ಲಾಕ್​ಡೌನ್​ ನಡುವೆ ರಥೋತ್ಸವಕ್ಕೆ ಸಿದ್ಧತೆ: ಉತ್ಸವ ತಡೆಯಲು ಪೊಲೀಸರ ಹೊಸ ಪ್ಲಾನ್​!

ಕೊರೊನಾ ಹಾಟ್​ಸ್ಪಾಟ್​ ಕಲಬುರಗಿ ಜಿಲ್ಲೆಯಲ್ಲಿ ಲಾಕ್​ಡೌನ್​ ಉಲ್ಲಂಘಿಸಿ ರಥೋತ್ಸವ ನಡೆಸಲು ಸಿದ್ಧತೆ ನಡೆಸಲಾಗಿತ್ತು. ಇದನ್ನು ತಡೆಯಲು ಪೊಲೀಸರು ಹೊಸ ಕ್ರಮ ಕೈಗೊಂಡಿದ್ದಾರೆ.

ಕಲಬುರಗಿ: ಜಿಲ್ಲೆಯ ಆಳಂದ ತಾಲೂಕಿನ ಮುನ್ನಹಳ್ಳಿ ಹಾಗೂ ಕಿಣ್ಣಿಸುಲ್ತಾನ್​ ಗ್ರಾಮದಲ್ಲಿ ರಥದ ಸುತ್ತ ಆಳವಾದ ತಗ್ಗು ತೆಗೆದು ರಥೋತ್ಸವ ನಡೆಯದಂತೆ ಪೊಲೀಸರು ಮುಂಜಾಗ್ರತೆ ವಹಿಸಿದ್ದಾರೆ.

ಬಸವಣ್ಣನ ಸಮಕಾಲೀನ ವಚನಕಾರರಾಗಿದ್ದ ಮಸನ ಸಿದ್ದೇಶ್ವರ ಜಾತ್ರೆ ಮುನ್ನಹಳ್ಳಿ ಗ್ರಾಮದಲ್ಲಿ ನಡೆಯಬೇಕಿತ್ತು. ಅದರಂತೆ ಕಿಣ್ಣಿಸುಲ್ತಾನ್​ ಗ್ರಾಮದಲ್ಲಿ ಬಸವೇಶ್ವರ ದೇವರ ಜಾತ್ರೆ ಬಸವ ಜಯಂತಿಯಂದು ನಡೆಯಬೇಕಿತ್ತು. ಕೊರೊನಾ ಜಾಗೃತಿ ನಡುವೆ ಗ್ರಾಮಸ್ಥರು ರಥೋತ್ಸವ ನಡೆಸುವ ಆತಂಕ ಇದ್ದ ಕಾರಣಕ್ಕೆ ಎರಡು ಗ್ರಾಮದಲ್ಲಿ ರಥದ ಸುತ್ತ ಗುಂಡಿ ತೆಗೆಯಲಾಗಿದೆ.

ಈ ಹಿಂದೆ ತಾಲೂಕಾಡಳಿತದ ಸೂಕ್ತ ಕ್ರಮದ ನಡುವೆಯೂ ಆಳಂದ ತಾಲೂಕಿನ ಭೂಸನೂರು, ಚಿತ್ತಾಪುರ ತಾಲೂಕಿನ ರಾವೂರು, ಸಾವಳಗಿಯಲ್ಲಿ ಗ್ರಾಮಸ್ಥರು ನಿಷೇಧಾಜ್ಞೆ ಉಲ್ಲಂಘಿಸಿ ರಾತ್ರೋರಾತ್ರಿ ರಥೋತ್ಸವ ನಡೆಸಿದ್ದರು. ನೂರಾರು ಜನ ಸಾಮಾಜಿಕ ಅಂತರವನ್ನು ಕಾಯ್ದುಕೊಳ್ಳದೆ ರಥೋತ್ಸವದಲ್ಲಿ ಪಾಲ್ಗೊಂಡಿದ್ದರು. ಈ ಹಿನ್ನೆಲೆ ಇಡೀ ರಾವೂರ ಗ್ರಾಮವನ್ನೇ ಕ್ವಾರಂಟೈನ್ ಮಾಡಬೇಕಾಯಿತು. ಘಟನೆ ಸಂಬಂಧ ಹಲವು ಅಧಿಕಾರಿಗಳು ಸೇವೆಯಿಂದ ಅಮಾನತುಗೊಂಡಿದ್ದಾರೆ.