ಅನಧಿಕೃತವಾಗಿ ಮನೆಯಲ್ಲಿ ಬಂದೂಕು, ಜಿಂಕೆ ಚರ್ಮ ಸಂಗ್ರಹಿಸಿದ್ದ ಆರೋಪಿಗಳು ಅಂದರ್​

ಅಕ್ರಮವಾಗಿ ನಾಡ ಬಂದೂಕು, 9 ಕೆಜಿ ಗಂಧದ‌ ಕಟ್ಟಿಗೆ, ಒಂದು ಜಿಂಕೆಯ ಚರ್ಮ, ಜಿಂಕೆಯ ಕೊಂಬು ಇತ್ಯಾದಿಗಳನ್ನು ಸಂಗ್ರಹಿಸಿದ್ದ ಮನೆ ಮೇಲೆ ಪೊಲೀಸರು ದಾಳಿ ನಡೆಸಿದ್ದಾರೆ. ಕೊಪ್ಪಳ ಜಿಲ್ಲೆಯಲ್ಲಿ ಈ ಪ್ರಕರಣ ನಡೆದಿದ್ದು, ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ.

ಕೊಪ್ಪಳ: ಅನಧಿಕೃತವಾಗಿ ಮನೆಯಲ್ಲಿ ಬಂದೂಕು ಹಾಗೂ ಗಂಧದ ಕಟ್ಟಿಗೆ ಸಂಗ್ರಹಿಸಿರುವ ಖಚಿತ ಮಾಹಿತಿ ಮೇಲೆ ಪೊಲೀಸರು ದಾಳಿ ನಡೆಸಿ‌ ಮೂವರು ಆರೋಪಿಗಳನ್ನು ಬಂಧಿಸಿದ್ದಾರೆ.

ಜಿಲ್ಲೆಯ ಕುಕನೂರು ತಾಲೂಕಿನ ಮಾಳೆಕೊಪ್ಪ ಗ್ರಾಮದ ಶಿವಪ್ಪ ಹರಿಣಶಿಕಾರಿ ಎಂಬುವರ ಮನೆಯಲ್ಲಿ ಬಂದೂಕು ಹಾಗೂ ಗಂಧದ ಕಟ್ಟಿಗೆ ಸಂಗ್ರಹಿಸಿರುವ ಮಾಹಿತಿ ಮೇರೆಗೆ ಕುಕನೂರು ಪೊಲೀಸರು ದಾಳಿ ನಡೆಸಿದ್ದಾರೆ. ಈ ವೇಳೆ ಒಂದು ನಾಡ ಬಂದೂಕು, 9 ಕೆಜಿ ಗಂಧದ‌ ಕಟ್ಟಿಗೆ, ಒಂದು ಜಿಂಕೆಯ ಚರ್ಮ, ಜಿಂಕೆಯ ಕೊಂಬು, ಜಿಂಕೆಯ ಬಲೆ ಜಪ್ತಿ ಮಾಡಿಕೊಳ್ಳಲಾಗಿದೆ.

ಆರೋಪಿಗಳಾದ ಶಿವಪ್ಪ ಹರಿಣಶಿಕಾರಿ, ಫಕೀರಪ್ಪ ಹರಿಣಶಿಕಾರಿ ಹಾಗೂ ಶೇಖಪ್ಪ ಹರಿಣಶಿಕಾರಿಯನ್ನು ಬಂಧಿಸಿ ಕಾನೂನು ಕ್ರಮ ಜರುಗಿಸಲಾಗಿದೆ. ಪೊಲೀಸ್​​ ಸಿಬ್ಬಂದಿ ಹಾಗೂ ಅಧಿಕಾರಿಗಳ ಕಾರ್ಯಕ್ಕೆ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಟಿ.‌ ಶ್ರೀಧರ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.