ಸಾರಿಗೆ ವ್ಯವಸ್ಥೆ ಇಲ್ಲದೆ ಕಲಬುರಗಿ ಪೌರಕಾರ್ಮಿಕರ ಪರದಾಟ!

ಲಾಕ್​ಡೌನ್​ ಜಾರಿಯಲ್ಲಿರುವುದರಿಂದ ಸಂಚಾರ ವ್ಯವಸ್ಥೆಯನ್ನು ಸಂಪೂರ್ಣ ನಿಷೇಧಿಸಲಾಗಿದೆ. ಅಟೋ, ಬಸ್ ಸಂಚಾರ ಇಲ್ಲದೆ ನಿತ್ಯ ಮನೆಯಿಂದ ಕರ್ತವ್ಯಕ್ಕೆ ಬರಲು, ಕೆಲಸ ಮುಗಿಸಿ ಮನೆಗೆ ತೆರಳಲು ಪೌರಕಾರ್ಮಿಕರು ಸಹ ಪರದಾಡುತ್ತಿದ್ದಾರೆ.

ಕಲಬುರಗಿ: ಲಾಕ್‌ಡೌನ್ ಹಿನ್ನಲೆ ನಗರ ಸಾರಿಗೆ ಹಾಗೂ ಅಟೋ ಸಂಚಾರ ಸಂಪೂರ್ಣ ನಿಷೇಧ ಮಾಡಲಾಗಿದ್ದು, ನಿತ್ಯ ಸ್ವಚ್ಛತಾ ಸೇವೆಗೆ ಬರುವ ಮಹಾನಗರ ಪಾಲಿಕೆಯ ಪೌರಕಾರ್ಮಿಕರು ಪರದಾಡುವಂತ ಪರಿಸ್ಥಿತಿ ನಿರ್ಮಾಣವಾಗಿದೆ.

ಲಾಕ್​ಡೌನ್​ ಜಾರಿಯಲ್ಲಿರುವುದರಿಂದ ಸಂಚಾರ ವ್ಯವಸ್ಥೆಯನ್ನು ಸಂಪೂರ್ಣ ನಿಷೇಧಿಸಲಾಗಿದೆ. ನಿತ್ಯ ಬೆಳಿಗ್ಗೆ 6 ಗಂಟೆಯಿಂದ ಮದ್ಯಾಹ್ನ 2 ಗಂಟೆವರೆಗೆ ಸ್ವಚ್ಛತಾ ಸೇವೆ ಮಾಡುವ ಪೌರಕಾರ್ಮಿಕರು ಅಟೋ, ಬಸ್ ಸಂಚಾರ ಇಲ್ಲದೆ ನಿತ್ಯ ಮನೆಯಿಂದ ಕರ್ತವ್ಯಕ್ಕೆ ಬರಲು, ಕೆಲಸ ಮುಗಿಸಿ ಮನೆಗೆ ತೆರಳಲು ಪರದಾಟ ನಡೆಸುತ್ತಿದ್ದಾರೆ. ಹೀರಾಪುರ, ಸುಲ್ತಾನಪುರ, ಹಾಗರಗಾ, ಕುಸನೂರ, ರಾಜಾಪುರ, ರಾಮತೀರ್ಥ, ರೋಜಾ ಹೀಗೆ ಸುಮಾರು 8-10 ಕಿ.ಮೀ. ದೂರದಿಂದ ಕೆಲಸಕ್ಕೆ ಬರುವ ಇವರು ಪ್ರತಿದಿನ ಕೆಲಸ ಮುಗಿಸಿಕೊಂಡು ಮಧ್ಯಾಹ್ನ ಬಿರು ಬಿಸಿಲಿನಲ್ಲಿಯೇ ಎರಡರಿಂದ ಮೂರು ಗಂಟೆ ಕಾಲ ಕಾಲ್ನಡಿಗೆಯಲ್ಲಿ ಸಾಗಿ ಮನೆ ಸೇರುತ್ತಿದ್ದಾರೆ‌.

ಇನ್ನು ಲಾಕ್​​ಡೌನ್ ಆದಾಗಿನಿಂದ ಸಂಚಾರಕ್ಕೆ ತೀವ್ರ ಸಮಸ್ಯೆಯಾಗುತ್ತಿದ್ದು, ವಾಹನದ ವ್ಯವಸ್ಥೆ ಮಾಡುವಂತೆ ಅವರು ಮನವಿ ಮಾಡಿದ್ದಾರೆ.