ಹಾವೇರಿ:ಮಟಮಟ ಮಧ್ಯಾಹ್ನ ರಾಣೆಬೆನ್ನೂರು ನಗರದ ಶಕ್ತಿ ಚಿತ್ರಮಂದಿರ ಬಳಿ ತಾಯಿ ಮತ್ತು ಹೆಣ್ಣು ಮಗು ನಾಪತ್ತೆಯಾಗಿರೋ ಘಟನೆ ನಡೆದಿದೆ.
ಹಾವೇರಿ ತಾಲೂಕಿನ ಹೊಂಬರಡಿ ಗ್ರಾಮದ ಸುನಿತಾ ನಾಗರಾಜ ಉಪ್ಪಿನಾಯಿ ಮತ್ತು ಎರಡು ವರ್ಷದ ಹೆಣ್ಣು ಮಗು ಲಕ್ಷ್ಮಿ ನಾಗರಾಜ ಉಪ್ಪಿನಾಯಿ ನಾಪತ್ತೆಯಾಗಿದ್ದು, ಅಪಹರಣ ಶಂಕೆ ವ್ಯಕ್ತವಾಗಿದೆ. ಈ ಸಂಬಂಧ ಯಾರೋ ಅಪರಿಚಿತರು ಅಪಹರಣ ಮಾಡಿದ್ದಾರೆ ಎಂದು ಪತಿ ಪೊಲೀಸರಿಗೆ ದೂರು ನೀಡಿದ್ದಾರೆ.
ಏನಿದು ಪ್ರಕರಣ...
ನಾಗರಾಜ ಉಪ್ಪಿನಾಯಿ ಮತ್ತು ಪತ್ನಿ ಲಕ್ಷ್ಮಿ ಉಪ್ಪಿನಾಯಿ ಅವರು ತಮ್ಮ ಹೆಣ್ಣು ಮಗು ಜತೆ ಜೀವನಾಂಶಕ್ಕಾಗಿ ರಾಣೆಬೆನ್ನೂರು ನಗರದಲ್ಲಿ ಕೆಲಸದ ಹುಡುಕಾಟ ನಡೆಸುತ್ತಿದ್ದರು. ಈ ವೇಳೆ ಮಧ್ಯಾಹ್ನ ಹಸಿವಾದಾಗ ಶಕ್ತಿ ಚಿತ್ರಮಂದಿರ ಪಕ್ಕದಲ್ಲಿ ಗಂಡ ನಾಗರಾಜ ಪತ್ನಿಗೆ ಎಗ್ ರೈಸ್ ತಿನ್ನಲು ಹೇಳಿ ಶೌಚಾಲಯಕ್ಕೆ ತೆರಳಿದ್ದಾರೆ. ನಂತರ ನಾಗರಾಜ ಮರಳಿ ಬಂದು ನೋಡಿದಾಗ ಪತ್ನಿ ಸುನಿತಾ ಮತ್ತು ಮಗಳು ಲಕ್ಷ್ಮಿ ಊಟ ಮಾಡದೇ ಕಾಣೆಯಾಗಿರುವುದು ನೋಡಿ ನಾಗರಾಜ ಗಾಬರಿಯಾಗಿದ್ದಾರೆ.
ನಂತರ ನಗರದ ಎಲ್ಲ ಕಡೆ ಹುಡುಕಾಟ ನಡೆಸಿದ್ದಾರೆ. ತಾಯಿ-ಮಗು ಪತ್ತೆಯಾಗದ ಕಾರಣ ನಾಗರಾಜ ಶಹರ ಪೊಲೀಸರ ಮೊರೆ ಹೋಗಿದ್ದಾರೆ. ಪತ್ನಿ ಮತ್ತು ಮಗುವನ್ನು ಯಾರೋ ಅಪಹರಣ ಮಾಡಿದ್ದಾರೆ ಎಂದು ದೂರು ನೀಡಿದ್ದಾರೆ. ರಾಣೆಬೆನ್ನೂರು ಶಹರ ಪೊಲೀಸರು ದೂರು ದಾಖಲಿಸಿಕೊಂಡು ತನಿಖೆ ಮುಂದುವರಿಸಿದ್ದಾರೆ.
