5 ಸಾವಿರ ರೂ. ಲಂಚಕ್ಕೆ ಕೈಯೊಡ್ಡಿದ ಕಿರಿಯ ಎಂಜಿನಿಯರ್‌ ಎಸಿಬಿ ಬಲೆಗೆ

ದೂರುದಾರರಾದ ಗೌರಮ್ಮ ಅವರಿಂದ 5 ಸಾವಿರ ರೂ. ಸ್ವೀಕರಿಸುವಾಗ ಎಸಿಬಿ ಪೊಲೀಸರು ದಾಳಿ ಮಾಡಿ ಹಣಸಮೇತ ಕಿರಿಯ ಎಂಜಿನಿಯರ್ ಚಂದ್ರಶೇಖರ್ ಅವರನ್ನು ಬಂಧಿಸಿ ತನಿಖೆ ಕೈಗೊಂಡಿದ್ದಾರೆ.

ಮೈಸೂರು:ಮನೆ ಜಾಗ ಒತ್ತುವರಿ ಸಂಬಂಧ ಮಹಿಳೆಯಿಂದ ಲಂಚ ಪಡೆಯುತ್ತಿದ್ದ ಪಾಲಿಕೆ ವಲಯ ಕಚೇರಿ-7ರ ಕಿರಿಯ ಎಂಜಿನಿಯರ್ ಚಂದ್ರಶೇಖರ್ ಭ್ರಷ್ಟಾಚಾರ ನಿಗ್ರಹ ದಳದ (ಎಸಿಬಿ) ಬಲೆಗೆ ಬಿದ್ದಿದ್ದಾರೆ.

ನಾಚನಹಳ್ಳಿಪಾಳ್ಯ ಗೌರಮ್ಮ ಅವರಿಗೆ ನಾಯ್ಡುನಗರ ಕೆಸರೆ- 2ನೇ ಹಂತದಲ್ಲಿ ಮನೆ ಮಂಜೂರಾಗಿದ್ದು, ಅದನ್ನು ಪುತ್ರಿ ಆಶಾ ಅವರಿಗೆ ದಾನವಾಗಿ ಕೊಟ್ಟಿದ್ದರು. ಆ ಮನೆಯನ್ನು ಕೆಡವಿ ಹೊಸದಾಗಿ ಮನೆ ನಿರ್ಮಾಣ ಮಾಡಿಕೊಂಡಿದ್ದು, ಪಕ್ಕದ ಮನೆಯ ಬಚ್ಚಲು ಮನೆಯಿಂದ ಹೊಗೆ ಬರುವ ವಿಚಾರವಾಗಿ ಆಶಾ ಅವರು ಪಾಲಿಕೆ ವಲಯ-7ರ ಆಯುಕ್ತರಿಗೆ ದೂರು ನೀಡಿದ್ದರು.

ಫೆ.7ರಂದು ಜೆಇ ಚಂದ್ರಶೇಖರ್ ಅವರು ಮನೆ ಬಳಿ ಬಂದು ಪರಿಶೀಲನೆ ನಡೆಸಿ, ಗೌರಮ್ಮ ಅವರಿಗೆ ಹೆಚ್ಚುವರಿ ಜಾಗ ಒತ್ತುವರಿ ಮಾಡಿಕೊಂಡಿದ್ದೀರಿ. 11 ಸಾವಿರ ರೂ. ಲಂಚ ನೀಡಬೇಕು. ಇಲ್ಲದಿದ್ದರೆ ಕಾಂಪೌಂಡ್ ತೆರವುಗೊಳಿಸುವುದಾಗಿ ಸೂಚಿಸಿದ್ದರು. 5 ಸಾವಿರ ರೂ. ಪಡೆದಿದ್ದರು. ಫೆ.9ರಂದು ಭೇಟಿಯಾದಾಗ ಮತ್ತೆ 5 ಸಾವಿರ ರೂ. ನೀಡುವಂತೆ ಒತ್ತಾಯಿಸಿದ್ದಾರೆ.

ಇದನ್ನೂ ಓದಿ: ಕೊಪ್ಪಳ: ಭೂಮಿ ಕೊಡಿಸುವುದಾಗಿ ಕರೆಸಿ, ಹಣ ದೋಚಿದ್ದ ಆರೋಪಿಯ ಬಂಧನ

ಈ ಸಂಬಂಧ ಗೌರಮ್ಮ ಅವರು ಗುರುವಾರ ಬೆಳಗ್ಗೆ ಎಸಿಬಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ಗೌರಮ್ಮ ಅವರಿಂದ 5 ಸಾವಿರ ರೂ. ಸ್ವೀಕರಿಸುವಾಗ ಎಸಿಬಿ ಪೊಲೀಸರು ದಾಳಿ ಮಾಡಿ ಹಣಸಮೇತ ಚಂದ್ರಶೇಖರ್ ಅವರನ್ನು ಬಂಧಿಸಿ ತನಿಖೆ ಕೈಗೊಂಡಿದ್ದಾರೆ.

ಎಸಿಬಿ ದಕ್ಷಿಣ ವಲಯ ಎಸ್​​ಪಿ ಅರುಣಾಂಗ್ಶು ಗಿರಿ ಅವರ ಮಾರ್ಗದರ್ಶನದಲ್ಲಿ ಡಿವೈಎಸ್​​ಪಿ ಎಚ್. ಪರಶುರಾಮಪ್ಪ, ಇನ್ಸ್‌ಪೆಕ್ಟರ್‌ಗಳಾದ ಎ.ಕರೀಂ ರಾವತರ್, ಕೆ.ಎಸ್.ನಿರಂಜನ ಮತ್ತು ಸಿಬ್ಬಂದಿ ಕಾರ್ಯಾಚರಣೆ ನಡೆಸಿದರು.