ಮೈಸೂರು: ವೃದ್ಧೆಯ 4 ಎಕರೆ ಬಾಳೆತೋಟ ನಾಶ; ಪರಿಹಾರಕ್ಕಾಗಿ ಅಂಗಲಾಚಿದ ವಿಡಿಯೋ ವೈರಲ್​..

ಮೈಸೂರು ಜಿಲ್ಲೆಯ ತಿ.ನರಸೀಪುರ ತಾಲೂಕಿನ ವಾಟಾಳು ಗ್ರಾಮದ ರೈತ ಮಹಿಳೆ ಲಕ್ಷ್ಮಮ್ಮ ತನ್ನ ಜಮೀನಿನಲ್ಲಿ ಬೆಳೆದ ಸುಮಾರು 4 ಎಕರೆ ಬಾಳೆಯನ್ನು ಪಕ್ಕದ ಜಮೀನಿನ ವ್ಯಕ್ತಿಯೊಬ್ಬರು ದ್ವೇಷದ ಕಾರಣಕ್ಕೆ ಕಡಿದು ನಾಶ ಮಾಡಿದ್ದಾರೆ ಎಂದು ಆರೋಪಿಸಿದ್ದಾರೆ.

ಮೈಸೂರು: ಪಕ್ಕದ ಜಮೀನಿನ ವ್ಯಕ್ತಿಯೊಬ್ಬ ದ್ವೇಷದ ಕಾರಣಕ್ಕೆ ಮಹಿಳೆಯೊಬ್ಬರು ಬೆಳೆದಿದ್ದ ಬಾಳೆಯನ್ನು ರಾತ್ರೋರಾತ್ರಿ ಕಡಿದು ಹಾಕಿದ್ದು , ಇದೀಗ ಕಂಗಾಲಾದ ಮಹಿಳೆ ನ್ಯಾಯಕ್ಕಾಗಿ ಅಂಗಲಾಚುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.

ಜಿಲ್ಲೆಯ ತಿ.ನರಸೀಪುರ ತಾಲೂಕಿನ ವಾಟಾಳು ಗ್ರಾಮದ ರೈತ ಮಹಿಳೆ ಲಕ್ಷ್ಮಮ್ಮ ತನ್ನ ಜಮೀನಿನಲ್ಲಿ ಸುಮಾರು ‌4 ಲಕ್ಷ ಖರ್ಚು ಮಾಡಿ ಬಾಳೆ ಬೆಳೆ ಹಾಕಿದ್ದಳು. ಬೆಳೆಯೂ ಕೈಗೆ ಬರುವ ಹಂತದಲ್ಲಿತ್ತು. ಆದರೆ ಪಕ್ಕದ ಜಮೀನಿನ ವ್ಯಕ್ತಿ ರಾತ್ರಿ ವೇಳೆ ಬಂದು ಬಾಳೆ ಬೆಳೆಯನ್ನು ನಾಶಮಾಡಿದ್ದಾನೆ. ಬೆಳಿಗ್ಗೆ ಜಮೀನಿಗೆ ಹೋಗಿ ನೋಡಿದಾಗ ಬೆಳೆ ನಾಶವಾಗಿತ್ತು. ಈ ಹಿಂದೆಯೂ ಒಂದು ಬಾರಿ ಇದೇ ವ್ಯಕ್ತಿ ನೀರಿನ ಪೈಪ್​ನ್ನು ಕಟ್ ಮಾಡಿ ತೊಂದರೆ ನೀಡಿದ್ದ ಎನ್ನಲಾಗಿದೆ. ಸಾಲ ಮಾಡಿ ಬೆಳೆ ಬೆಳೆದಿದ್ದ ಲಕ್ಷ್ಮಮ್ಮ ಈಗ ಸಾಲ ತೀರಿಸಲು ಆಗದೆ, ಬೆಳೆ ಕೈಗೆ ಸೇರದೆ ಕಂಗಾಲಾಗಿದ್ದಾರೆ.

ಪಕ್ಕದ ಜಮೀನಿನವನೇ ಹೀಗೆ ಬೆಳೆ ನಾಶ ಮಾಡಿದ್ದಾನೆ. ಅದಲ್ಲದೆ ನನಗೆ ಕೊಲೆ ಬೆದರಿಕೆ ಸಹ ಹಾಕಿದ್ದಾನೆ. ನಾನು ಸಾಲ, ಬಡ್ಡಿ ಹೇಗೆ ತೀರಿಸಬೇಕು? ನನಗೆ ತುಂಬಾ ತೊಂದರೆಯಾಗಿದೆ. ಇದಕ್ಕೆ ಸಂಬಂಧಪಟ್ಟ ಅಧಿಕಾರಿಗಳು ಸಹಾಯ ಮಾಡಬೇಕು. ಇಲ್ಲವಾದರೆ ತೆಗೆದುಕೊಂಡ ಸಾಲ ತೀರಿಸಲಾಗದೆ ಆತ್ಮಹತ್ಯೆ ಮಾಡಿಕೊಳ್ಳುವುದೇ ನನಗಿರುವ ದಾರಿ ಎಂದು ತಮ್ಮ ಅಳಲು ತೋಡಿಕೊಂಡಿದ್ದಾರೆ.

ಈ ಸಂಬಂಧ ತಿ.ನರಸೀಪುರ ಪೊಲೀಸ್​ ಠಾಣೆಯಲ್ಲಿ ಲಕ್ಷ್ಮಮ್ಮ ದೂರು ನೀಡಿದ್ದರೂ ಯಾವುದೇ ಕ್ರಮ ಕೈಗೊಂಡಿಲ್ಲ. ಪರಿಹಾರ ಒದಗಿಸುವಂತೆ ಲಕ್ಷ್ಮಮ್ಮ ಅಧಿಕಾರಿಗಳಿಗೆ ಮನವಿ ಮಾಡಿದ್ದು, ಸದ್ಯ ಈ ವಿಡಿಯೋ ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.