ಸಂಡೇ ಬಜಾರ್ ಕಾನೂನು ಬಾಹಿರ: ಅವಕಾಶವಿಲ್ಲ ಎಂದ ಪೊಲೀಸರು

ಗಂಗಾವತಿಯಲ್ಲಿ ಪ್ರತೀ ಭಾನುವಾರ ನಡೆಯುತ್ತಿರುವ ಸಂಡೇ ಬಜಾರ್ ಕಾನೂನು ಬಾಹಿರ ವಹಿವಾಟಾಗಿದ್ದು, ಇನ್ನು ಮುಂದೆ ಸ್ಥಗಿತಗೊಳಿಸಬೇಕು ಎಂದು ಪೊಲೀಸರು ಎಚ್ಚರಿಕೆ ನೀಡಿದ್ದಾರೆ.

ಗಂಗಾವತಿ: ನಗರದಲ್ಲಿ ಪ್ರತೀ ಭಾನುವಾರ ಸಾವಿರಾರು ದ್ವಿಚಕ್ರ ವಾಹನಗಳನ್ನು ಮಾರು ಮತ್ತು ಕೊಳ್ಳುವ ಮೇಳವಾಗಿ ನಡೆಯುತ್ತಿರುವ ಸಂಡೇ ಬಜಾರ್ ಕಾನೂನು ಬಾಹಿರ ವಹಿವಾಟಾಗಿದ್ದು, ಇನ್ನು ಮುಂದೆ ಸ್ಥಗಿತಗೊಳಿಸಬೇಕು ಎಂದು ಪೊಲೀಸರು ಸಂಡೇ ಬಜಾರ್ ನಿರ್ವಾಹಕರಿಗೆ ಎಚ್ಚರಿಕೆ ನೀಡಿದ್ದಾರೆ.

ಸಂಡೇ ಬಜಾರ್ ಸ್ಥಗಿತಗೊಳಿಸುವಂತೆ ಸೂಚನೆ

ಈ ಬಗ್ಗೆ ಸಂಡೇ ಬಜಾರ್ ನಡೆಸುವ ನಗರದ ವಿವಿಧ ವರ್ತಕರನ್ನು ಹಾಗೂ ಅದಕ್ಕೆ ಅವಕಾಶ ನೀಡುವ ಅಂಗಡಿಗಳ ಮಾಲೀಕರನ್ನು ಠಾಣೆಗೆ ಕರೆಯಿಸಿ ಸಭೆ ನಡೆಸಿದ ಪೊಲೀಸರು, ಅಕ್ರಮವಾಗಿ ನಡೆಯತ್ತಿರುವ ಈ ಸಂಡೇ ಬಜಾರ್ ಇನ್ನು ಮುಂದೆ ಸ್ಥಗಿತಗೊಳಿಸಬೇಕು ಎಂದು ಎಚ್ಚರಿಕೆ ನೀಡಿದರು. ಕೋವಿಡ್​ ಪರಿಸ್ಥಿತಿ ಹಿನ್ನೆಲೆ ಆರೋಗ್ಯದ ಜಾಗೃತಿ ಮರೆತು ಜನ ನೂರಾರು ಸಂಖ್ಯೆಯಲ್ಲಿ ಸೇರುತ್ತಿದ್ದಾರೆ. ಜಿಲ್ಲಾಧಿಕಾರಿಗಳು ಈ ವಿಷಯವನ್ನು ಗಂಭೀರವಾಗಿ ಪರಿಗಣಿಸಿದ್ದು, ಕೂಡಲೇ ಸಂಬಂಧಿತ ವಹಿವಾಟಿನ ಅನುಮತಿ ಪತ್ರ ಹಾಜರುಪಡಿಸಿ ಎಂದು ಡಿವೈಎಸ್ಪಿ ಆರ್.ಎಸ್. ಉಜ್ಜನಕೊಪ್ಪ ಸೂಚನೆ ನೀಡಿದರು.

ಕಳೆದ ಎರೆಡು ವಾರದಿಂದ ನಗರದಲ್ಲಿ ದ್ವಿಚಕ್ರ ವಾಹನಗಳು ಕಳ್ಳತನವಾಗುತ್ತಿದ್ದು, ಅವುಗಳ ತಾಂತ್ರಿಕ ಮಾಹಿತಿ ಮರೆ ಮಾಚಿ ಸಂಡೇ ಬಜಾರ್​ನಲ್ಲಿ ಮಾರಾಟ ಮಾಡಲಾಗುತ್ತಿದೆ ಎಂಬ ಆರೋಪ ಹಿನ್ನೆಲೆ ಇದೀಗ ಪೊಲೀಸರು ಕಟ್ಟುನಿಟ್ಟಿನ ಕ್ರಮಕ್ಕೆ ಮುಂದಾಗಿದ್ದಾರೆ.