ಕಲಬುರಗಿ: ಹೋಳಿ ಹಬ್ಬದಂದು ರಕ್ತದೋಕುಳಿ ಹರಿಸಿದ್ದ ಮೂವರು ಅರೆಸ್ಟ್​!

ಹೋಳಿ ಹುಣ್ಣಿಮೆ ದಿನ ಕಲಬುರಗಿಯಲ್ಲಿ ನಡೆದ ರೌಡಿಶೀಟರ್ ಕೊಲೆ ಪ್ರಕರಣ ಸಂಬಂಧ ಮೂವರನ್ನು ಪೊಲೀಸರು ಬಂಧಿಸಿದ್ದಾರೆ.

ಕಲಬುರಗಿ:ಹೋಳಿ ಹುಣ್ಣಿಮೆ ದಿನ ನಡೆದ ಇಲ್ಲಿನ ಬಾಪುನಗರದ ರೌಡಿಶೀಟರ್​​ ವೀರತಾ ಉಪಾಧ್ಯ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮೂವರು ಆರೋಪಿಗಳನ್ನು ಬಂಧಿಸಲಾಗಿದೆ.

ತೌಸೀಫ್​ ಶೇಖ್​ (24), ಅಂಬರೀಶ್​ ಮಳಖೇಡ (28) ಹಾಗೂ ಜೈಭೀಮ ಗಣಜಲಖೇಡ (26) ಬಂಧಿತ ಆರೋಪಿಗಳು. ಇನ್ನೂ ಕೆಲ ಆರೋಪಿಗಳು ತಲೆಮರೆಸಿಕೊಂಡಿದ್ದು, ಅವರ ಬಂಧನಕ್ಕೆ ಜಾಲ ಬೀಸಲಾಗಿದೆ ಎಂದು ನಗರ ಪೊಲೀಸ್ ಆಯುಕ್ತರು ಮಾಹಿತಿ ನೀಡಿದ್ದಾರೆ.

ಮಾರ್ಚ್ 29ರಂದು ಸಾಯಂಕಾಲ 4:30ರ ಸುಮಾರಿಗೆ ಜಿಲ್ಲಾ ಸರ್ಕಾರಿ ಆಸ್ಪತ್ರೆ ಎದುರುಗಡೆ ರಸ್ತೆ ಬಳಿ ಬಾಪುನಗರ ಬಡಾವಣೆಯ ವೀರತಾ ಉಪಾಧ್ಯ (24) ಕೊಲೆ ನಡೆದಿತ್ತು. ಲಾಲ್ಯಾ @ ಪ್ರಸಾದ, ವಿಶಾಲ ನವರಂಗ, ಸತೀಶ @ ಗುಂಡು ಫರತಾಬಾದ, ಬಾಂಬೆ ಸಂಜ್ಯಾ, ತೌಸೀಫ್​ ಇತರರು ಸೇರಿ ಈತನ ತಲೆಯ ಮೇಲೆ ಕಲ್ಲು ಎತ್ತಿ ಹಾಕಿ ಕೊಲೆ ಮಾಡಿರುವ ಬಗ್ಗೆ ಬ್ರಹ್ಮಪುರ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಪ್ರತೀಕಾರ ತೀರಿಸಿಕೊಂಡವರು ಅಂದರ್:

ವೀರತಾ ಉಪಾಧ್ಯ ಕೊಲೆಯ ಪ್ರತಿಕಾರ ಪಡೆಯಲು ಸುಂದರ ನಗರ ಬಡಾವಣೆಗೆ ನುಗ್ಗಿ ಸಿಕ್ಕಸಿಕ್ಕವರನ್ನು ಥಳಿಸಿ, 5 ಕಾರು, 3 ಅಟೋ, 30ಕ್ಕಿಂತ ಹೆಚ್ಚು ದ್ವಿಚಕ್ರ ವಾಹನಗಳಿಗೆ ಕಲ್ಲು, ಬಡಿಗೆಗಳಿಂದ ಹೊಡೆದು ಜಖಂಗೊಳಿಸಿ ಹಾನಿ ಮಾಡಿದಲ್ಲದೆ ಜಿಲ್ಲಾಸ್ಪತ್ರೆಗೆ ನುಗ್ಗಿ ಗ್ಲಾಸ್​​ ಒಡೆದು ಹಾನಿಗೊಳಿಸಿರುವ ಬಗ್ಗೆ ಬ್ರಹ್ಮಪುರ ಠಾಣೆಯಲ್ಲಿ 10 ಪ್ರಕರಣಗಳು ದಾಖಲಾಗಿವೆ. ಅವುಗಳಲ್ಲಿ 3 ಪ್ರಕರಣಗಳು ಕೊಲೆ ಯತ್ನ, ಉಳಿದ ಪ್ರಕರಣಗಳು ದೊಂಬಿ ಪ್ರಕರಣಗಳಾಗಿವೆ. ಈ ಪ್ರಕರಣಗಳಲ್ಲಿ ಇಲ್ಲಿಯವರೆಗೆ 48 ಜನ ಆರೋಪಿತರನ್ನು ಬಂಧಿಸಿ ಜೈಲಿಗೆ ಅಟ್ಟಲಾಗಿದೆ. ಇನ್ನೂ ಹಲವರು ತೆಲೆ ಮರೆಸಿಕೊಂಡಿದ್ದು ಅವರ ಬಂಧನಕ್ಕೆ ಪೊಲೀಸರು ಪ್ರಯತ್ನ ನಡೆಸಿದ್ದಾರೆ.

ಇದನ್ನೂ ಓದಿ:ರೌಡಿ ಶೀಟರ್​​ ಕೊಲೆ ಬೆನ್ನಲ್ಲೇ ಬೆಂಬಲಿಗರಿಂದ ಕಂಡ ಕಂಡವರ ಮೇಲೆ ಹಲ್ಲೆ: ನೂರಾರು ವಾಹನಗಳು ಜಖಂ