ಮೈಸೂರು : ಫಿರಂಗಿ ತಾಲೀಮಿನಲ್ಲಿ ಬೆಚ್ಚಿದ ಗಜಪಡೆ

ಸಂಜೆ ವೇಳೆಗೆ ಈ ಆನೆಗಳು ವಾಪಸ್ ಬರಲಿವೆ. ಮರದ ಅಂಬಾರಿಯನ್ನು ಅಭಿಮನ್ಯು, ಗೋಪಾಲಸ್ವಾಮಿ ಹಾಗೂ ಧನಂಜಯ ಆನೆಗಳು ಭಾರ ಹೊತ್ತಿದ್ದು, ಎಲ್ಲಾ ಆನೆಗಳು ಆರೋಗ್ಯವಾಗಿವೆ.‌ ಯಶಸ್ವಿಯಾಗಿ ಜಂಬೂಸವಾರಿ ಮಾಡಲಿವೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು..

ಮೈಸೂರು :ಜಂಬೂಸವಾರಿ ಮೆರವಣಿಗೆಯಲ್ಲಿ ಭಾಗವಹಿಸುವ ಆನೆಗಳಿಗೆ ಹಾಗೂ ಅಶ್ವಪಡೆಗೆ ಕುಶಾಲತೋಪು ಶಬ್ಧಕ್ಕೆ ಹೆದರದ ರೀತಿಯಲ್ಲಿ ಅರಮನೆ ಮೈದಾನದಲ್ಲಿ 3ನೇ ಬಾರಿ ಫಿರಂಗಿ ತಾಲೀಮನ್ನು ನಡೆಸಲಾಯಿತು. ‌ಈ ವೇಳೆ ಶಬ್ಧಕ್ಕೆ ಲಕ್ಷ್ಮಿ ಹಾಗೂ ಧನಂಜಯ ಆನೆಗಳು ಸ್ವಲ್ಪ ಬೆದರಿದವು. ಅಶ್ವಪಡೆ ಸಹ ಬೆದರಿದ್ದು ಕಂಡು ಬಂತು.

ಈ ಬಗ್ಗೆ ಡಿಸಿಎಫ್ ಕರಿಕಾಳನ್ ಮಾಧ್ಯಮಗಳಿಗೆ ಮಾಹಿತಿ ನೀಡಿದ್ದು, ಜಂಬೂಸವಾರಿ ಮೆರವಣಿಗೆಗೆ ಅಂಬಾರಿ ಆನೆ, ಕುಮ್ಕಿ ಆನೆಗಳು, ನೌಪತ್ ಆನೆ, ನಿಶಾನೆ ಆನೆ ಸೇರಿ ಒಟ್ಟು 5 ಆನೆಗಳು ಸಾಕು. ಆದರೆ, ಇಲ್ಲಿಗೆ ಬಂದ ನಂತರ ಆನೆಗಳ ಆರೋಗ್ಯದಲ್ಲಿ ವ್ಯತ್ಯಾಸಗಳಾಗುತ್ತವೆ. ಆದ್ದರಿಂದ 8 ಆನೆಗಳನ್ನು ಕರೆತರಲಾಗಿದೆ ಎಂದರು.

ವಿಕ್ರಮ ಆನೆ ಮಸ್ತಿಯಲ್ಲಿದೆ. ಈ‌ ಮಸ್ತಿ ನಾಲ್ಕು ತಿಂಗಳು ಇರಲಿದೆ. ಆದ್ದರಿಂದ ಈ ಆನೆಯನ್ನು ಮೆರವಣಿಗೆಯಿಂದ ದೂರ ಇಟ್ಟಿದ್ದೇವೆ. ಅಭಿಮನ್ಯು ಜಂಬೂ ಸವಾರಿ‌ ಹೊರಲಿದೆ. ಕುಮ್ಕಿ ಆನೆಗಳಾಗಿ ಚೈತ್ರಾ ಮತ್ತು ಕಾವೇರಿ ಬಲ‌ ಮತ್ತು ಎಡ ಭಾಗದಲ್ಲಿರಲಿವೆ. ಧನಂಜಯ, ಗೋಪಾಲಸ್ವಾಮಿ ಹಾಗೂ ಅಶ್ವತ್ಥಾಮ ನೌಪತ್ ಹಾಗೂ ನಿಶಾನೆ ಆನೆಗಳಾಗಿವೆ. ಅದರಲ್ಲಿ ಎರಡು ಆನೆಗಳನ್ನು ಬಳಸುತ್ತೇವೆ ಎಂದರು.

ಆನೆಗಳಿಗೆ ಫಿರಂಗಿ ತಾಲೀಮು

ಅರಮನೆಗೆ ಪಟ್ಟದ ಆನೆಯಾಗಿ ರಾಜವಂಶಸ್ಥೆ ಪ್ರಮೋದಾ ದೇವಿ ಒಡೆಯರ್ ವಿಕ್ರಮ ಆನೆಯನ್ನು ಆಯ್ಕೆ ಮಾಡಿದ್ದರು. ಆದರೆ, ಆ ಆನೆ ಮಸ್ತಿಯಲ್ಲಿರುವುದರಿಂದ ಗೋಪಾಲಸ್ವಾಮಿ ಹಾಗೂ ಧನಂಜಯ ಆನೆಯನ್ನು ಪಟ್ಟದ ಆನೆಯಾಗಿ ಕಳುಹಿಸಲಾಗಿದೆ. ಜೊತೆಗೆ ಶ್ರೀರಂಗಪಟ್ಟಣದ ದಸರಾಗೆ ನಾಳೆ ಬೆಳಗ್ಗೆ ಗೋಪಾಲಸ್ವಾಮಿ ಹಾಗೂ ಕಾವೇರಿ ಆನೆಗಳನ್ನು ಕಳುಹಿಸಲಾಗುತ್ತಿದೆ.

ಸಂಜೆ ವೇಳೆಗೆ ಈ ಆನೆಗಳು ವಾಪಸ್ ಬರಲಿವೆ. ಮರದ ಅಂಬಾರಿಯನ್ನು ಅಭಿಮನ್ಯು, ಗೋಪಾಲಸ್ವಾಮಿ ಹಾಗೂ ಧನಂಜಯ ಆನೆಗಳು ಭಾರ ಹೊತ್ತಿದ್ದು, ಎಲ್ಲಾ ಆನೆಗಳು ಆರೋಗ್ಯವಾಗಿವೆ.‌ ಯಶಸ್ವಿಯಾಗಿ ಜಂಬೂಸವಾರಿ ಮಾಡಲಿವೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು.