ಕೊಪ್ಪಳ: ಲಸಿಕೆ ಹಾಕಿಸಿಕೊಳ್ಳಲು ಬಂದವರಿಗೆ ಪುಷ್ಪವೃಷ್ಟಿಯ ಸ್ವಾಗತ

ಕೊಪ್ಪಳದ ನಗರದಲ್ಲಿ ವಿವಿಧ ಮುಸ್ಲಿಂ ಕಮಿಟಿಗಳು ಸೇರಿಕೊಂಡು ಲಸಿಕಾ ಅಭಿಯಾನ ನಡೆಸಿದರು. ಈ ವೇಳೆ ವ್ಯಾಕ್ಸಿನ್​ ಹಾಕಿಸಿಕೊಳ್ಳಲು ಬರುವವರಿಗೆ ಪುಷ್ಪವೃಷ್ಟಿ ಮೂಲಕ ಸ್ವಾಗತ ಕೋರಲಾಯಿತು.

ಕೊಪ್ಪಳ: ಕೊರೊನಾ ಲಸಿಕೆ ಹಾಕಿಸಿಕೊಳ್ಳಲು ಕೆಲವರು ಹಿಂದೇಟು ಹಾಕುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ವಿಭಿನ್ನ ಪ್ರಯತ್ನಗಳ ಮೂಲಕ ವ್ಯಾಕ್ಸಿನ್​ ಪಡೆಯಲು ಉತ್ತೇಜನ ನೀಡಲಾಗುತ್ತಿದೆ. ಅದರಂತೆ ನಗರದಲ್ಲಿ ಲಸಿಕೆ ಪಡೆಯಲು ಬಂದವರಿಗೆ ಪುಷ್ಪವೃಷ್ಟಿ ಮಾಡಲಾಯಿತು.

ಇಂದು ನಗರದ ದೇವರಾಜ ಅರಸ್ ಕಾಲೋನಿಯ ಇಲಾಹಿ ಮಸೀದಿ ಸಮಿತಿ, ನೌಜವಾನ್ ಸಮಿತಿ ಹಾಗೂ ಆರೋಗ್ಯ ಇಲಾಖೆಯಿಂದ ಲಸಿಕಾ ಅಭಿಯಾನ ನಡೆಯಿತು. ಈ ವೇಳೆ ವ್ಯಾಕ್ಸಿನ್​ ಪಡೆದವರಿಗೆ ಕಮಿಟಿ ಸದಸ್ಯರು ಹೂ ಮಳೆಗೆರೆಯುವ ಮೂಲಕ ಉತ್ತೇಜನ ನೀಡಿದ್ದಾರೆ. ಇದರ ಜೊತೆಗೆ ಒಂದು ನೀರಿನ ಬಾಟಲಿ ಹಾಗೂ ಬಿಸ್ಕೇಟ್​ ನೀಡಿದ್ದಾರೆ. ಇನ್ನು ವಯಸ್ಸಾದವರು ಬಂದರೆ ಅವರಿಗೆ ಉರುಗೋಲು ನೀಡಿದ್ದಾರೆ.

ಈ ಪ್ರದೇಶದಲ್ಲಿ ಸುಮಾರು 200ಕ್ಕೂ ಅಧಿಕ ಜನರಿಗೆ ವ್ಯಾಕ್ಸಿನ್​ ಹಾಕಲಾಗಿದೆ. ಲಸಿಕಾ ಅಭಿಯಾನದಲ್ಲಿ ಜನರನ್ನು ಪ್ರೇರೇಪಿಸುವ ಇಂತಹ ಕಾರ್ಯಕ್ರಮಗಳು ಸ್ವಾಗತಾರ್ಹ ಕೆಲಸ ಎಂದು ಜನರು ಅಭಿಪ್ರಾಯ ವ್ಯಕ್ತಪಡಿಸಿದರು.