ಶ್ರೀರಂಗಪಟ್ಟಣದಲ್ಲಿ ಖಾತ್ರಿಯಾಗದ ಮೈತ್ರಿ... ಸುಮಲತಾಗೆ ಜೈ ಎಂದ ಕೈ ಕಾರ್ಯಕರ್ತರು!

ಮೈತ್ರಿ ಸರ್ಕಾರದ ವಿರುದ್ಧ ಕೆಂಡ ಕಾರುತ್ತಿರುವ ತಳಮಟ್ಟದ ಕಾರ್ಯಕರ್ತರು ಮತ್ತೆ ಸಿಡಿದೆದ್ದಿದ್ದಾರೆ. ಇಂದು ಜಿಲ್ಲೆಯಲ್ಲಿ ನಡೆದ ಬ್ಲಾಕ್​ ಕಾಂಗ್ರೆಸ್ ಸಭೆಯಲ್ಲಿ ಸುಮಲತಾಗೆ ಜೈಕಾರ ಕೂಗಿದ್ದು ಆಶ್ಚರ್ಯ ಉಂಟುಮಾಡಿತು.

ಮಂಡ್ಯ:ಜಿಲ್ಲೆಯಲ್ಲಿ ಮೈತ್ರಿ ಅಭ್ಯರ್ಥಿಗೆ ಇನ್ನು ಕಾಂಗ್ರೆಸ್​ ಬೆಂಬಲ ಸರಿಯಾಗಿ ಸಿಕ್ಕಿಲ್ಲ. ಮೇಲ್ಮಟ್ಟದಲ್ಲಿ ಮೈತ್ರಿಯಾದರೂ ಕಾರ್ಯಕರ್ತರ ಮಟ್ಟದಲ್ಲಿ ಮೈತ್ರಿಯ ಕುರುಹು ಇನ್ನು ಪತ್ತೆಯಾಗಿಲ್ಲ.

ಹೌದು, ಮೈತ್ರಿ ಅಭ್ಯರ್ಥಿಗೆ ಬೆಂಬಲ ಕೊಡುವ ವಿಚಾರವಾಗಿ ಶ್ರೀರಂಗಪಟ್ಟಣ ಬ್ಲಾಕ್​ ಕಾಂಗ್ರೆಸ್ ಕರೆದಿದ್ದ ಕಾರ್ಯಕರ್ತರ ಸಭೆಯಲ್ಲಿ ಅಸಮಾಧಾನ ಭುಗಿಲೆದ್ದಿದೆ.

ಜೆಡಿಎಸ್​ ಜೊತೆಗಿನ‌ ಮೈತ್ರಿಗೆ ಶ್ರೀರಂಗಪಟ್ಡಣದಲ್ಲಿ ವಿರೋಧ ವ್ಯಕ್ತವಾಯಿತು. ಜಿಲ್ಲಾಧ್ಯಕ್ಷ ಸಿ.ಡಿ‌.ಗಂಗಾಧರ್ ಮುಂದೆಯೇ ಮುಖ್ಯಮಂತ್ರಿ ಕುಮಾರಸ್ವಾಮಿ ಸೇರಿದಂತೆ ಜಿಲ್ಲಾ ಉಸ್ತುವಾರಿ ಸಚಿವ ಪುಟ್ಟರಾಜು ಮತ್ತು ಕಣದಲ್ಲಿರುವ ಅಭ್ಯರ್ಥಿಗೆ ಕೈ ಕಾರ್ಯಕರ್ತರು ಧಿಕ್ಕಾರ ಕೂಗಿ ಆಕ್ರೋಶ ವ್ಯಕ್ತಪಡಿಸಿದರು. ಇನ್ನು ಕಾರ್ಯಕರ್ತರ ವಿರೋಧಕ್ಕೆ ಸಭೆಯನ್ನು ಅರ್ಧಕ್ಕೆ ಮೊಟಕುಗೊಳಿಸಲಾಯಿತು. ಈ ಸಂದರ್ಭದಲ್ಲಿ ಕೆಲ ಕಾರ್ಯಕರ್ತರು ಸುಮಲತಾಗೆ ಜೈಕಾರ ಕೂಗಿ, ಸುಮಲತಾ ಅವರನ್ನು ಬೆಂಬಲಿಸಲು ನಿರ್ಧಾರ ಸಹ ಕೈಗೊಂಡರು.