ಮಂಡ್ಯ:ಜಮೀನು ರಸ್ತೆಯಲ್ಲಿ ಕಲ್ಲು ಎತ್ತಿ ಹಾಕಿ ವ್ಯಕ್ತಿವೋರ್ವನನ್ನು ಕೊಲೆಗೈದಿದ್ದ ಆರೋಪಿಗಳನ್ನು ಶ್ರೀರಂಗಪಟ್ಟಣ ಗ್ರಾಮಾಂತರ ಠಾಣೆಯ ಪೊಲೀಸರು ಬಂಧಿಸಿದ್ದಾರೆ. ಶ್ರೀರಂಗಪಟ್ಟಣ ತಾಲೂಕಿನ ಕರೀಘಟ್ಟ-ಗಂಜಾಂನ ಕಾವೇರಿ ಸೇತುವೆ ಸಮೀಪದ ಜಮೀನು ರಸ್ತೆಯಲ್ಲಿ ಘಟನೆ ಸಂಭವಿಸಿತ್ತು.
ಪುರಸಭೆ ವ್ಯಾಪ್ತಿಯ ಗಂಜಾಂ ಪೇಟೆಬೀದಿ ರಾಮಮಂದಿರ ಬಳಿಯ ನಿವಾಸಿ ಅನಂತ (45)ನನ್ನು ಕಿರಾತಕರು ಹತ್ಯೆಗೈದಿದ್ದರು. ಕೊಲೆಯಾದ ಅನಂತ್ನ ಸ್ನೇಹಿತರಾದ ಗಂಜಾಂನ ದೊಡ್ಡ ಬೆಸ್ತಗೇರಿಯ ನಿವಾಸಿ ಬಜಣ್ಣ ಹಾಗೂ ಅಂಬೇಡ್ಕರ್ ಬೀದಿಯ ಪಾಪಣ್ಣ ಕೊಲೆ ಮಾಡಿ ತಲೆಮರೆಸಿಕೊಂಡಿದ್ದರು.
ಹಣದ ವಿಚಾರಕ್ಕೆ ಕೊಲೆ: ಮೃತನ ಬಳಿ ಆರೋಪಿಗಳು 5ಸಾವಿರ ರೂ. ಸಾಲ ಪಡೆದಿದ್ದರು. ಹಣ ಹಿಂದಿರುಗಿಸುವ ವಿಚಾರಕ್ಕೆ ಇವರ ನಡುವೆ ಜಗಳ ನಡೆದಿದೆ. ಕೊನೆಗೆ ನಿರ್ಜನ ಪ್ರದೇಶಕ್ಕೆ ಪ್ಯಾಸೆಂಜರ್ ಆಟೋದಲ್ಲಿ ಅನಂತ್ನನ್ನು ಕರೆದೊಯ್ದು ತಲೆಯ ಮೇಲೆ ಕಲ್ಲು ಎತ್ತಿಹಾಕಿ ಕೊಲೆ ಮಾಡಿರುವುದಾಗಿ ಆರೋಪಿಗಳು ಪೊಲೀಸರ ಮುಂದೆ ತಪ್ಪೊಪ್ಪಿಕೊಂಡಿದ್ದಾರೆ.
ಡಿವೈಎಸ್ಪಿ ಸಂದೇಶ್ ಕುಮಾರ್ ನಿರ್ದೇಶನದಂತೆ ಗ್ರಾಮಾಂತರ ಠಾಣೆ ಇನ್ಸ್ಪೆಕ್ಟರ್ ವಿವೇಕಾನಂದ ಹಾಗೂ ಸಿಬ್ಬಂದಿ ಕೇವಲ 2 ದಿನಗಳಲ್ಲಿ ಕ್ಷಿಪ್ರ ಕಾರ್ಯಚರಣೆ ನಡೆಸಿ ಆರೋಪಿಗಳನ್ನು ಬಂಧಿಸಿದ್ದಾರೆ. ಎಸ್ಪಿ ಡಾ.ಅಶ್ವಿನಿ ಅವರು ಪೊಲೀಸರನ್ನು ಅಭಿನಂದಿಸಿದ್ದಾರೆ.