ನೀತಿ ಸಂಹಿತೆ ಉಲ್ಲಂಘನೆ: ಚೆಕ್​ಪೋಸ್ಟ್​ನಲ್ಲಿ ತಡೆದರೂ ಕಾರು ನಿಲ್ಲಿಸದೇ ತೆರಳಿದ ಗೃಹ ಸಚಿವ

ಉಪ ಚುನಾವಣೆಯ ನಿಯಮವನ್ನು ಗೃಹ ಸಚಿವರೇ ಮುರಿದ ಘಟನೆ ಮಂಡ್ಯ ಜಿಲ್ಲೆಯ ಚೆಕ್ ಪೋಸ್ಟ್‌ನಲ್ಲಿ ನಡೆದಿದೆ.

ಮಂಡ್ಯ: ಉಪ ಚುನಾವಣೆ ಜಾರಿಯಾಗಿರುವ ಕ್ಷೇತ್ರಗಳಲ್ಲಿ ನೀತಿ ಸಂಹಿತೆ ಜಾರಿಯಲ್ಲಿದ್ದು, ಚೆಕ್​​ಪೋಸ್ಟ್​ಗಳಲ್ಲಿ ಪ್ರತಿ ವಾಹನಗಳ ತಪಾಸಣೆ ನಡೆಸಿಯೇ ಮುಂದೆ ಕಳುಹಿಸಲಾಗುತ್ತಿದೆ.

ಆದರೆ ಬೆಂಗಳೂರಿನಿಂದ ಮೈಸೂರು ಕಡೆಗೆ ಹೋಗುತ್ತಿದ್ದ ಗೃಹ ಸಚಿವರ ಕಾರನ್ನು ಮಂಡ್ಯ ಸಮೀಪದ ಹನಕೆರೆ ಬಳಿ ತಪಾಸಣೆಗೆ ಅಧಿಕಾರಿಗಳು ಕೈ ಒಡ್ಡಿ ನಿಲ್ಲಿಸಲು ಯತ್ನಿಸಿದರೂ ನಿಲ್ಲಿಸದೇ ತೆರಳಿದ್ದಾರೆ. ಈ ಮೂಲಕ ಗೃಹ ಸಚಿವರೇ ನೀತಿ ಸಂಹಿತೆ ಉಲ್ಲಂಘಿಸಿದ ಆರೋಪ ಕೇಳಿ ಬಂದಿದೆ.

ಕಾರನ್ನು ನಿಲ್ಲಿಸದೇ ತೆರಳಿದ ಎಕ್ಸ್‌ಕ್ಲ್ಯೂಸಿವ್ ವಿಡಿಯೋ ಈ ಟಿವಿ ಭಾರತ್​ಗೆ ಲಭ್ಯವಾಗಿದೆ. ಇಂದು ಬೆಳಗ್ಗೆ ಸುಮಾರು 10.40ರ ಸಮಯದಲ್ಲಿ ಬೆಂಗಳೂರು ಕಡೆಯಿಂದ ಮೈಸೂರು ಕಡೆಗೆ ಗೃಹ ಸಚಿವ ಬಸವರಾಜ ಬೊಮ್ಮಾಯಿ ಹೋಗುತ್ತಿದ್ದರು. ಈ ಸಂದರ್ಭದಲ್ಲಿ ಕಾರಿನ ತಪಾಸಣೆಗಾಗಿ ಚೆಕ್‌ಪೋಸ್ಟ್ ಅಧಿಕಾರಿಗಳು ಕೈ ಒಡ್ಡಿದ್ದಾರೆ. ಆದರೆ ಕಾರು ನಿಲ್ಲಿಸದೇ ತೆರಳಿದ ಘಟನೆ ನಡೆದಿದೆ.