ಸಂಸದರಿಗೆ ತಾಕತ್​ ಇದ್ರೆ ಮೋದಿ ಜೊತೆ ಫೋಟೋ ತೆಗಿಸ್ಕೊಂಡು ಬರಲಿ: ಶಿವರಾಜ್ ತಂಗಡಗಿ ಸವಾಲ್

ಬಿಜೆಪಿಯವರು ಅಂದ್ರೆ ಸುಳ್ಳುಕೋರರು, ದಗಾಕೋರರು‌. ಇವರನ್ನು ಮುಂದಿನ ದಿನಗಳಲ್ಲಿ ದೇಶ ಬಿಟ್ಟು ಓಡಿಸ್ಬೇಕು. ಮೋದಿ, ಅಮಿತ್ ಶಾ ದೇಶ ಮಾರ್ತಿದ್ದಾರೆ, ಅಂಬಾನಿ, ಆದಾನಿ ಕೊಂಡುಕೊಳ್ತಿದ್ದಾರೆ ಎಂದು ಶಿವರಾಜ್​ ತಂಗಡಗಿ ವಾಗ್ದಾಳಿ ನಡೆಸಿದರು.

ಕೊಪ್ಪಳ: ನಮ್ಮ ರಾಜ್ಯದ ಸಂಸದರು ತಾಕತ್​ ಇದ್ರೆ ಪ್ರಧಾನಿ ಮೋದಿ ಜೊತೆ ಫೋಟೋ ತೆಗೆಸಿಕೊಳ್ಳಲಿ‌ ಎಂದು ಮಾಜಿ ಸಚಿವ, ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಶಿವರಾಜ ತಂಗಡಗಿ ಸವಾಲ್ ಹಾಕಿದ್ದಾರೆ.

ಬೆಲೆ ಏರಿಕೆ ಖಂಡಿಸಿ ನಗರದಲ್ಲಿ ಇಂದು ನಡೆದ ಪ್ರತಿಭಟನೆ ಸಂದರ್ಭದಲ್ಲಿ ಮಾತನಾಡಿದ ಅವರು, ಪ್ರಧಾನಿ ನರೇಂದ್ರ ಮೋದಿ ನಮ್ಮ ರಾಜ್ಯದ ಸಂಸದರನ್ನು ಹತ್ತಿರಕ್ಕೂ ಬಿಟ್ಟುಕೊಳ್ಳುವುದಿಲ್ಲ. 200 ಮೀಟರ್ ದೂರ ನಿಲ್ಲಿಸುತ್ತಾರೆ. ಮೋದಿಗೆ ನಮ್ಮ ರಾಜ್ಯದ ಸಂಸದರೆಂದರೆ ಕಾಳಜಿ ಇಲ್ಲ. ರಾಜ್ಯದ ಸಂಸದರು ಕೆಲಸ ಮಾಡುವುದು ಬೇಡ. ಒಬ್ಬೊಬ್ಬರೇ ಹೋಗಿ ಫೋಟೋ ತೆಗೆಸಿಕೊಂಡು ಬನ್ನಿ ಎಂದು ಹೇಳಿದರು.

ಇವಿಎಂನಿಂದ ಇವರನ್ನು ಗೆಲ್ಲಿಸಿದ್ದೇನೆ ಎಂದು ಮೋದಿಗೆ ಗೊತ್ತಿದೆ. ಮೋದಿ ಮೋದಿ ಎನ್ನುವವರು, ಇನ್ಮೇಲೆ ಮೋದಿ ಮೋದಿ ಅಂದ್ರೆ ಪೆಟ್ರೋಲ್, ಡಿಸೇಲ್ ಅನ್ನಬೇಕು. ಪ್ರಧಾನಿ ಮೋದಿ ಯಾವ ನೈತಿಕತೆ ಇಟ್ಟುಕೊಂಡು ಕಾಂಗ್ರೆಸ್‌ ಬಗ್ಗೆ ಮಾತನಾಡ್ತಾರೆ ಎಂದು ಪ್ರಶ್ನಿಸಿದರು.

ಬಿಜೆಪಿಯವರು ಅಂದ್ರೆ ಸುಳ್ಳುಕೋರರು, ದಗಾಕೋರರು‌. ಇವರನ್ನು ಮುಂದಿನ ದಿನಗಳಲ್ಲಿ ದೇಶ ಬಿಟ್ಟು ಓಡಿಸ್ಬೇಕು. ಮೋದಿ, ಅಮಿತ್ ಶಾ ದೇಶ ಮಾರ್ತಿದ್ದಾರೆ, ಅಂಬಾನಿ, ಆದಾನಿ ಕೊಂಡುಕೊಳ್ತಿದ್ದಾರೆ ಎಂದು ತಂಗಡಗಿ ವಾಗ್ದಾಳಿ ನಡೆಸಿದರು.