ಕಟಾವಿಗೆ ಬಂದ ಕಡಲೆ ನೀರುಪಾಲು: ಸಂಕಷ್ಟದಲ್ಲಿ ರೈತ

ಕುಷ್ಟಗಿ ಸಮೀಪ ಪೈಪ್​ಲೈನ್ ಕಾಮಗಾರಿಗೆ ಹಳ್ಳದ ಬಸಿ ನೀರು ಅಡ್ಡಿ ಉಂಟುಮಾಡಿದ್ದು, ಈ ನೀರು ಕಟಾವು ಹಂತದಲ್ಲಿದ್ದ 2 ಎಕರೆ ಕಡಲೆ ಬೆಳೆಗೆ ನುಗ್ಗಿದೆ. ಇದರಿಂದಾಗಿ ರೈತ ಸಂಕಷ್ಟಕ್ಕೆ ಒಳಗಾಗಿದ್ದು, ಸೂಕ್ತ ಪರಿಹಾರಕ್ಕೆ ಒತ್ತಾಯಿಸಿದ್ದಾರೆ.

ಕುಷ್ಟಗಿ: ಪಟ್ಟಣದ ಹೊರವಲಯದಲ್ಲಿರುವ ಆಲಮಟ್ಟಿ ಜಲಾಶಯದಿಂದ ಕುಡತಿನಿ ಸ್ಥಾವರಕ್ಕೆ ಪೈಪ್​ಲೈನ್ ಕಾಮಗಾರಿ ನಡೆಸಲು ಬಸಿ ನೀರು ಅಡ್ಡಿಯಾಗಿದ್ದು, ಈ ನೀರು ರೈತರೊಬ್ಬರ ಕಡಲೆ ಬೆಳೆಗೆ ನುಗ್ಗಿದ ಪರಿಣಾಮ ಕಟಾವು ಹಂತದಲ್ಲಿದ್ದ ಬೆಳೆ ನೀರುಪಾಲಾಗಿದೆ.

ಆಲಮಟ್ಟಿ ಜಲಾಶಯದಿಂದ ಕುಷ್ಟಗಿ ಮೂಲಕ ಬಳ್ಳಾರಿ ಜಿಲ್ಲೆಯ ಕುಡತಿನಿ ಉಷ್ಣ ಸ್ಥಾವರಕ್ಕೆ ಪೈಪಲೈನ್ ಕಾಮಗಾರಿ ಕೈಗೊಳ್ಳಲಾಗಿದೆ. ಕುಷ್ಟಗಿ ಸಮೀಪ ಪೈಪ್​ಲೈನ್ ಕಾಮಗಾರಿಗೆ ಹಳ್ಳದ ಬಸಿ ನೀರು ಅಡ್ಡಿ ಉಂಟುಮಾಡಿದೆ. ಈ ನೀರನ್ನು ಹೊರ ಹಾಕಿ ಪೈಪ್​ಲೈನ್ ಜೋಡಣೆ ಕೆಲಸ ಮುಂದುವರೆಸಲಾಗಿದ್ದು, ಹೊರ ಹಾಕಿದ ಬಸಿ ನೀರು ರೈತ ಗುಂಡಪ್ಪ ಕುರ್ನಾಳ ಅವರ ಜಮೀನಿಗೆ ನುಗ್ಗಿ, ಕಟಾವು ಹಂತದಲ್ಲಿದ್ದ 2 ಎಕರೆ ಕಡಲೆ ಬೆಳೆ ಹಾನಿಯಾಗಿದೆ.

ಈ ಕುರಿತು ಸಂಬಂಧಿಸಿದ ಅಧಿಕಾರಿಗಳಿಗೆ ಕಾಮಗಾರಿ ತಡೆದು, ಹಾನಿಯಾಗಿರುವ ಬೆಳೆಗೆ ಪರಿಹಾರ ನೀಡಬೇಕೆಂದು ತಿಳಿಸಿದ್ದರೂ, ಕೆಲಸ ನಿಲ್ಲಿಸದೇ ಕಾಮಗಾರಿ ಮುಂದುವರಿಸಿದ್ದಾರೆ. ಈ ನೀರಿನಿಂದಾಗಿ ಜಮೀನು ಕೂಡ ಹಾಳಾಗಿದ್ದು, ನೀರಿನಲ್ಲಿರುವ ಕಡಲೆ ಬೆಳೆ ಕಟಾವು ಮಾಡುವುದು ಕೂಡ ಅಸಾಧ್ಯ. ಕೂಡಲೇ ಸಂಬಂಧಪಟ್ಟ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಪರಿಹಾರ ನೀಡಬೇಕು ಎಂದು ರೈತ ಗುಂಡಪ್ಪ ಕುರ್ನಾಳ ಆಗ್ರಹಿಸಿದ್ದಾರೆ.