ಖಾತೆಗೆ 5 ಸಾವಿರ ರೂ. ಜಮಾ: ನಿರಾಳರಾದ ಆಟೋ ಚಾಲಕರು

ಲಾಕ್​​ಡೌನ್​ ಸಡಿಲಿಕೆ ಬಳಿಕ ಆಟೋ ಚಾಲಕರು ರಸ್ತೆಗಿಳಿದಿದ್ದಾರೆ. ಆದರೆ ಪ್ರಯಾಣಿಕರ ಕೊರತೆ ಎದುರಿಸುತ್ತಿದ್ದಾರೆ. ಈ ನಡುವೆ ರಾಜ್ಯ ಸರ್ಕಾರ ಘೋಷಿಸಿದ್ದ 5 ಸಾವಿರ ರೂ. ಸಹಾಯಧನ ಆಟೋ ಚಾಲಕರ ಖಾತೆಗಳಿಗೆ ಜಮಾವಣೆಯಾಗಿದ್ದು, ಚಾಲಕರು ಸಂತಸಗೊಂಡಿದ್ದಾರೆ.

ಮೈಸೂರು:ಲಾಕ್​​ಡೌನ್ ಹಿನ್ನೆಲೆಯಲ್ಲಿ ಕಂಗಾಲಾಗಿದ್ದ ಆಟೋ ಚಾಲಕರ ಖಾತೆಗೆ 5000 ರೂಪಾಯಿ ಸಂದಾಯವಾಗಿದೆ. ರಾಜ್ಯ ಸರ್ಕಾರ ಹಣ ಜಮೆ ಮಾಡಿರುವುದರಿಂದ ಆಟೋ ಚಾಲಕರ ಮುಖದಲ್ಲಿ ಕೊಂಚ ನಿರಾಳತೆ ಮೂಡಿದೆ.

ಕೊರೊನಾ ವೈರಸ್ ಹರಡದಂತೆ ತಡೆಯುವ ಉದ್ದೇಶದಿಂದ ಎರಡು ತಿಂಗಳು ಲಾಕ್​​ಡೌನ್ ಮಾಡಲಾಗಿತ್ತು. ಈ ಹಿನ್ನೆಲೆಯಲ್ಲಿ ಕೂಲಿ ಕಾರ್ಮಿಕರು, ನೇಕಾರರು, ಸವಿತಾ ಸಮಾಜ, ಟ್ಯಾಕ್ಸಿ-ಆಟೋ ಡ್ರೈವರ್ಸ್​ ಸೇರಿದಂತೆ ಅನೇಕ ಸಣ್ಣ ಸಣ್ಣ ಉದ್ಯಮಿಗಳು ಭಾರೀ ಸಂಕಷ್ಟ ಎದುರಿಸಬೇಕಾಯಿತು.

ಇದರಿಂದ ಸರ್ಕಾರ ಕೆಲ ವಲಯಗಳಿಗೆ ಸಹಾಯಧನ ನೀಡಲು ಮುಂದಾಗಿತ್ತು. ಪರಿಣಾಮ ಅನೇಕರಿಗೆ ಸಹಾಯಧನದಿಂದ ಅನುಕೂಲವಾಗಿದೆ. ಎರಡೂವರೆ ತಿಂಗಳಿಂದ ಆಟೋ ಓಡಿಸದೆ ಕಂಗಾಲಾಗಿದ್ದ ಆಟೋ ಚಾಲಕರು ಆಹಾರ ಪದಾರ್ಥಗಳ ಕಿಟ್​ಗಳನ್ನು ಪಡೆದು ಹಾಗೂ ಸಾಲ ಮಾಡಿ ಜೀವನ ದೂಡಿದ್ದಾರೆ.

ರಾಜ್ಯ ಸರ್ಕಾರ ಕೊಟ್ಟ ಮಾತಿನಂತೆ 5000 ರೂಪಾಯಿ ಆಟೋ ಚಾಲಕರಿಗೆ ನೀಡುತ್ತಿರುವುದರಿಂದ ಚಾಲಕರಿಗೆ ಖುಷಿಯಾಗಿದೆ. ಸರ್ಕಾರ ಕೇಳಿರುವ ದಾಖಲಾತಿಗಳನ್ನು ಒದಗಿಸಿರುವ ಚಾಲಕರಿಗೆ ಮಾತ್ರ ಸರ್ಕಾರದ ನೆರವು‌ ಸಿಗುತ್ತಿದೆ.