ಹಸುಗೂಸಿನೊಂದಿಗೆ ಬಸ್​ ನಿಲ್ದಾಣದಲ್ಲಿ ಪರದಾಡ್ತಿದ್ದ ಮಹಿಳೆ: ಕಷ್ಟಕ್ಕೆ ಸ್ಪಂದಿಸಿ, ನೆರವಾದ ಆಟೋ ಚಾಲಕರು

ಆಟೋ ಚಾಲಕರು, ಪ್ರಯಾಣಿಕರಿಂದ ದುಪ್ಪಟ್ಟು ಹಣ ಪಡೆಯುತ್ತಿದ್ದಾರೆ ಎಂಬ ಆರೋಪದ ಮಧ್ಯೆಯೇ, ಕಲಬುರಗಿ ಬಸ್​ ನಿಲ್ದಾಣದಲ್ಲಿ ಪರದಾಡುತ್ತಿದ್ದ ಮಹಿಳೆಗೆ ಆಟೋ ಚಾಲಕರು ನೆರವಾಗಿದ್ದಾರೆ.

ಕಲಬುರಗಿ :ಸಾರಿಗೆ ನೌಕರರ ಮುಷ್ಕರ ಹಿನ್ನೆಲೆ ಬಸ್ ಸಂಚಾರ ಸ್ಥಗಿತಗೊಂಡಿದ್ದರಿಂದ ಹಸುಗೂಸಿನೊಂದಿಗೆ ಕಳೆದ ಮೂರು ದಿನಗಳಿಂದ ನಗರದ ಬಸ್ ನಿಲ್ದಾಣದಲ್ಲಿ ಪರದಾಡುತ್ತಿದ್ದ ಮಹಿಳೆಯ ನೆರವಿಗೆ ಆಟೋ ಚಾಲಕರು ಬಂದಿದ್ದಾರೆ.

ಮಹಿಳೆಯ ಕಷ್ಟಕ್ಕೆ ಸ್ಪಂದಿಸಿದ ಆಟೋ ಚಾಲಕರು :

ಸ್ವಾತಿ ಎಂಬ ಮಹಿಳೆ ಹಸುಗೂಸು ಮತ್ತು ಮತ್ತೊಂದು ಮಗುವಿನೊಂದಿಗೆ ಮಹಾರಾಷ್ಟ್ರದ ಲಾತೂರ್​ನಿಂದ ಬೆಂಗಳೂರಿಗೆ ತೆರಳಲು ಕಲಬುರಗಿಗೆ ಬಂದಿದ್ದರು. ಬಸ್​ ಸಂಚಾರ ಸ್ಥಗಿತಗೊಂಡಿದ್ದರಿಂದ ಬೆಂಗಳೂರಿಗೆ ತೆರಳಲಾಗದೆ ಬಸ್​ ನಿಲ್ದಾಣದಲ್ಲಿಯೇ ಪರದಾಡುತ್ತಿದ್ದರು. ಮಹಿಳೆಯ ಕೈಯಲ್ಲಿ ಹಣ ಇಲ್ಲದಿದ್ದರಿಂದ ಆಹಾರ ಸಿಗದೆ ಕಂಗಾಲಾಗಿದ್ದರು. ಈಕೆಯ ಸಂಕಷ್ಟ ಕಂಡು ನೆರವಿಗೆ ಬಂದ ನಗರದ ಆಟೋ ಚಾಲಕರು, ಹಣ ಹೊಂದಿಸಿ ಖಾಸಗಿ ಬಸ್ ಮೂಲಕ ಬೆಂಗಳೂರಿಗೆ ಕಳಿಸಿಕೊಡುವ ವ್ಯವಸ್ಥೆ ಮಾಡಿದ್ದಾರೆ.

ಬಸ್​ ಸಂಚಾರ ಸ್ಥಗಿತಗೊಂಡಿದ್ದನ್ನೇ ಲಾಭ ಮಾಡಿಕೊಂಡ ಕೆಲ ಆಟೋ ಚಾಲಕರು, ಪ್ರಯಾಣಿಕರಿಂದ ದುಪ್ಪಟ್ಟು ಹಣ ವಸೂಲಿ ಮಾಡುತ್ತಿದ್ದಾರೆ ಎಂಬ ಆರೋಪಗಳು ಕೇಳಿ ಬರುತ್ತಿವೆ. ಈ ನಡುವೆ ಮಹಿಳೆಯ ಕಷ್ಟಕ್ಕೆ ಸ್ಪಂದಿಸುವ ಮೂಲಕ ಆಟೋ ಚಾಲಕರು ಸಾರ್ವಜನಿಕರ ಪ್ರಶಂಸೆಗೆ ಪಾತ್ರರಾಗಿದ್ದಾರೆ.