ಪರ್ತಕರ್ತನ ಮೇಲೆ 'ಖಾಕಿ' ಹಲ್ಲೆ.. ಕಾನ್‌ಸ್ಟೆಬಲ್‌ ಅಮಾನತ್ತುಗೊಳಿಸಲು ಆಗ್ರಹ..

ಪತ್ರಕರ್ತನ ಮೇಲೆ ಪೊಲೀಸ್ ಕಾನ್ಸ್​​ಟೆಬಲ್ ಹಲ್ಲೆಗೆ ಯತ್ನಿಸಿರುವ ಘಟನೆ, ಕಲಬುರಗಿ ಜಿಲ್ಲೆಯ ಜೇವರ್ಗಿಯಲ್ಲಿ ನಡೆದಿದೆ. ಇದರಿಂದಾಗಿ ಕಾನ್ಸ್​​ಟೆಬಲ್​​​​ನನ್ನು ಸೇವೆಯಿಂದ ಅಮಾನತ್ತುಗೊಳಿಸುವಂತೆ ಸ್ಥಳೀಯ ಪತ್ರಕರ್ತರು ಆಗ್ರಹಿಸಿದ್ದಾರೆ‌.

ಕಲಬುರ್ಗಿ :ವರದಿಗಾಗಿ ತೆರಳಿದ್ದ ಪತ್ರಕರ್ತನ ಅಂಗಿಯ ಕಾಲರ್​​ ಹಿಡಿದು ಎಳೆದಾಡಿ, ಪೊಲೀಸ್ ಕಾನ್‌ಸ್ಟೆಬಲ್ ಅಸಭ್ಯ ವರ್ತನೆ ತೋರಿರುವ ಘಟನೆ ಜೇವರ್ಗಿಯಲ್ಲಿ ನಡೆದಿದೆ. ತಪ್ಪಿತಸ್ಥ ಕಾನ್‌ಸ್ಟೆಬಲ್​​​​ ಸೇವೆಯಿಂದ ಅಮಾನತ್ತುಗೊಳಿಸುವಂತೆ ಪತ್ರಕರ್ತರು ಆಗ್ರಹಿಸಿದ್ದಾರೆ‌.

ಜಿಲ್ಲೆಯಲ್ಲಿ 144 ನಿಷೇಧಾಜ್ಞೆ ಜಾರಿಯಿದ್ದರೂ ಜೇವರ್ಗಿಯಲ್ಲಿ ಕೆಲ ಪ್ರಭಾವಿಗಳು, ಕಾರಹುಣ್ಣಿಮೆ ಪ್ರಯುಕ್ತ ಎತ್ತುಗಳ ಮೆರವಣಿಗೆ ಮಾಡಿದ್ದಾರೆ. ಈ ವೇಳೆ ವರದಿ ಮಾಡಲು ತೆರಳಿದ್ದ ಪತ್ರಿಕಾ ವರದಿಗಾರ ಶರಣಪ್ಪ, ತಮ್ಮ ಮೊಬೈಲ್​​​​ನಲ್ಲಿ ಫೋಟೋ ತೆಗೆದಿದ್ದಾರೆ.

ಇದನ್ನು ನೋಡಿದ ಜೇವರ್ಗಿ ಪೊಲೀಸ್ ಠಾಣೆಯ ಕಾನ್‌ಸ್ಟೆಬಲ್​​​ಸಿದ್ದಣ್ಣ ಮೊಗನಟಗಾ, ಮೊಬೈಲ್ ಕಸೆದುಕೊಂಡು ಅವಾಚ್ಯ ಶಬ್ಧಗಳಿಂದ ನಿಂದಿಸಿದಲ್ಲದೆ, ನೂರಾರು ಜನರ ನಡುವೆ ಶರ್ಟ್ ಕಾಲರ್ ಹಿಡಿದು ಎಳೆದಾಡಿ ಹಲ್ಲೆಗೆ ಯತ್ನಿಸಿದ್ದಾರೆ‌.

ಪತ್ರಕರ್ತ ಎಂದು ಹೇಳಿ ಐಡಿ ಕಾರ್ಡ್ ತೋರಿಸಿದರೂ ಅಸಭ್ಯವಾಗಿ ವರ್ತಿಸಿ, ಉದ್ದೇಶಪೂರ್ವಕ ಅವಮಾನಗೊಳಿಸಿದ್ದಾರೆ. ಆದ್ದರಿಂದ ಕಾನ್‌ಸ್ಟೆಬಲ್​​​​​ನನ್ನು ಸೇವೆಯಿಂದ ಅಮಾನತ್ತುಗೊಳಿಸಬೇಕೆಂದು ಸ್ಥಳೀಯ ಪತ್ರಕರ್ತರು ತಹಶೀಲ್ದಾರರ ಮೂಲಕ ಎಸ್​​​ಪಿಯವರಿಗೆ ಮನವಿ ಸಲ್ಲಿಸಿದ್ದಾರೆ.