2ನೇ ಹಂತದ ಗ್ರಾಪಂ ಚುನಾವಣೆ.. ಮಂಡ್ಯ ಜಿಲ್ಲಾಡಳಿತದಿಂದ ಸಕಲ ಸಿದ್ಧತೆ

ಗ್ರಾಪಂ ಚುನಾವಣೆಯಲ್ಲಿ ಮತದಾನ ಮಾಡುವವರು ಆಯೋಗ ಸೂಚಿಸಿರುವ 21 ಮತದಾರರ ಗುರುತಿನ ದಾಖಲೆಗಳಲ್ಲಿ ಯಾವುದಾದರೂ ಹಾಜರುಪಡಿಸುವುದು ಕಡ್ಡಾಯವಾಗಿದೆ..

ಮಂಡ್ಯ:ಸಕ್ಕರೆ ನಾಡಿನಲ್ಲಿ ಎರಡನೇ ಹಂತದ ಗ್ರಾಮ ಪಂಚಾಯತ್‌ ಸಾರ್ವತ್ರಿಕ ಚುನಾವಣೆ ಭಾನುವಾರ ನಡೆಯಲಿದ್ದು, ಜಿಲ್ಲಾಡಳಿತ ಸಕಲ ಸಿದ್ಧತೆ ಕೈಗೊಂಡಿದೆ.

ಪಾಂಡವಪುರ ವಿಭಾಗದ ನಾಲ್ಕು ತಾಲೂಕುಗಳ 104 ಗ್ರಾಪಂನ 1786 ಸ್ಥಾನಗಳ ಪೈಕಿ 185 ಸದಸ್ಯ ಸ್ಥಾನಗಳಿಗೆ ಅವಿರೋಧ ಆಯ್ಕೆ ನಡೆದಿದೆ. ಉಳಿದ 1,598 ಸದಸ್ಯ ಸ್ಥಾನಗಳಿಗೆ ಅಂತಿಮವಾಗಿ 4,004 ಮಂದಿ ಕಣದಲ್ಲಿದ್ದಾರೆ.

ಭಾನುವಾರ ಬೆಳಗ್ಗೆ 7 ರಿಂದ ಸಂಜೆ 5 ಗಂಟೆಯುವರೆಗೆ ಮತದಾನ ನಡೆಯಲಿದೆ. ಕೊನೆಯ ಒಂದು ಗಂಟೆಯಲ್ಲಿ ಕೊರೊನಾ ಸೋಂಕಿತರು ಮತದಾನ ಮಾಡುವುದಕ್ಕೆ ಅವಕಾಶ ಮಾಡಿಕೊಡಲಾಗಿದೆ.

ಮತದಾರರು, ಮತಗಟ್ಟಿ ಎಷ್ಟು?:ಪಾಂಡವಪುರದಲ್ಲಿ 64,160 ಪುರುಷರು, 64,297 ಮಹಿಳೆಯರು ಹಾಗೂ 3 ಇತರರು ಸೇರಿ ಒಟ್ಟು 1,28 457 ಮಂದಿ ಮತದಾನದ ಹಕ್ಕು ಹೊಂದಿದ್ದಾರೆ. 58 ಸೇವಾ ಮತದಾರರಿದ್ದು, 916 ಮತಗಟ್ಟೆ ಸಿಬ್ಬಂದಿಯನ್ನು ನೇಮಿಸಿದೆ. 176 ಮತಗಟ್ಟೆಗಳನ್ನು ತೆರೆದಿದ್ದು, ಹೆಚ್ಚುವರಿಯಾಗಿ 23 ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದೆ. 30 ಸೂಕ್ಷ 203 ಸೂಕ್ತ. ಹಾಗೂ 2 ವಲ್ನರಬಲ್ ಮತಗಟ್ಟೆ ಹಾಗೂ ಉಳಿದವು ಸಾಮಾನ್ಯ ಮತಗಟ್ಟೆಗಳನ್ನಾಗಿ ಮಾಡಲಾಗಿದೆ.

