ಬೆಂಗಳೂರು ಗಾಂಜಾ ದಂಧೆ...‌ ಬಂಧಿತ ಆರೋಪಿ ಕೈಸರ್​ಗಿದೆ ರಾಜಕೀಯ ನಂಟು!

ಬೆಂಗಳೂರಲ್ಲಿ ಎನ್​ಸಿಬಿ ತಂಡ ಡ್ರಗ್ಸ್ ದಂಧೆಕೋರರ ಜನ್ಮ ಜಾಲಾಡಿದೆ. ಕೋಟ್ಯಂತರ ರೂಪಾಯಿ ಮೌಲ್ಯದ ಗಾಂಜಾ ಸಾಗಣೆ ವಿಚಾರದಲ್ಲಿ ಬಂಧಿತನಾಗಿರುವ ಕೈಸರ್ ಪಾಷ ಮೈಸೂರಿನವನು. ಈತ ಕಳೆದ ಬಾರಿ ಮೈಸೂರು ಮಹಾನಗರ ಪಾಲಿಕೆ ಚುನಾವಣೆಯಲ್ಲಿ ಸ್ಪರ್ಧಿಸಿ ಸೋಲನುಭವಿಸಿದ್ದ.

ಮೈಸೂರು: ಬೆಂಗಳೂರಿನ ಎನ್​ಸಿಬಿ ಪೊಲೀಸರು ಗಾಂಜಾ ದಂಧೆಯಲ್ಲಿ ಮೂವರನ್ನು ಬಂಧಿಸಿದ್ದು, ಅದರಲ್ಲಿ ಕೈಸರ್ ಪಾಷ ಎಂಬ ಆರೋಪಿ ಮೈಸೂರು ಮೂಲದವನಾಗಿದ್ದಾನೆ.

ಬೆಂಗಳೂರಿನ‌ ಎನ್​ಸಿಬಿ ಪೊಲೀಸರು 1 ಕೋಟಿ ಮೌಲ್ಯದ 204 ಕೆಜಿ ಗಾಂಜಾ ವಶಪಡಿಸಿಕೊಂಡಿದ್ದು, ಈ ಕೇಸ್​ನಲ್ಲಿ ಮೂವರನ್ನು ಬಂಧಿಸಲಾಗಿದೆ. ಅದರಲ್ಲಿ ಮೈಸೂರು ಮೂಲದ ಕೈಸರ್ ಪಾಷ ಕೂಡ ಒಬ್ಬ. ಈತ ಶಾಗಿರ್ದ್​​ ಎಂದು ಕರೆಯಲ್ಪಡುತ್ತಿದ್ದ. ಕೈಸರ್​ ಕಳೆದ ಬಾರಿ ಮೈಸೂರು ಮಹಾನಗರ ಪಾಲಿಕೆಯ ಚುನಾವಣೆಯಲ್ಲಿ ಕಾಂಗ್ರೆಸ್​ನಿಂದ ಟಿಕೆಟ್ ಪಡೆಯಲು ವಿಫಲನಾಗಿದ್ದ. ಕೊನೆಗೆ ಜೆಡಿಎಸ್​ನಿಂದ ಟಿಕೆಟ್ ಪಡೆದು ಶಾಂತಿನಗರ ವಾರ್ಡ್​ನಿಂದ ಸ್ಪರ್ಧಿಸಿ 150 ಮತಗಳಿಂದ ಸೋಲನುಭವಿಸಿದ್ದ.

ಕೈಸರ್ ಪಾಷ ಗಾಂಜಾ ಮಾರಾಟದಲ್ಲಿ ಪಳಗಿದವನಾಗಿದ್ದು, ಈತನ ಜಾಲ ಬೃಹತ್​ ಪ್ರಮಾಣದಲ್ಲಿದೆ. ಮೈಸೂರಿನ ಕೆಲವು ಭಾಗಗಳಿಗೂ ಗಾಂಜಾ ಸರಬರಾಜು ಮಾಡುತ್ತಿದ್ದ ಎನ್ನಲಾಗ್ತಿದೆ.

ಈ ಪ್ರಕರಣದಲ್ಲಿ ಬಂಧಿತರಾಗಿರುವ ಆರೋಪಿಗಳು ಸ್ಯಾಂಡಲ್​ವುಡ್​ನ ಖ್ಯಾತ ನಟರು ಮತ್ತು ಸಂಗೀತ ನಿರ್ದೇಶಕರ ಹೆಸರುಗಳನ್ನು ಬಾಯ್ಬಿಟ್ಟಿದ್ದಾರೆ ಎನ್ನಲಾಗ್ತಿದೆ.