ಮೈಸೂರಿಗೆ ಬಂದ ವ್ಯಾಕ್ಸಿನ್: ಅಯ್ಯಪ್ಪ ಭಕ್ತರಿಂದ ವಿಭಿನ್ನ ಸ್ವಾಗತ

ಕೊರೊನಾ ವ್ಯಾಕ್ಸಿನ್​ ಮೈಸೂರಿಗೆ ಆಗಮಿಸಿದ್ದು, ಜಿಲ್ಲಾ ಆರೋಗ್ಯಾಧಿಕಾರಿ ಕಚೇರಿಯ ಕೋಲ್ಡ್ ಸ್ಟೋರೇಜ್​ನಲ್ಲಿ ಲಸಿಕೆ ಭದ್ರವಾಗಿ ಇಡಲಾಗಿದೆ. ಇನ್ನು ಕೊರೊನಾ ಲಸಿಕೆ ಆಗಮನ ಹಿನ್ನೆಲೆಯಲ್ಲಿ ಅಯ್ಯಪ್ಪ ಭಕ್ತರು ವಿಭಿನ್ನವಾಗಿ ಸ್ವಾಗತಿಸಿದ್ದಾರೆ.

ಮೈಸೂರು: ಬಹುನಿರೀಕ್ಷಿತ ಕೋವಿಡ್ ಲಸಿಕೆ ಮೈಸೂರಿಗೆ ಬಂದಿಳಿದಿದ್ದು, ಜಿಲ್ಲಾ ಆರೋಗ್ಯಾಧಿಕಾರಿ ಕಚೇರಿಯ ಕೋಲ್ಡ್ ಸ್ಟೋರೇಜ್​ನಲ್ಲಿ ಲಸಿಕೆ ಭದ್ರವಾಗಿ ಇಡಲಾಗಿದೆ.

ರಾತ್ರಿ 11:30ಕ್ಕೆ ಮೈಸೂರಿಗೆ ಕೊರೊನಾ ವ್ಯಾಕ್ಸಿನ್ ತರಲಾಗಿದ್ದು, ಕೋಲ್ಡ್ ಸ್ಟೋರೇಜ್​ನಲ್ಲಿ 47ಸಾವಿರ ಡೋಸೇಜ್​ ದಾಸ್ತಾನು ಇಡಲಾಗಿದೆ. 20,500 ಡೋಸೇಜ್​ ಮೈಸೂರು ಜಿಲ್ಲೆಗೆ ನಿಗದಿ ಮಾಡಲಾಗಿದೆ. ಉಳಿದ ಡೋಸೆಜ್ ಚಾಮರಾಜನಗರ, ಮಂಡ್ಯ, ಕೊಡಗು, ಹಾಗೂ ಹಾಸನಕ್ಕೆ ಹಂಚಿಕೆ ಮಾಡಲಾಗುತ್ತದೆ. ಮೈಸೂರಿನಿಂದ ಇತರ ಜಿಲ್ಲೆಗಳಿಗೆ ಲಸಿಕೆ ತಲುಪಲಿದೆ. ಲಸಿಕೆ ವಿತರಣೆಗೆ ಜಿಲ್ಲಾಡಳಿತ ಸಜ್ಜುಗೊಂಡಿದೆ.

ಇನ್ನು, ಮಕರ ಸಂಕ್ರಾಂತಿ ಹಬ್ಬದಂದು ಸಾಂಸ್ಕೃತಿಕ ನಗರಿಗೆ ವ್ಯಾಕ್ಸಿನ್​ ಬಂದಿದೆ. ಕೊರೊನಾ ವ್ಯಾಕ್ಸಿನ್​ಗೆ ಅಯ್ಯಪ್ಪ ಭಕ್ತರು ವಿನೂತನವಾಗಿ ಸ್ವಾಗತ ಕೋರಿದ್ದಾರೆ. "ಕೊರೊನಾ ಆಗಲಿ ಭೂಗತ, ವ್ಯಾಕ್ಸಿನ್​ಗೆ ಸಂಕ್ರಾಂತಿಯ ಸ್ವಾಗತ" ಎಂದು ಸ್ವಾಗತ ಕೋರಿದ್ದಾರೆ. ದೂರಾಗಲಿ ಕೊರೊನಾ, ಸಂಕ್ರಾಂತಿ ತರಲಿ ಸುಗ್ಗಿಯೂಟ, ತೊಲಗಲಿ ಕೊರೊನಾ ಭೀತಿ, ಸಂಕ್ರಾಂತಿ ತರಲಿ ಸಂಪ್ರೀತಿ ಎಂದು ಮೈಸೂರಿನ ಜನತಾನಗರದ ಅಯ್ಯಪ್ಪ‌ಸ್ವಾಮಿ ದೇವಾಲಯದ ಮುಂಭಾಗ ವಿವಿಧ ಘೋಷಣೆಗಳನ್ನ ಬರೆಯುವ ಮೂಲಕ ಸಂಕ್ರಾಂತಿ ಆಚರಿಸುತ್ತಿದ್ದಾರೆ .