ಚಿಹ್ನೆಗಳ ನಡುವೆ ವ್ಯಕ್ತಿ ಮತ ಚಲಾಯಿಸಿದ್ರೆ ಆ ಮತ ಯಾರಿಗೆ? ಇಲ್ಲಿದೆ ಕುತೂಹಲಕಾರಿ ಘಟನೆ!

ಗ್ರಾಮ ಪಂಚಾಯತ್​ ಚುನಾವಣೆಯ ಮತ ಎಣಿಕೆಯ ದಿನವಾದ ಇಂದು ಕೆಲವು ಅಪರೂಪದ ಘಟನೆಗಳು ನಡೆದಿವೆ. ಮತದಾರನೊಬ್ಬ ಎರಡು ಚಿಹ್ನೆಗಳ ಮಧ್ಯದಲ್ಲಿ ಮತ ಚಲಾಯಿಸಿದ್ದರಿಂದ ಸ್ಕೇಲ್​ ಹಿಡಿದು ಆತ ಯಾರಿಗೆ ಮಾತ ಹಾಕಿದ್ದಾನೆ ಎಂಬುದನ್ನು ಅಧಿಕಾರಿಗಳು ನಿರ್ಧರಿಸಿದರು.!

ಕೊಪ್ಪಳ: ಮತ ಪತ್ರದಲ್ಲಿದ್ದ ಎರಡು ಚಿಹ್ನೆಗಳ ಮಧ್ಯದಲ್ಲಿ ಮತದಾರನೊಬ್ಬ ಹಕ್ಕು ಚಲಾಯಿಸಿದ್ದರಿಂದ ಮತ ಎಣಿಕೆ ಸಂದರ್ಭದಲ್ಲಿ ಮತವನ್ನು ಸ್ಕೇಲ್​ನಿಂದ ಅಳೆದು ನಿರ್ಧರಿಸಿದ ಕುತೂಹಲಕಾರಿ ಘಟನೆ ನಗರದ ಶ್ರೀ ಗವಿಸಿದ್ದೇಶ್ವರ ಹೈಸ್ಕೂಲ್​ನ ಎಣಿಕೆ ಕೇಂದ್ರದಲ್ಲಿ ನಡೆಯಿತು.

ತಾಲೂಕಿನ ಗೊಂಡಬಾಳ ಗ್ರಾ.ಪಂಚಾಯತ್​ನ ಮುದ್ದಾಬಳ್ಳಿ ಗ್ರಾಮದ ಒಂದನೇ ವಾರ್ಡ್​ನ ಮತ ಎಣಿಕೆಯ ವೇಳೆ ಟಿವಿ ಚಿಹ್ನೆಯ ಗಾಳೆಪ್ಪ ಪೂಜಾರ್​ ಹಾಗೂ ಆಟೋ ಚಿಹ್ನೆಯ ಮಧ್ಯೆ ಮತದಾರನೋರ್ವ ಮತ ಚಲಾಯಿಸಿದ್ದ.

ಇದ್ರಿಂದ ಸಹಜವಾಗಿಯೇ ಆತ ಯಾರಿಗೆ ಮತ ಚಲಾಯಿಸಿದ್ದಾನೆ? ಎಂಬುದನ್ನು ತಿಳಿಯುವಲ್ಲಿ ಗೊಂದಲ ಏರ್ಪಟ್ಟಿದೆ. ಈ ಹಿನ್ನೆಲೆಯಲ್ಲಿ ಈ ಮತ ಪತ್ರವನ್ನು ಕೆಲಕಾಲ ಎಣಿಕೆ ಕಾರ್ಯದಿಂದ ಹೊರಗಿಡಲಾಯಿತು.

ಕೊನೆಯ ಹಂತದಲ್ಲಿ ಇಬ್ಬರು ಅಭ್ಯರ್ಥಿಗಳ ಮಧ್ಯೆ ಚಲಾಯಿಸಲಾಗಿದ್ದ ಮತವನ್ನು ಚುನಾವಣಾಧಿಕಾರಿ ಸ್ಕೇಲ್​ನಿಂದ ಅಳತೆ ಮಾಡಿ ಟಿವಿ ಚಿಹ್ನೆಯ ಮತಕ್ಕೆ ಹೆಚ್ಚು ಪ್ರಾಶಸ್ತ್ಯ ಬಂದ ಹಿನ್ನೆಲೆಯಲ್ಲಿ ಟಿವಿ ಅಭ್ಯರ್ಥಿಗೆ ಮತ ಎಂದು ಘೋಷಿಸಿದರು.