ಕುಷ್ಟಗಿ (ಕೊಪ್ಪಳ):ದಲಿತ ಮಗು ಪ್ರವೇಶದಿಂದ ದೇವಸ್ಥಾನದ ಮೈಲಿಗೆ ಪ್ರಕರಣ ಸಂಬಂಧ ಪ್ರತಿಕ್ರಿಯಿಸಿದ ಡಿಸಿ ವಿಕಾಸ್ ಕಿಶೋರ್ ಸುರಳ್ಕರ್, ದೇವಸ್ಥಾನ ಮೈಲಿಗೆಗಿಂತ ಮೊದಲು ಮನದ ಮೈಲಿಗೆ ತೊಲಗಿಸಬೇಕಿದೆ ಎಂದು ಹೇಳಿದರು.
ಶಾಂತಿ ಪಾಲನಾ ಸಭೆ ನಡೆಸಿದ ಜಿಲ್ಲಾಧಿಕಾರಿ
ಕೊಪ್ಪಳ ಜಿಲ್ಲೆ ಕುಷ್ಟಗಿ ತಾಲೂಕಿನ ಮಿಯಾಪುರ ಗ್ರಾಮದಲ್ಲಿ ಮಗು ದೇವಸ್ಥಾನ ಪ್ರವೇಶಿಸಿದ ಕಾರಣ ದಂಡ ವಿಧಿಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಖುದ್ದಾಗಿ ಜಿಲ್ಲಾಧಿಕಾರಿ ಗ್ರಾಮಕ್ಕೆ ಭೇಟಿ ನೀಡಿ ವಾಸ್ತವಾಂಶ ಪರಿಶೀಲಿಸಿ ನಂತರ, ಶಾಂತಿ ಪಾಲನಾ ಸಭೆಯಲ್ಲಿ ಮಾತನಾಡಿದರು.
ಮಗು ದೇವಸ್ಥಾನ ಪ್ರವೇಶ ಮಾಡಿರುವುದು ನನ್ನ ಅನಿಸಿಕೆ ಪ್ರಕಾರ 'ದೇವಸ್ಥಾನ ಮೈಲಿಗೆ ಅಲ್ಲ, ಅದು ಮನಸ್ಸಿನ ಮೈಲಿಗೆ'. ಮನಸ್ಸಿನ ಮೈಲಿಗೆಯನ್ನು ಮೊದಲು ಸ್ವಚ್ಛಗೊಳಿಸಬೇಕಿದೆ. ದೇವಸ್ಥಾನ ಯಾವಾಗ ಸ್ವಚ್ಛ ಆಗುತ್ತದೆ ಏನಾಗುತ್ತದೆ ಎಂದು ಅದರ ಬಗ್ಗೆ ತಲೆ ಕೆಡಿಸಿಕೊಳ್ಳಬೇಕಿಲ್ಲ. ಮೊದಲು ನಮ್ಮ ಮನಸ್ಸು, ಮನೋಭಾವ ಸ್ವಚ್ಛಗೊಳಿಸಬೇಕಿದೆ.