ಕೆಆರ್‌ಪೇಟೆಯಲ್ಲಿ 95,448 ಪುರುಷರು, 92,993 ಮಹಿಳೆಯರು, 5 ಇತರರು ಸೇರಿ ಒಟ್ಟು 1,88 446 ಮಂದಿ ಮತದಾನದ ಹಕ್ಕು ಹೊಂದಿದ್ದಾರೆ. 94 ಸೇವಾ ಮತದಾರರಿದ್ದು, 1,485 ಮತಗಟ್ಟೆ ಸಿಬ್ಬಂದಿ ನಿಯೋಜಿಸಲಾಗಿದೆ. 256 ಮತಗಟ್ಟೆಗಳನ್ನು ಸ್ಥಾಪಿಸಿದ್ದು, ಹೆಚ್ಚುವರಿಯಾಗಿ 41 ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದೆ. 40 ಸೂಕ್ಷ್ಮ, 34 ಅತಿ ಸೂಕ್ಷ್ಮ, ಉಳಿದವು ಸಾಮಾನ್ಯ ಮತಗಟ್ಟೆಗಳಾಗಿವೆ.

ಶ್ರೀರಂಗಪಟ್ಟಣದಲ್ಲಿ 62,871, ಪುರುಷರು, 61,909 ಮಹಿಳೆಯರು, 6 ಇತರರು ಸೇರಿ ಒಟ್ಟು 1,26,780 ಮಂದಿ ಮತದಾನದ ಹಕ್ಕು ಹೊಂದಿದ್ದಾರೆ. 56 ಸೇವಾ ಮತದಾರರಿದ್ದು, 1,150 ಮತಗಟ್ಟೆ ಸಿಬ್ಬಂದಿ ನೇಮಿಸಿದೆ.163 ಮತಗಟ್ಟೆಗಳನ್ನು ಸ್ಥಾಪಿಸಿದ್ದು, ಹೆಚ್ಚುವರಿಯಾಗಿ 36 ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದೆ. 30 ಸೂಕ್ಷ್ಮ, 18 ಅತಿಸೂಕ್ಷ್ಮ,ವಲರಬಲ್, ಉಳಿದವು ಸಾಮಾನ್ಯ ಮತಗಟ್ಟೆಗಳಾಗಿವೆ.

ನಾಗಮಂಗಲದಲ್ಲಿ 69,184 ಪುರುಷರು, 68,148 ಮಹಿಳೆಯರು, 15 ಇತರರು ಸೇರಿ ಒಟ್ಟು 1,37,347 ಮತದಾರರು ಹಕ್ಕು ಹೊಂದಿದ್ದಾರೆ. 64 ಸೇವಾ ಮತದಾರರಿದ್ದು, 1,156 ಮತಗಟ್ಟೆ ಸಿಬ್ಬಂದಿ ನಿಯೋಜಿಸಿದೆ. 224 ಮತಗಟ್ಟೆಗಳನ್ನು ಸ್ಥಾಪಿಸಿದ್ದು, ಹೆಚ್ಚುವರಿಯಾಗಿ 27 ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದೆ. 63 ಸೂಕ್ಷ್ಮ 4 ಅತಿ ಸೂಕ್ಷ್ಮ, 4 ವಲರಬಲ್, ಉಳಿದವು ಸಾಮಾನ್ಯ ಮತಗಟ್ಟೆಗಳಾಗಿರುತ್ತವೆ.

ಮತ ಕೇಂದ್ರಗಳೆಷ್ಟು?:ಪಾಂಡವಪುರದಲ್ಲಿ 176 ಮುಖ್ಯ ಮತ ಕೇಂದ್ರಗಳು, 23 ಹೆಚ್ಚುವರಿ ಮತ ಕೇಂದ್ರಗಳು ಸೇರಿ 199, ಶ್ರೀರಂಗಪಟ್ಟಣದಲ್ಲಿ 163 ಮುಖ್ಯ ಮತಕೇಂದ್ರ, 36 ಹೆಚ್ಚುವರಿ ಸೇರಿ 199, ಕೆ.ಆರ್.ಪೇಟೆಯಲ್ಲಿ 256 ಮುಖ್ಯ, 41 ಹೆಚ್ಚುವರಿ ಸೇರಿ 297 ಮತ ಕೇಂದ್ರಗಳು, ನಾಗಮಂಗಲದಲ್ಲಿ 224 ಮುಖ್ಯ, 27 ಹೆಚ್ಚುವರಿ ಸೇರಿ 251 ಮತ ಕೇಂದ್ರಗಳನ್ನು ತೆರೆಯಲಾಗಿದೆ.

