ಕೋಲಾರ: ಬಯಲು ಸೀಮೆ ಜಿಲ್ಲೆ ಕೋಲಾರಕ್ಕೆ ಸ್ವಾತಂತ್ರ್ಯ ನಂತರ ಮಾಡಲಾದ ಮೊದಲ ನೀರಾವರಿ ಯೋಜನೆ ಅಂದರೆ ಅದು ಕೆ ಸಿ ವ್ಯಾಲಿ. ಬೆಂಗಳೂರು ತ್ಯಾಜ್ಯ ನೀರನ್ನು ಸಂಸ್ಕರಿಸಿ ಕೋಲಾರ ಜಿಲ್ಲೆಯ ಕೆರೆಗಳಿಗೆ ಹರಿಸುವ ಯೋಜನೆ. ಈ ಯೋಜನೆಗೆ ಆರಂಭದಿಂದಲೂ ಸಾಕಷ್ಟು ವಿಘ್ನಗಳು ಎದುರಾಗುತ್ತಲೇ ಇದೆ.
ಈ ನೀರಿನ ಶುದ್ಧತೆ ಪ್ರಶ್ನಿಸಿ ಸುಪ್ರೀಂಕೋರ್ಟ್ ಮೊರೆ ಹೋಗಲಾಗಿತ್ತು. ಕೋರ್ಟ್ ಎಲ್ಲವನ್ನು ಪರಿಶೀಲಿಸಿ ನೀರು ಹರಿಸಲು ಗ್ರೀನ್ ಸಿಗ್ನಲ್ ನೀಡಿತ್ತು. ಹೀಗಿದ್ದೂ ಕೂಡ ಮನ್ನೆ ಕೆಲವರು ಸಾಮಾಜಿಕ ಜಾಲತಾಣಗಳಲ್ಲಿ ಕೆ ಸಿ ವ್ಯಾಲಿಯಲ್ಲಿ ಅಶುದ್ಧ ನೀರನ್ನು ಕೋಲಾರ ಕೆರೆಗಳಿಗೆ ಹರಿಸಲಾಗುತ್ತಿದೆ ಎಂದು ಅಪಪ್ರಚಾರ ಮಾಡಿದ್ದರು. ಈ ಹಿನ್ನೆಲೆಯಲ್ಲಿ ಜಿಲ್ಲಾಧಿಕಾರಿ ಜೆ.ಮಂಜುನಾಥ್ ಮತ್ತು ಸಣ್ಣ ನೀರಾವರಿ ಇಲಾಖೆ ಅಧಿಕಾರಿಗಳ ತಂಡ, ಕೋಲಾರ ತಾಲೂಕು ಸಿಂಗೇಹಳ್ಳಿ, ನರಸಾಪುರ, ಮತ್ತು ಲಕ್ಷ್ಮೀಸಾಗರ ಕೆರೆಗಳಿಗೆ ಭೇಟಿನೀಡಿ ನೀರಿನ ಶುದ್ಧತೆಯನ್ನು ಪರಿಶೀಲಿಸಿದ್ರು.
ಈ ವೇಳೆ ನೀರಿನ ಗುಣಮಟ್ಟ ಉತ್ತಮವಾಗಿರುವುದು ಖಾತ್ರಿಯಾಯಿತು.ಅಲ್ಲದೆ ಪ್ರತಿದಿನ ನೀರಿನ ಗುಣಮಟ್ಟದ ಬಗ್ಗೆ ವೆಬ್ಸೈಟ್ನಲ್ಲೇ ಮಾಹಿತಿ ನೀಡುತ್ತಿರುವುದಾಗಿ ತಿಳಿಸಿದ್ರು.
