ಹಾಡಹಗಲೇ ನಿವೃತ್ತ ಶಿಕ್ಷಕಿಯ ಸರ ಕದ್ದ ಖದೀಮ ಅಂದರ್​: ಕಳ್ಳನ ಕೃತ್ಯ ಸಿಸಿಟಿವಿಯಲ್ಲಿ ಸೆರೆ

ಹಾಡಹಗಲೇ ನಿವೃತ್ತ ಶಿಕ್ಷಕಿಯ ಸರ ಕದ್ದ ಖದೀಮನನ್ನು ಮೈಸೂರಲ್ಲಿ ಪೊಲೀಸರು ಬಂಧಿಸಿದ್ದಾರೆ. ಕಳ್ಳನ ಕೈಚಳಕ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ಮೈಸೂರು:ನಿವೃತ್ತ ಶಿಕ್ಷಕಿಯ ಚಿನ್ನದ ಸರ ಕದ್ದು ಪರಾರಿಯಾಗಿದ್ದ ಸರಗಳ್ಳನನ್ನು ಕುವೆಂಪು ನಗರ ಪೊಲೀಸರು ಬಂಧಿಸಿದ್ದಾರೆ.

ನಗರದ ರಾಮಕೃಷ್ಣ ಬಡವಾಣೆಯ ನಿವೃತ್ತ ಶಿಕ್ಷಕಿ ಗೀತಾ ಶನಿವಾರ ಮಧ್ಯಾಹ್ನ ಬಡವಾಣೆಯ ಗಣಪತಿ ದೇವಸ್ಥಾನದ ರಸ್ತೆಯಲ್ಲಿ ನಡೆದುಕೊಂಡು ಹೋಗುತ್ತಿದ್ದರು. ಆಗ ಆಕೆಯನ್ನು ಹಿಂಬಾಲಿಸಿದ ಖದೀಮ, ಅವರ ಕತ್ತಿನಿಂದ ಸರ ಕದ್ದು ಪರಾರಿಯಾಗಿದ್ದನು. ಈ ವೇಳೆ ಆತನ ಜೇಬಿನಿಂದ ಮೊಬೈಲ್ ಬಿದ್ದುಹೋಗಿತ್ತು.

ಘಟನೆ ಸಂಬಂಧ ಶಿಕ್ಷಕಿ ಗೀತಾ ಕುವೆಂಪು ನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ತಕ್ಷಣ ಕಾರ್ಯ ಪ್ರವೃತ್ತರಾದ ಅಧಿಕಾರಿಗಳು ಮೊಬೈಲ್ ಆಧಾರದ ಮೇಲೆ ಸರಗಳ್ಳನನ್ನು ಬಂಧಿಸಿದ್ದಾರೆ.