ಕೋಲಾರ ಹೊಸ ಸಂಸದರಿಗೆ ಕೈ ಜಿಲ್ಲಾಧ್ಯಕ್ಷರ ಸವಾಲ್​​... ಚುನಾವಣೆಯಲ್ಲಿ ಗೆದ್ದು ತೋರಿಸುವಂತೆ ಚಾಲೆಂಜ್​​​!

ಇಂದು ಸ್ಥಳೀಯ ಸಂಸ್ಥೆ ಚುನಾವಣೆ ನಡೆದಿದ್ದು,ಜಿಲ್ಲೆಯಲ್ಲಿ ಶಾಂತಯುತವಾಗಿ ಮತದಾನ ನಡೆದಿದೆ.

ಕೋಲಾರ:ಜಿಲ್ಲೆಯ ಮೂರು ಸ್ಥಳೀಯ ಸಂಸ್ಥೆಗಳಾದ ಮಾಲೂರು, ಶ್ರೀನಿವಾಸಪುರ ಮತ್ತು ಬಂಗಾರಪೇಟೆ ಪುರಸಭೆಗಳಿಗೆ ಇಂದು ಶಾಂತಿಯುತವಾಗಿ ಮತದಾನ ನಡೆದಿದೆ.

ಬಂಗಾರಪೇಟೆ ಪಟ್ಟಣದ ವಾರ್ಡ್ ನಂ.20 ಹಾಗೂ 21ರಲ್ಲಿ ಕೆಲ ಕಾಲ ಇವಿಎಂ ಕೈಕೊಟ್ಟಿದ್ದು, ಸ್ಥಳಕ್ಕೆ ಆಗಮಿಸಿದ ಚುನಾವಣಾಧಿಕಾರಿಗಳು ಹಾಗೂ ತಂತ್ರಜ್ಞರು ಇವಿಎಂಗಳನ್ನು ಸರಿಪಡಿಸಿದರು. ಬಂಗಾರಪೇಟೆ ಶಾಸಕ ಹಾಗೂ ಅಂಬೇಡ್ಕರ್ ಅಭಿವೃದ್ಧಿ ನಿಗಮದ ಅಧ್ಯಕ್ಷ ಎಸ್.ಎನ್.ನಾರಾಯಣಸ್ವಾಮಿ ಅವರು ಪಟ್ಟಣದ ವಾರ್ಡ್ ನಂ.8 ಮತ್ತು ಜಿಲ್ಲಾಧ್ಯಕ್ಷ ಚಂದ್ರಾರೆಡ್ಡಿ ಮತಗಟ್ಟೆ 13ರಲ್ಲಿ ಮತ ಚಲಾಯಿಸಿದರು.

ಬಳಿಕ ಬಂಗಾರಪೇಟೆ ಶಾಸಕ ಹಾಗೂ ಅಂಬೇಡ್ಕರ್ ಅಭಿವೃದ್ಧಿ ನಿಗಮದ ಅಧ್ಯಕ್ಷ ಎಸ್.ಎನ್. ನಾರಾಯಣಸ್ವಾಮಿ ಅವರು ಮಾಧ್ಯಮಗಳೊಂದಿಗೆ ಮಾತನಾಡಿ, ಜಿಲ್ಲೆಯಲ್ಲಿ ಕಾಂಗ್ರೆಸ್ ಮುಕ್ತ ಮಾಡುವವರು ಇನ್ನು ಹುಟ್ಟಿಲ್ಲ. ಮುಂದೆಯೂ ಹುಟ್ಟಲ್ಲ ಎಂದು ನೂತನ ಸಂಸದ ಎಸ್.ಮುನಿಸ್ವಾಮಿ ಅವರ ಮಾತಿಗೆ ಶಾಸಕರು ತಿರುಗೇಟು ನೀಡಿದರು. ಸಂಸದರು ಯಾರ ನೆರಳಿನಿಂದ ಗೆದ್ದರು ಎಂಬುದನ್ನು ಮರೆತ್ತಿದ್ದಾರೆ. ಕಾಂಗ್ರೆಸ್ ಮುಕ್ತ ಅನ್ನೋದು ಅವರ ಕನಸು. 15 ದಿನದಲ್ಲಿ ಆಚಾನಕ್ಕಾಗಿ ಸಂಸದರಾಗಿದ್ದಾರೆ. ಜಿಲ್ಲೆಯ ಬಗ್ಗೆ ಮಾಹಿತಿಯಿಲ್ಲ. ಅವರಿಗೆ ಜಿಲ್ಲೆಯ ರಾಜಕಾರಣ, ಜನರ ನಾಡಿಮಿಡಿತ ಗೊತ್ತಿಲ್ಲ ಎಂದರು.