ಯಾವ ತಾಲೂಕಿನಲ್ಲಿ ಎಷ್ಟು ಸ್ಥಾನ? :

1. ಪಾಂಡವಪುರದ 23 ಗ್ರಾಪಂಗಳ 412 ಸ್ಥಾನಗಳಲ್ಲಿ 55 ಸ್ಥಾನಗಳಿಗೆ ಅವಿರೋಧ ಆಯ್ಕೆಯಾಗಿದ್ದು, 355 ಸದಸ್ಯ ಸ್ಥಾನಗಳಿಗೆ ಚುನಾವಣೆ ನಡೆಯಬೇಕಿದೆ. 2 ಸ್ಥಾನಗಳಿಗೆ ಮಾತ್ರ ನಾಮಪತ್ರ ಸಲ್ಲಿಕೆಯಾಗದೆ. ಖಾಲಿ ಉಳಿದ ಒಟ್ಟು 852 ಮಂದಿ ‌ಕಣದಲ್ಲಿ ಉಳಿದಿದ್ದಾರೆ.

2. ಶ್ರೀರಂಗಪಟ್ಟಣದ 21 ಗ್ರಾಪಂಗಳ 398 ಸ್ಥಾನಗಳಲ್ಲಿ 26 ಮಂದಿ ಅವಿರೋಧ ಆಯ್ಕೆಯಾಗಿದ್ದಾರೆ. 1 ಸ್ಥಾನಕ್ಕೆ ನಾಮಪತ್ರ ಸಲ್ಲಿಕೆಯಾಗಿಲ್ಲ. ಚುನಾವಣೆ ನಡೆಯಲಿರುವ 371 ಸ್ಥಾನಗಳಿಗೆ ಒಟ್ಟು 953 ಮಂದಿ ಕಣದಲ್ಲಿ ಉಳಿದಿದ್ದಾರೆ.

3. ಕೆ.ಆರ್.ಪೇಟೆಯಲ್ಲಿ 33 ಗ್ರಾಪಂಗಳ 587 ಸದಸ್ಯ ಸ್ಥಾನಗಳಲ್ಲಿ 48 ಸ್ಥಾನಗಳಿಗೆ ಅವಿರೋಧ ಆಯ್ಕೆಯಾಗಿದೆ. ಉಳಿದ $39 ಸ್ಥಾನಗಳಿಗೆ 1,404 ಮಂದಿ ಕಣದಲ್ಲಿ ಉಳಿದುಕೊಂಡಿದ್ದಾರೆ.

4. ನಾಗಮಂಗಲದ 27 ಗ್ರಾಪಂಗಳ 389 ಸ್ಥಾನಗಳಲ್ಲಿ 56 ಸ್ಥಾನಗಳಿಗೆ ಅವಿರೋಧ ಆಯ್ಕೆ ನಡೆದಿದೆ. ಚುನಾವಣೆ ನಡೆಯಲಿರುವ 333 ಸ್ಥಾನಗಳಿಗೆ ಕಣದಲ್ಲಿ 795 ಮಂದಿ ಉಳಿದುಕೊಂಡಿದ್ದಾರೆ.

ಗುರುತಿನ ಚೀಟಿ ಕಡ್ಡಾಯ :ಗ್ರಾಪಂ ಚುನಾವಣೆಯಲ್ಲಿ ಮತದಾನ ಮಾಡುವವರು ಆಯೋಗ ಸೂಚಿಸಿರುವ 21 ಮತದಾರರ ಗುರುತಿನ ದಾಖಲೆಗಳಲ್ಲಿ ಯಾವುದಾದರೂ ಹಾಜರುಪಡಿಸುವುದು ಕಡ್ಡಾಯವಾಗಿದೆ.