ಹಾಬಲಕಟ್ಟಿ ಶರಣಬಸವೇಶ್ವರ ಜಾತ್ರಾ ಫ್ಲೆಕ್ಸ್​​ನಲ್ಲಿ ಗಮನ ಸೆಳೆದ ಸನ್ನಿ ಲಿಯೋನ್​ ಫೋಟೋ ‌

ಕುಷ್ಟಗಿ ತಾಲೂಕಿನ ಹಾಬಲಕಟ್ಟಿಯಲ್ಲಿ ಶ್ರೀಶರಣಬಸವೇಶ್ವರ ಜಾತ್ರಾ ಮಹೋತ್ಸವ ಜಾತ್ರಾ ಫ್ಲೆಕ್ಸ್​​ನಲ್ಲಿ ಬಾಲಿವುಡ್​ ನಟಿ ಸನ್ನಿ ಲಿಯೋನ್​ ಫೋಟೋ ಹಾಕಲಾಗಿದೆ. ಈ ಚಿತ್ರ ಈಗ ಎಲ್ಲೆಡೆ ವೈರಲ್​ ಆಗ್ತಿದೆ.

ಕುಷ್ಟಗಿ (ಕೊಪ್ಪಳ): ಜಾತ್ರೆ, ಉತ್ಸವಗಳ ಫ್ಲೆಕ್ಸ್​​ಗಳಲ್ಲಿ ರಾಜಕಾರಣಿಗಳು, ಗಣ್ಯರ ಫೋಟೋಗಳನ್ನು ಹಾಕುವುದು ಸಾಮಾನ್ಯ. ಆದರೆ, ಶ್ರೀಶರಣ ಬಸವೇಶ್ವರ ಜಾತ್ರಾ ಮಹೋತ್ಸದ ಫ್ಲೆಕ್ಸ್​​​​ನಲ್ಲಿ ಬಾಲಿವುಡ್​ ನಟಿ ಸನ್ನಿ ಲಿಯೋನ್​ ಫೋಟೋ ಹಾಕಿದ್ದು, ಎಲ್ಲರ ಗಮನ ಸೆಳೆಯುತ್ತಿದೆ.

ಜಿಲ್ಲೆಯ ಕುಷ್ಟಗಿ ತಾಲೂಕಿನ ಹಾಬಲಕಟ್ಟಿಯಲ್ಲಿ ಶ್ರೀಶರಣಬಸವೇಶ್ವರ ಜಾತ್ರಾ ಮಹೋತ್ಸವ ನಡೆಯಲಿದೆ. ಜಾತ್ರೆ ಪ್ರಯುಕ್ತ ಸಾಮೂಹಿಕ ವಿವಾಹ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ. ಈ ಸಮಾರಂಭಕ್ಕೆ ಸ್ವಾಗತಿಸಲು ಕೆಲ ಯುವಕರು ತಮ್ಮ ಭಾವಚಿತ್ರದ ಜೊತೆಗೆ ನಟಿ ಸನ್ನಿ ಲಿಯೋನ್​ ಫೋಟೋ ಫ್ಲೆಕ್ಸ್​​​ನಲ್ಲಿ ಹಾಕಿಸಿದ್ದಾರೆ.

ಸನ್ನಿ ಲಿಯೋನ್​​ ಕೊರೊನಾ ಕಾಲದಲ್ಲಿ ಹಲವರಿಗೆ ಸಹಾಯ ಮಾಡುವ ಮೂಲಕ ಜನಪರವಾದ ಕೆಲಸಗಳನ್ನು ಮಾಡಿದ್ದರು. ಇವರ ಕಾರ್ಯಕ್ಕೆ ಎಲ್ಲೆಡೆ ಮೆಚ್ಚುಗೆ ವ್ಯಕ್ತವಾಗಿತ್ತು. ಈ ಹಿನ್ನೆಲೆಯಲ್ಲಿ ನಟಿಯ ಸಹಾಯಕ್ಕೆ ಕೃತಜ್ಞತೆ ಸಲ್ಲಿಸುವ ಸಲುವಾಗಿ ಫ್ಲೆಕ್ಸ್​​​​ನಲ್ಲಿ ಭಾವಚಿತ್ರ ಹಾಕಿಸಿದ್ದಾರೆ ಎನ್ನಲಾಗುತ್ತಿದೆ.