ ಮೂಲದ ಲಾರಿ ಚಾಲಕ ಹೃದಯಾಘಾತದಿಂದ ಮೃತಪಟ್ಟಿದ್ದರು. ಆದರೆ, ಕುಟುಂಬಸ್ಥರಲ್ಲಿ ಶವ ತೆಗೆದುಕೊಂಡು ಹೋಗಲು ಹಣವಿರಲಿಲ್ಲ. ಹೀಗಾಗಿ, ಮಾನವೀಯತೆಯ ಆಧಾರದಲ್ಲಿ ಪೊಲೀಸರೇ ಶವಸಂಸ್ಕಾರ ನೆರವೇರಿಸಿದರು.

ಬಿಹಾರದ ಸರನ್​ ಜಿಲ್ಲೆಯ ದೂದ್​ನಾಥ್ ಮಾಂಜಿ (55) ಡಿಸೆಂಬರ್ 18ರಂದು ಬಿಹಾರದಿಂದ ಹೊರಟು ಆಂಧ್ರಪ್ರದೇಶದ ಅನಂತಪುರದಲ್ಲಿ ಲಾರಿ ಅನ್​ಲೋಡ್ ಮಾಡಿ ಡಿಸೆಂಬರ್ 23ರಂದು ಮೈಸೂರಿನ ಭಾರತ್ ರೋಡ್ ವೇಸ್​ ಕಂಪನಿಗೆ ಬಂದಿದ್ದರು. ಸರಕುಗಳನ್ನು ಲೋಡ್​ ಮಾಡುತ್ತಿರುವ ಸಂದರ್ಭದಲ್ಲಿ ಚಾಲಕನಿಗೆ ಹೃದಯಾಘಾತ ಸಂಭವಿಸಿದೆ. ತಕ್ಷಣವೇ ಕಂಪೆನಿಯವರು ಆತನನ್ನು ಅಸ್ಪತ್ರೆಗೆ ದಾಖಲಿಸಿದ್ದಾರೆ. ಚಿಕಿತ್ಸೆ ಫಲಿಸದೇ ಮಾಂಜಿ ಮೃತಪಟ್ಟಿದ್ದರು.

ಈ ಬಗ್ಗೆ ಕುಟುಂಬದವರಿಗೆ ಕಂಪೆನಿಯ ಮ್ಯಾನೇಜರ್ ಮಾಹಿತಿ ನೀಡಿದ್ದರು. ಆದರೆ, ಪ್ರತಿಸಲವೂ ಕರೆ ಮಾಡಿದಾಗಲು ಬರುವುದಾಗಿ ಹೇಳುತ್ತಿದ್ದ ಕುಟುಂಬದವರು ಬರಲೇ ಇಲ್ಲ. ಕಂಪೆನಿಯವರು ಕೊನೆಯದಾಗಿ ಸ್ಥಳೀಯ ಪೊಲೀಸ್​ ಠಾಣೆಗೆ ಘಟನೆಯ ಮಾಹಿತಿ ನೀಡಿದ್ದಾರೆ.

ಪೊಲೀಸರು ಕುಟುಂಬದವರನ್ನು ಸಂಪರ್ಕಿಸಿದಾಗ, ನಮಗೆ ಬರಲು ಸಾಧ್ಯವಿಲ್ಲ. ನಮ್ಮ ಬಳಿ ಹಣವೂ ಇಲ್ಲ. ನೀವೇ ಶವವನ್ನು ಅಂತ್ಯಸಂಸ್ಕಾರ ಮಾಡಿ ಎಂದು ಕುಟುಂಬದವರು ಮನವಿ ಮಾಡಿದ್ದಾರೆ. ಈ ಮನವಿಯ ಮೇರೆಗೆ ಪೊಲೀಸರು ಹಾಗೂ ಭಾರತ್ ರೋಡ್ ವೇಸ್ ಸಿಬ್ಬಂದಿ ಸೇರಿ ಚಾಲಕನ ಕುಟುಂಬಕ್ಕೆ ವಿಡಿಯೋ ಕರೆ ಮಾಡಿ ಅಂತ್ಯಸಂಸ್ಕಾರ ನೆರವೇರಿಸಿದ್ದಾರೆ ಎಂದು ಭಾರತ್ ರೋಡ್ ವೇಸ್​ ಕಂಪನಿಯ ಮ್ಯಾನೇಜರ್ ಮಹಾದೇವ್​ ಮಾಹಿತಿ ನೀಡಿದರು.

ದೂದ್​ನಾಥ್ ಮಾಂಜಿ ಶವವನ್ನು ಕಳೆದೊಂದು ವಾರದಿಂದ ಕೆ.ಆರ್.ಆಸ್ಪತ್ರೆಯ ಶವಾಗಾರದಲ್ಲಿ ಇರಿಸಲಾಗಿತ್ತು. ಇಂದು ನಗರದ ಹೈವೇ ಸರ್ಕಲ್‌ನಲ್ಲಿರುವ ಜೋಡಿ ತೆಂಗಿನಮರ ಸ್ಮಶಾನದಲ್ಲಿ ಅಂತ್ಯಕ್ರಿಯೆ ನೆರವೇರಿಸಲಾಯಿತು.

ಇದನ್ನೂ ಓದಿ:ಹೊಸ ವರ್ಷದ ನಿಮಿತ್ತ 2 ಲಕ್ಷ ತಿರುಪತಿ ಮಾದರಿ ಲಾಡು ವಿತರಣೆ