ಬೆಂಗಳೂರಿಂದ ಹುಟ್ಟೂರಿಗೆ ಮರಳಿದ್ದ ಯುವಕನಿಗೆ ಕೊರೊನಾ ಸೋಂಕು

ಬೆಂಗಳೂರಿನಿಂದ ಮರಳಿದ್ದ ಯುವಕನಿಗೆ ಕೊರೊನಾ ಕಾಣಿಸಿಕೊಂಡಿದ್ದು, ಗ್ರಾಮದಲ್ಲೀಗ ಆತಂಕ ಎದುರಾಗಿದೆ.

ಕುಷ್ಟಗಿ (ಕೊಪ್ಪಳ): ಬೆಂಗಳೂರಿನಿಂದ ಸ್ವಗ್ರಾಮ ದೋಟಿಹಾಳಕ್ಕೆ ಬಂದು ಸ್ವಯಂಪ್ರೇರಿತ ಹೋಂ ಕ್ವಾರಂಟೈನ್ ಆಗಿದ್ದ ಯುವಕನಿಗೆ ಕೊರೊನಾ ಸೋಂಕು ದೃಢವಾಗಿದೆ.

ಈ ಹಿನ್ನೆಲೆಯಲ್ಲಿ ಮುನ್ನೆಚ್ಚರಿಕಾ ಕ್ರಮವಾಗಿ ಸೋಂಕಿತನ ಮನೆಯ ಅಕ್ಕಪಕ್ಕ ರಸ್ತೆ ಸೀಲ್​​​​​​ಡೌನ್​ಗೆ ಗ್ರಾ.ಪಂ ಕ್ರಮ ಕೈಗೊಂಡಿದೆ. ದೋಟಿಹಾಳ ಗ್ರಾಮದ ಹೊರವಲಯದ ನವ ನಗರದ ನಿವಾಸಿ, ಬೆಂಗಳೂರು ವೈಟ್​​​​ಫೀಲ್ಡ್​​​ನ ಕಾರ್ಖಾನೆಯೊಂದರಲ್ಲಿ ಉದ್ಯೋಗಿಯಾಗಿದ್ದ.

ಈ ಯುವಕ ಕಳೆದ ಜುಲೈ 14ರಂದು ಬೆಂಗಳೂರಿನಿಂದ ನೇರವಾಗಿ ಕುಷ್ಟಗಿಗೆ ಆಗಮಿಸಿ, ಅದೇ ದಿನ ಕುಷ್ಟಗಿ ಸರ್ಕಾರಿ ಆಸ್ಪತ್ರೆಯಲ್ಲಿ ಗಂಟಲು ದ್ರವ ಮಾದರಿ‌ ಪರೀಕ್ಷೆಗೆ ಒಳಗಾಗಿದ್ದ. ಅಲ್ಲದೆ ಸ್ವಯಂ ಪ್ರೇರಿತವಾಗಿ ಹೋಂ ಕ್ವಾರಂಟೈನ್​​ನಲ್ಲಿದ್ದ.

ಇಂದು ಬೆಳಗ್ಗೆ ಕೊರೊನಾ ದೃಢವಾಗಿದ್ದು, ಸೋಂಕಿತ ಯುವಕನನ್ನು ಯಲಬುರ್ಗಾ ತಾಲೂಕಿನ ಕೋವಿಡ್ ಕೇರ್ ಸೆಂಟರ್​​ಗೆ ಕರೆದೊಯ್ಯಲಾಗಿದೆ. ದೋಟಿಹಾಳ ಗ್ರಾಮದ ಮೊದಲ ಕೊರೊನಾ ಪ್ರಕರಣ ಇದಾಗಿದೆ.