ನೂತನ ಸಂಸದರಿಗೆ ಕೈ ಜಿಲ್ಲಾಧ್ಯಕ್ಷರ ಸವಾಲ್​:

ಕಾಂಗ್ರೆಸ್​ ಜಿಲ್ಲಾಧ್ಯಕ್ಷ ಕೆ.ಚಂದ್ರಾರೆಡ್ಡಿ ಮಾತನಾಡಿ, ಹೊಸದಾಗಿ ಆಯ್ಕೆಯಾಗಿರುವ ಮುನಿಸ್ವಾಮಿ ಅವರಿಗೆ ಒಂದು ಸವಾಲ್​ ಹಾಕಲು ಇಷ್ಟ ಪಡ್ತೇನಿ. ಜಿಲ್ಲೆಯ ಮೂರು ವಾರ್ಡ್​ಗಳಲ್ಲಿ ಕಾಂಗ್ರೆಸ್​ ಜಯಭೇರಿ ಬಾರಿಸುತ್ತದೆ. ತಾಕತ್​ ಇದ್ದರೆ ಬಿಜೆಪಿಯವರು 20 ಸೀಟ್​​ಗಳನ್ನು ಗೆಲ್ಲಲಿ. 3 ಪುರಸಭೆಗಳಲ್ಲಿ ಒಟ್ಟು 77 ಸ್ಥಾನಗಳ ಪೈಕಿ ಬಿಜೆಪಿ 20 ಗೆದ್ದಿದ್ದೇ ಆದಲ್ಲಿ ರಾಜಕೀಯ ನಿವೃತ್ತಿ ಪಡೆಯುತ್ತೇನೆ. ಗೆಲ್ಲದೇ ಹೋದ್ರೆ ಅವರು ಸಂಸದ ಸ್ಥಾನಕ್ಕೆ ರಾಜೀನಾಮೆ ನೀಡುತ್ತಾರಾ ಎಂದು ಚಾಲೆಂಜ್​ ಹಾಕಿದರು.

ಎಲ್ಲಾ ಪಕ್ಷಗಳ ಸಹಾಯದಿಂದ ಸಂಸದರಾಗಿ ಆಯ್ಕೆಯಾಗಿರುವ ಅವರು ಹಗಲು ಕನಸು ಕಾಣುತ್ತಿದ್ದಾರೆ. ನನ್ನ ವಿರುದ್ಧ ಆರೋಪ ಮಾಡುವುದನ್ನ ಬಿಟ್ಟು, ಬಿಜೆಪಿ ಅಭ್ಯರ್ಥಿಗಳನ್ನ ಗೆಲ್ಲಿಸಿಕೊಳ್ಳಲಿ. ನಾನು ಅವಿರೋಧ ಆಯ್ಕೆಯಾಗಿದ್ದೇನೆ. ಮೂರು ಕ್ಷೇತ್ರಗಳಲ್ಲಿ 20 ಸ್ಥಾನಗಳನ್ನ ತಾಕತ್ ಇದ್ರೆ ಗೆಲ್ಲಲಿ ಆಮೇಲೆ ನೋಡೋಣ ಎಂದು ಸವಾಲ್ ಹಾಕಿದರು.