ಪ್ರೀತಿಯ ಕೋತಿ ಮರಿಗೆ ದೇವಾಲಯ ಕಟ್ಟಿಸಿದ ಶಾಸಕ

ತೋಟದಲ್ಲಿ ಸಾವನ್ನಪ್ಪಿದ್ದ ಪ್ರೀತಿಯ ಕೋತಿ ಮರಿಗಾಗಿ 20 ಲಕ್ಷ ರೂಪಾಯಿ ವೆಚ್ಚದಲ್ಲಿ ಮಾರುತಿ ದೇವಾಲಯವನ್ನು ಶಾಸಕ ಸಾ.ರಾ ಮಹೇಶ್. ನಿರ್ಮಿಸಿ, ಲೋಕಾರ್ಪಣೆಗೊಳಿಸಿದರು.

ಮೈಸೂರು : ತೋಟದಲ್ಲಿ ಸಾವನ್ನಪ್ಪಿದ್ದ ಪ್ರೀತಿಯ ಕೋತಿ ಮರಿಗಾಗಿ 20 ಲಕ್ಷ ರೂಪಾಯಿ ವೆಚ್ಚದಲ್ಲಿ ಮಾರುತಿ ದೇವಾಲಯವನ್ನು ಶಾಸಕ ಸಾ.ರಾ ಮಹೇಶ್. ನಿರ್ಮಿಸಿ, ಲೋಕಾರ್ಪಣೆಗೊಳಿಸಿದರು.

ಕೋತಿ ಮರಿಗಾಗಿ ದೇವಾಲಯ ನಿರ್ಮಿಸಿದ ಶಾಸಕ

ನಗರದ ಹೊರವಲಯದ ದಟ್ಟಗಳ್ಳಿಯಲ್ಲಿರುವ ತೋಟದ ಮನೆಯಲ್ಲಿ ಗುಂಪಿನಿಂದ ಬೇರ್ಪಟ್ಟ ಕೋತಿ ಮರಿಯೊಂದು, ತೋಟದಲ್ಲಿ ಸಾಕಿರುವ ಕುರಿ ಮರಿಯೊಂದಿಗೆ ಹಾಗೂ ಶಾಸಕ ಮಹೇಶ್​​ ಜೊತೆಗೆ ಅನ್ಯೋನ್ಯವಾಗಿತ್ತು. ಈ ಕೋತಿ ಮರಿ ಶಾಸಕರಿಗೆ ಅಚ್ಚುಮೆಚ್ಚಾಗಿತ್ತು. ಶಾಸಕರು ಹೊಸ ವರ್ಷದ ನಿಮಿತ್ತ ವಿದೇಶ ಪ್ರವಾಸಕ್ಕೆ ತೆರಳಿದ್ದರು. ಈ ವೇಳೆ ವಿದ್ಯುತ್ ಶಾರ್ಟ್ ಸರ್ಕ್ಯೂಟ್​ನಿಂದ ಕೋತಿ ಮರಿ ಸಾವನ್ನಪ್ಪಿತ್ತು.

ಈ ವಿಚಾರ ತಿಳಿದ ಶಾಸಕ ಸಾ.ರಾ.ಮಹೇಶ್, ಕೋತಿಯ ಮೇಲಿನ ಪ್ರೀತಿಯಿಂದ ವಿದೇಶಿ ಪ್ರವಾಸವನ್ನು ಮೊಟಕುಗೊಳಿಸಿ ವಾಪಸ್ ಬಂದು ಕೋತಿಯ ಅಂತ್ಯಕ್ರಿಯೆಯನ್ನು ತಮ್ಮ ತೋಟದಲ್ಲಿ ನೆರವೇರಿಸಿದ್ದರು.

ಈಗ ಕೋತಿಯ ಅಂತ್ಯಕ್ರಿಯೆ ನಡೆಸಿದ ಸ್ಥಳದಲ್ಲೇ ಮಾರುತಿ ದೇವಾಲಯ ಕಟ್ಟಿಸಿದ್ದಾರೆ. ಈ ದೇವಾಲಯದಲ್ಲಿ ಕುರಿ‌ ಮರಿಯ ಮೇಲೆ ಕೋತಿ ಮರಿ ಕುಳಿತಿರುವ ವಿಗ್ರಹವಿದೆ. ಕಲಾವಿದ ಅರುಣ್ ಯೋಗಿರಾಜ್ ವಿಗ್ರಹ ಕೆತ್ತನೆ ಮಾಡಿದ್ದಾರೆ.