ಕೊರೊನಾ ಎಫೆಕ್ಟ್​: ಮಣ್ಣಿನ ಮಡಿಕೆ ವ್ಯಾಪಾರ ಕುಂಠಿತ

ಸಾಮಾನ್ಯವಾಗಿ ಮಣ್ಣಿನ ಗಡಿಗೆ, ಹರವಿಗಳು ಬೇಸಿಗೆಯಲ್ಲಿ ಬಡವರ ಫ್ರಿಡ್ಜ್ ಆಗುತ್ತವೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಕೊಪ್ಪಳ ಜಿಲ್ಲೆಯಲ್ಲಿ ಈ ಬಾರಿ ಬಿಸಿಲಿನ ತಾಪ ಹೆಚ್ಚಿದೆ. ಆದರೂ ಕೂಡ ಕೊರೊನಾ ಭೀತಿಯಿಂದಾಗಿ ಮಣ್ಣಿನ ಮಡಿಕೆ ವ್ಯಾಪಾರ ಕುಂಠಿತಗೊಂಡಿದ್ದು, ವ್ಯಾಪಾರಸ್ಥರು ನಷ್ಟ ಅನುಭವಿಸುವಂತಾಗಿದೆ.

ಕೊಪ್ಪಳ: ಜಿಲ್ಲೆಯಲ್ಲಿ ದಿನದಿಂದ ದಿನಕ್ಕೆ ಬಿಸಿಲಿನ ತಾಪ ಏರುತ್ತಿದ್ದು, ಈಗಾಗಲೇ ಮಾರುಕಟ್ಟೆಯಲ್ಲಿ ಮಣ್ಣಿನ ಗಡಿಗೆಗಳು ಹಾಗೂ ರಾಜಸ್ತಾನಿ ಗಡಿಗೆಗಳು ಜನರನ್ನು ಕೈಬೀಸಿ ಕರೆಯುತ್ತಿವೆ. ಆದರೆ, ಕೊರೊನಾ ಭೀತಿಯಿಂದಾಗಿ ವ್ಯಾಪಾರ ಕುಂಠಿತಗೊಂಡಿದ್ದು, ನಷ್ಟ ಅನುಭವಿಸುವಂತಾಗಿದೆ.

ಸಾಮಾನ್ಯವಾಗಿ ಮಣ್ಣಿನ ಗಡಿಗೆ, ಹರವಿಗಳು ಬೇಸಿಗೆಯಲ್ಲಿ ಬಡವರ ಫ್ರಿಡ್ಜ್ ಆಗುತ್ತವೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಕೊಪ್ಪಳ ಜಿಲ್ಲೆಯಲ್ಲಿ ಈ ಬಾರಿ ಬಿಸಿಲಿನ ತಾಪ ಹೆಚ್ಚಿದೆ. ಬೆಳಗ್ಗೆ 9 ಗಂಟೆಯಾದರೆ ಸಾಕು ಬಿಸಿಲಿನ ಝಳ ಶುರುವಾಗಿ ತಾಪಮಾನ ಹೆಚ್ಚುತ್ತಾ ಹೋಗುತ್ತದೆ. ಬೇಸಿಗೆಯಲ್ಲಿ ತಂಪಾದ ಪಾನೀಯದ ಮೊರೆ ಹೋಗುವ ಜನರು ಮಣ್ಣಿನ ಮಡಿಕೆಗಳನ್ನು ಹೆಚ್ಚಾಗಿ ಬಳಸುತ್ತಾರೆ. ಆದರೆ, ಕೊರೊನಾ ಹಿನ್ನೆಲೆ ಈ ವರ್ಷದ ವ್ಯಾಪಾರ ಹೇಳಿಕೊಳ್ಳುವಂತಿಲ್ಲ, ಕಳೆದ ವರ್ಷ ತಯಾರು ಮಾಡಿದ ಮಣ್ಣಿನ ಗಡಿಗೆ, ಮಡಿಕೆಗಳು ಹಾಗೆಯೇ ಉಳಿದುಕೊಂಡಿವೆ ಎಂದು ಸ್ಥಳೀಯ ಕುಂಬಾರರು ಬೇಸರ ವ್ಯಕ್ತಪಡಿಸಿದ್ದಾರೆ.

ಕೊರೊನಾ ಕಾರಣದಿಂದ ಗಡಿಗೆಗಳನ್ನು ಕೊಂಡುಕೊಳ್ಳುವವರ ಸಂಖ್ಯೆ ಕಡಿಮೆಯಾಗಿದೆ. ದಿನದಿಂದ ದಿನಕ್ಕೆ ಕೊರೊನಾ ಪ್ರಕರಣಗಳು ಹೆಚ್ಚಾಗುತ್ತಿರುವ ಹಿನ್ನೆಲೆ ತಂಪಾದ ನೀರನ್ನು ಕುಡಿದರೆ ಶೀತ, ನೆಗಡಿಯಾಗುತ್ತದೆ ಎಂಬ ಭೀತಿಯಿಂದ ಜನರು ಮಣ್ಣಿನ ಮಡಿಕೆ, ಗಡಗೆಗಳನ್ನು ಕೊಳ್ಳಲು ಮುಂದೆ ಬರುತ್ತಿಲ್ಲ. ಹೀಗಾಗಿ ಈ ವರ್ಷ ಬಿಸಿಲಿನ ಬೇಗೆ ಅಧಿಕವಾಗಿದ್ದರೂ ಮಣ್ಣಿನ ಗಡಿಗೆ, ಮಡಿಕೆಗಳ ವ್ಯಾಪಾರ ಅಷ್ಟೊಂದು ಹೇಳಿಕೊಳ್ಳುವಂತಿಲ್ಲ ಎಂದು ಬಸವರಾಜ ಕುಂಬಾರ ತಿಳಿಸಿದರು.

ಈ ಹಿಂದೆ ಬೇಸಿಗೆ ಸಂದರ್ಭದಲ್ಲಿ ಸ್ಥಳೀಯ ಮಣ್ಣಿನ ಮಡಿಕೆಗಳು ಸೇರಿ ರಾಜಸ್ತಾನದಿಂದ ತರಿಸಿದ ಸುಮಾರು 4-5 ಲಾರಿ ಗಡಿಗೆಗಳು ಖರ್ಚಾಗುತ್ತಿದ್ದವು‌. ಆದರೆ, ಹಿಂದಿನ ವರ್ಷ ಕೊರೊನಾ ಭೀತಿಯಿಂದ ಏನೂ ವ್ಯಾಪಾರವಾಗಿಲ್ಲ. ಈ ವರ್ಷ ಸಹ ಅಂತಹ ಹೇಳಿಕೊಳ್ಳುವಂತಹ ವ್ಯಾಪಾರವಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದರು.