ಗಗನಕ್ಕೇರಿದ ಇಂಧನ ಬೆಲೆ : ಸಿಟಿ ಬಸ್​​ಗಳ ಮೊರೆ ಹೋದ ಬಿಸಿಲೂರ ಜನತೆ

ಲಾಕ್‌ಡೌನ್ ನಂತರವೂ ಕೋವಿಡ್ ಆತಂಕದಿಂದ ಸಿಟಿ ಬಸ್ ಹತ್ತಲು ಜನರು ಹಿಂದೇಟು ಹಾಕುತ್ತಿದ್ದರು. ಆದ್ರೀಗ ಇಂಧನ ಬೆಲೆ ಏರಿಕೆಯಿಂದ ಸಾರಿಗೆ ಬಸ್​ಗಳಿಗೆ ಬೇಡಿಕೆ ಹೆಚ್ಚಾಗಿದೆ. ಸದ್ಯ ಅಗತ್ಯಕ್ಕೆ ತಕ್ಕಂತೆ ಸಿಟಿ ಬಸ್ ಸಂಚಾರ ನಡೆಸುತ್ತಿದ್ದಾರೆ. ಹೆಚ್ಚಿನ ಬೇಡಿಕೆ ಬಂದರೆ ಓಡಿಸಲು ಬಸ್​ಗಳಿವೆ..

ಕಲಬುರಗಿ :ಪೆಟ್ರೋಲ್, ಡೀಸೆಲ್ ಬೆಲೆ ದಿನದಿಂದ ದಿನಕ್ಕೆ ಗಗನಕ್ಕೇರುತ್ತಿದೆ. ಬೆಲೆ ಏರಿಕೆಯಾಗುತ್ತಿದ್ದಂತೆ ಬಿಸಿಲೂರು ಕಲಬುರಗಿ ಜನತೆ ತಮ್ಮ ವಾಹನಗಳನ್ನ ಮನೆಯಲ್ಲಿಯೇ ಬಿಟ್ಟು, ಸಿಟಿ ಬಸ್​​ಗಳ ಮೊರೆ ಹೋಗಲು ಆರಂಭಿಸಿದ್ದಾರೆ.

ಬೇಸಿಗೆಯ ಬಿಸಿಲೇರಿದಂತೆ ಇಂಧನ ಬೆಲೆಯೂ ಕೂಡ ಗಣನೀಯವಾಗಿ ಏರುತ್ತಿದೆ. ಇದರಿಂದ ಕಂಪನಿಗಳು ನೀಡುವ ಪ್ರಯಾಣದ ವೆಚ್ಚ ಸರಿದೂಗಿಸಲು ನೌಕರರು ಪರದಾಡುತ್ತಿದ್ದಾರೆ. ನಿತ್ಯ ಬೈಕ್​ ಓಡಿಸಿ ಕೆಲಸ ನಿರ್ವಹಿಸುತ್ತಿದ್ದ ಮೆಡಿಕಲ್​ ರೆಪ್ರೆಸೆಂಟೇಟಿವ್, ಡೆಲಿವರಿ ಬಾಯ್ಸ್​ಗೆ ದಿಕ್ಕು ತೋಚದಂತಾಗಿದೆ.

ಹೀಗಾಗಿ, ಕಂಪನಿಗಳ ಪ್ರತಿನಿಧಿಗಳು, ಖಾಸಗಿ ಕಚೇರಿ ನೌಕರರು ತಮ್ಮ ವಾಹನ ಮನೆಯಲ್ಲಿಯೇ ಬಿಟ್ಟು, ಸಿಟಿ ಬಸ್​​ಗಳ ಮೊರೆ ಹೋಗುತ್ತಿದ್ದಾರೆ. ಬಸ್ ಪ್ರಯಾಣ ದರಕ್ಕೆ ಹೋಲಿಸಿದರೆ, ಪೆಟ್ರೋಲ್ ಹಾಕಿ ಬೈಕ್ ಓಡಿಸುವುದು ಹತ್ತು ಪಟ್ಟು ದುಪ್ಪಟ್ಟು ಎಂದು ಬಸ್ ಸಂಚಾರಕ್ಕೆ ಹೆಚ್ಚಿನ ಒತ್ತು ನೀಡುತ್ತಿದ್ದಾರೆ.

ಬಸ್ಸಿನಲ್ಲಿ ಓಡಾಡುವರ ಸಂಖ್ಯೆ ಹೆಚ್ಚಾದ ಹಿನ್ನೆಲೆ, ಸಿಟಿ ಬಸ್​​ಗಳ ದಟ್ಟಣೆ ಹೆಚ್ಚಾಗುತ್ತಿದೆ. ಎನ್‌ಈ‌ಕೆಎಸ್‌ಆರ್‌ಟಿಸಿ ಕಲಬುರಗಿ ಘಟಕ-4ರಲ್ಲಿ ಸಿಟಿ ಬಸ್​​ಗಳ ನಿರ್ವಹಣೆ ಮಾಡಲಾಗುತ್ತಿದೆ. ಕೋವಿಡ್ ಲಾಕ್‌ಡೌನ್ ನಂತರ ಹಂತ-ಹಂತವಾಗಿ ನಗರದ ಎಲ್ಲಾ ಪ್ರದೇಶಗಳಲ್ಲಿ ಸಿಟಿ ಬಸ್ ಓಡಿಸಲಾಗುತ್ತಿದೆ. ಈ ಘಟಕದಲ್ಲಿ ಒಟ್ಟು 109 ಸಿಟಿ ಬಸ್​​ಗಳಿದ್ದು, ಇವುಗಳಲ್ಲಿ 89 ನಿತ್ಯ ರಸ್ತೆಗೆ ಇಳಿಯುತ್ತಿವೆ.

ಒಂದೊಂದು ಬಸ್ ನಗರದಾದ್ಯಂತ ನಿತ್ಯ ಸರಿಸುಮಾರು 8 ರಿಂದ 9 ಟ್ರಿಪ್​ ಮಾಡಿ, 250 ರಿಂದ 300 ಕಿ.ಮೀ. ಸಂಚಾರ ನಡೆಸುತ್ತಿವೆ. ಪೆಟ್ರೋಲ್ ಬೆಲೆ ಏರಿಕೆಯಿಂದ ವಾಹನ ಸವಾರರು ಬಸ್ ಪ್ರಯಾಣದತ್ತ ವಾಲಿದ ಹಿನ್ನೆಲೆ, ಸಾರಿಗೆ ಇಲಾಖೆ ಕಲೆಕ್ಷನ್​ನಲ್ಲಿಯೂ ಏರಿಕೆಯಾಗತೊಡಗಿದೆ. ನಿತ್ಯ ನಾಲ್ಕುವರೆಯಿಂದ ಐದು ಲಕ್ಷ ಆಗುತ್ತಿದ್ದ ಕಲೆಕ್ಷನ್​ ಇದೀಗ, 5.50 ಲಕ್ಷಕ್ಕೂ ಮೇಲ್ಪಟ್ಟು ಆಗುತ್ತಿದೆ.

ಓದಿ:ಕಬ್ಬಡಿ ಪಂದ್ಯಾವಳಿ ವೇಳೆ ಬಿಜೆಪಿ-ಕಾಂಗ್ರೆಸ್ ಕಾರ್ಯಕರ್ತರ ಮಾರಾಮಾರಿ : ನಾಲ್ವರಿಗೆ ಗಾಯ

ಲಾಕ್‌ಡೌನ್ ನಂತರವೂ ಕೋವಿಡ್ ಆತಂಕದಿಂದ ಸಿಟಿ ಬಸ್ ಹತ್ತಲು ಜನರು ಹಿಂದೇಟು ಹಾಕುತ್ತಿದ್ದರು. ಆದ್ರೀಗ ಇಂಧನ ಬೆಲೆ ಏರಿಕೆಯಿಂದ ಸಾರಿಗೆ ಬಸ್​ಗಳಿಗೆ ಬೇಡಿಕೆ ಹೆಚ್ಚಾಗಿದೆ. ಸದ್ಯ ಅಗತ್ಯಕ್ಕೆ ತಕ್ಕಂತೆ ಸಿಟಿ ಬಸ್ ಸಂಚಾರ ನಡೆಸುತ್ತಿದ್ದಾರೆ. ಹೆಚ್ಚಿನ ಬೇಡಿಕೆ ಬಂದರೆ ಓಡಿಸಲು ಬಸ್​ಗಳಿವೆ.

ಸಾರ್ವಜನಿಕರಿಗೆ ಉತ್ತಮ ಸೇವೆ ನೀಡುವ ನಿಟ್ಟಿನಲ್ಲಿ ಬೇಕಾದ ಅಗತ್ಯ ಕ್ರಮಕ್ಕೆ ನಾವು ಸನ್ನದ್ಧರಾಗಿದ್ದೇವೆ ಎಂದು ನೃಪತುಂಗ ಸಿಟಿ ಬಸ್​ಗಳ ವ್ಯವಸ್ಥೆ ನೋಡಿಕೊಳ್ಳುತ್ತಿರುವ ಘಟಕ 4ರ ಡಿಪೋ ಮ್ಯಾನೇಜರ್ ಪ್ರೀತಿ ಕಾಳೆ ತಿಳಿಸಿದ್ದಾರೆ.