ಅನೈತಿಕ ಚಟುವಟಿಕೆಗಳ ತಾಣವಾದ ಕುಷ್ಟಗಿಯ ವಿದ್ಯಾ ಮಂದಿರ

ಕುಷ್ಟಗಿಯ ಬಾಲಕರ ಸರ್ಕಾರಿ ಪದವಿ ಪೂರ್ವ ಕಾಲೇಜು ಆವರಣವು ಅನೈತಿಕ ಚಟುವಟಿಕೆಗಳ ತಾಣವಾಗಿ ಮಾರ್ಪಾಡಾಗಿದೆ.

ಕುಷ್ಟಗಿ (ಕೊಪ್ಪಳ): ಕುಷ್ಟಗಿಯ ಬಾಲಕರ ಸರ್ಕಾರಿ ಪದವಿ ಪೂರ್ವ ಕಾಲೇಜು ಹೆಸರಿಗೆ ಮಾತ್ರ ವಿದ್ಯಾ ಮಂದಿರ. ಆದರೆ, ರಾತ್ರಿಯಾಗುತ್ತಿದ್ದಂತೆ ಕಾಲೇಜು ಆವರಣವು ಅನೈತಿಕ ಚಟುವಟಿಕೆಗಳ ತಾಣವಾಗಿ ಮಾರ್ಪಾಡಾಗುತ್ತದೆ.

ಈ ಕಾಲೇಜಿನ ಸುತ್ತಲೂ ಗೋಡೆಯಿದ್ದರೂ ಕಿಡಿಗೇಡಿಗಳು ಗೋಡೆ ಜಿಗಿದು ಬಹಿರ್ದಸೆ ಮಾಡುತ್ತಿದ್ದಾರಂತೆ. ಅಷ್ಟೇ ಅಲ್ಲದೆ, ಸಂಜೆಯಾಗುತ್ತಿದ್ದಂತೆ ವ್ಯಸನಿಗಳು ಮದ್ಯಪಾನ ಮಾಡಲು, ಸಿಗರೇಟ್ ಸೇದಲು ಇದೇ ಕಾಲೇಜಿನ ಆವರಣಕ್ಕೆ ಬರುತ್ತಾರೆ. ಇನ್ನು ಲಾಕ್​ಡೌನ್​​​ ಅವಧಿಯಲ್ಲಿ ಇದರ ಹಾವಳಿ ಮಿತಿ ಮೀರಿದೆ. ಈ ಕಾಲೇಜಿನ ಹೊಸ ಕಟ್ಟಡದಲ್ಲಿ ಮಾಂಸಾಹಾರ ಊಟ ತಂದು ಎಸೆದುಹೋಗುತ್ತಿದ್ದಾರೆ ಎಂದು ಇಲ್ಲಿನ ಜನರು ಆರೋಪಿಸಿದ್ದಾರೆ.

ಪ್ರತೀ ದಿನ ಪುಂಡರ ಕಾಟದಿಂದ ಇಲ್ಲಿನ ಸಿಬ್ಬಂದಿ ಕಷ್ಟ ಅನುಭವಿಸುತ್ತಿದ್ದಾರೆ. ಏಕೆಂದರೆ, ಮದ್ಯದ ಬಾಟಲಿ, ಪಾರ್ಸೆಲ್​ ವಸ್ತುಗಳನ್ನು ತೆಗೆದು ಕಾಲೇಜನ್ನು ಸ್ವಚ್ಛ ಮಾಡುವ ಕಾರ್ಯ ಇವರೇ ಮಾಡಬೇಕಾಗಿದೆ.

ಈ ಕುರಿತು ಕಾಲೇಜಿನ ಪ್ರಾಚಾರ್ಯ ಡಾ.ಎಚ್. ಜಿ. ನೀರಗೇರಿ ಮಾತನಾಡಿದ್ದು, ಕಾಲೇಜು ಆವರಣದಲ್ಲಿ ಕಿಡಿಗೇಡಿಗಳ ಹಾವಳಿ ಮಿತಿ ಮೀರಿದೆ. ಸ್ಥಳೀಯರು ಕಾಲೇಜಿನ ಬಗ್ಗೆ ಅಭಿಮಾನ ಮೂಡಿಸಲು ಪ್ರಯತ್ನಿಸಿದರೆ, ಈ ರೀತಿಯ ಅನಾಗರಿಕ ವರ್ತನೆ ನಿಯಂತ್ರಿಸಲು ಸಾಧ್ಯ ಎಂದು ಹೇಳಿದ್ದಾರೆ.